Wb/nia/Nehemia/13

I. Ifahaogo'ö sibai gosali Nehemia

1 Ba me luo da'ö, ba labaso ba niha sato zura Moze, ba lasöndra, wa no musura ba da'ö, wa ö'ö manö tola möi banua Lowalangi Ndraono Gamoni ba Iraono Moabi, 2 me no lö la'ohe ö Ndraono Gizeraeli roti ba idanö, föna no, ba me no la'oni Mbileamo andrö, ba wangelifi ya'ira, fangelifi andrö nibali'ö Lowalangida howu-howu. 3 Ba me larongo goroisa andrö, ba laheta ba Ndraono Gizeraeli niha bö'ö fefu. 4 Ba föna da'ö sa'ae, ba no maoso Geliasibi ere, si tengabö'ö Dobia, si no mufataro samaigi-maigi ba mbate'e andrö ba gosali Lowalangida, 5 no ihaogö nahia Dobia andrö mbate'e sebua; ba mege, ba sumange ni'a andrö ni'irö'ö ba da'ö ba kumöyö ba gama-gama ba si sambu-sambua ni'ofulu mbua nowi ba agu ba fanikha, sinema Nono Lewi ba sanunö ba sanaro ba mbawandruhö, awö mbuala saoha gölö andrö, balazo gere. 6 Be me luo da'ö, ba lö ya'o ba Yeruzalema, noa sa möido khö razo, ba ndröfi si 31 khö Aretazasa, razo Mbabeli; ba lö ara, ba ufuli u'andrö aefa ndra'o khö razo, 7 ba me urugi Yeruzalema, ba u'ila horö Geliazibi andrö, me no ihaogö khö Dobia mbate'e ba zinga golayama gosali Lowalangi. 8 Ba abao sibai dödögu ba da'ö, ba utema uheta ba mbate'e andrö gama-gama Dobia, ahori utibo'ö baero, 9 ba uŵa'ö lafuli lahaogö mbate'e andrö; ba ufuli bakha gama-gama ba gosali Lowalangi, awö zumange ni'a, awö gumöyö.

II. Itegu zato, me no lö mube'e mbalazo gere

10 Ba urongo na göi, wa lö mube'e mbobotolö andrö, sinema Nono Lewi, ba no tobali laheta ira Ono Lewi ba sanunö andrö, nifataro ba halöŵöra; no isaŵa mbenuania zamösana. 11 Ba utahigö zatua, umane: Hana wa no la'erogö gosali Lowalangi? Ba ufakaoni'ö ira, ba ufuli ufataro ira ba nahara. 12 Ba dozi niha Yehuda, ba la'ohe zi sambu-sambua ni'ofulu, bua nowi ba agu ba fanikha, labe'e ba mbate'e wangöhöna andrö. 13 Ba ufataro samaigi-maigi ba mbate'e wangöhöna andrö Zelemia ere ba Sadoki sangila amakhoita ba Fedaya Ono Lewi, ba tohu-tohu dangara Hanano, ono Zakuru ono Matania; da'ö sa zi faduhu dödöma, ba ba dangara tebe'e wamaosa ba dalifusöra. 14 Törö-törö tödöu khögu da'ö, ya'ugö Lowalangigu, ba böi olifugö'ö zi sökhi andrö, nilaugu ba gosali Lowalangigu ba ba halöŵö ba da'ö.

