1 Ba me no töra mendrua fakhe razo Belisasa, ba so gangilatagu bö'ö, ya'odo Danieli andre, me no aefa gangilata si sambua no.[1] 2 U'ila ba gangilata andrö, ba hulö ba gödo ba Zusa, ba danö Gelama, sodo, me u'ila; ba u'ila ba gangilata andrö, wa no ba mbewe Gula'i sodo.[2] 3 Ba me ufaöga hörögu, ba hiza mbiri-biri si matua, si dua rozi tandru, ba mbewe nidanö, ba si sara tandrunia sanau andrö, ba no anau na moroi ba zi sara; ba sanau andrö, ba safuria manöi.[3] 4 Ba u'ila, me fatandru mbiri-biri si matua andrö, tanö ba gaekhula luo ba miyöu ba miraya; ba lö saliŵa-liŵa ba danö sangila molaŵa ya'ia. Lö sangefa'ö ba wa'abölönia; ilau zomasi ia, ba itugu abölö sibai. 5 Ba me ufaigi sibai na, ba hiza nambi si matua, moroi ba gaekhula luo, itörö guli danö ma'asagörö, ba lö manandrösa ba danö gahenia; ba ba nambi andrö, ba sara dandru si tenga inötö fa'anau, ba mbörö nikhunia.[4] 6 Ba i'ondrasi mbiri-biri si matua andrö, si dua rozi tandru, niilagu mege, ba mbewe nidanö ba itandru, sofönu ia, ba a'oi dölania. 7 U'ila, wa no ngai mbiri-biri itandru; abao sibai dödönia ba i'olobigö ia