III. Iŵa'ö sibai zui we'amoni'ö luo sabato

15 Ba me luo da'ö, ba u'ila ösa ba mado Yuda, solazi bua nagu ba luo sabato ba solohe yomo bua nowi ba samonoro kalide ösi nagu ba bua nagu ba bua ara ba hadia ia na ngawalö, ba solohe yomo ba Yeruzalema, ba luo sabato. Ba utegu ira na la'amawa hadia ia mbalazo. 16 Ba banua Diro andrö, si no fatewu khöra ba da'ö, ba la'ohe yomo gi'a ba hadia ia ngawalö waniaga, ba la'amawa ba niha Yehuda ba Yeruzalema, ba luo sabato. 17 Ba utahigö zalaŵa niha Yehuda, umane khöra: He moroi wa mosala manö ami, wa lö mi'amoni'ö luo sabato? 18 Hadia, tenga no lamanö göi ira tuami, si tobali börö wa ifatörö khöda ba ba mbanua andre wamakao andrö fefu Lowalangida? Ba ya'ami, ba minönö na wönu Lowalangi andrö ba Ndraono Gizeraeli, wolau salakha ba luo sabato! 19 Ba ha si'aikö ogömi ba mbawa göli, sara wongi lö sabato, ba uŵa'ö laduhö mbawa göli; ba u'oroi'ö na: lö tola lafuli labokai, irege no aefa luo sabato. Ba ufataro ösa nono matua andrö khögu, ba zinga mbawa göli, fa böi la'ohe yomo waniaga, ba luo sabato. 20 Ba baero mbanua Yeruzalema la'iagö saniaga ba samawamawa hadia ia ba kade, ba zi bongi, mato dua wongi. 21 Ba utegu ira, umane khöra: Hadia wa baero göli dumao-dao ami ba zi bongi! Na samuza tö, ba ufara'u'ö ami! Ba i'otarai da'ö, ba labato we'amöi na luo sabato. 22 Ba ube'e göi li ba Nono Lewi: lahaogö ira ba möi manaro ba mbawa göli ba we'amoni'ö luo sabato. Ba da'ö göi törö tödöu khögu, ya'ugö Lowalangigu, ba hakhösi tödö ndra'o, ba wa'ebua dödöu andrö, si no fahöna!

IV. Itenaŵa wangai ono niha baero

23 Ba me luo da'ö, ba möido göi mufaigi niha Yehuda andrö, si no mangai ira alawe [baero], banua Gasoto ba Iraono Gamoni ba Iraono Moabi. 24 Onora, ba matonga lalau li Gasoto, ba ma li soi no mege, ba lö la'ila li niha Yehuda. 25 Ba utahigö ira, u'elifi ira, ba ubago ösa ndra matua andrö ba udödöni mbura, ba ube'e ba hölu ira khö Lowalangi, umane: Böi mibe'e ba nonora matua nonomi alawe, ba böi mihalö umönömi, ba ma dongami, nonora alawe!! 26 Tenga no da'ö mbörö horö Zelomo, razo Ndraono Gizeraeli? Ba niha baero andrö fefu, ba no lö razo si mane ya'ia, ba no ibali'ö razo Ndraono Gizeraeli fefu ia Lowalangi, balazi wa'omasi Lowalanginia ia. Ba ya'ia göi, ba ira alawe baero zamowöhö, ba wamazökhi horö. 27 Ba iya'e, ba tarongo khömi, mosala sebua ami, sala andrö fefu, wamazökhi horö ba Lowalangida, me mihalö-halö ndra alawe baero? 28 Ba no umönö Zanabala andrö, banua Horona, nono Yoyada ono Geliasibi ere sebua; ba ufofanö da'ö, uheta ia ba ngaigu. 29 Törö-törö tödöu khöra, ya'ugö Lowalangigu, me no lalau zalakha ba gere ba ba nibe'e ömöra, ya'ira ere ba Ono Lewi! 30 Ba tobali uhaogö ira, uheta khöra huku niha baero fefu, ba uhonogöi halöŵö gere ba halöŵö Nono Lewi, hadia halöŵö zamösana, 31 ba he fame'e eu andrö, na inötö, awö zi a'a hadia ia. Törö-törö tödöu khögu [da'ö], ya'ugö Lowalangigu, ba zi sökhi!

Famotokhi ba gahe

Fabaliŵa lala

Olayama Nehemia: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö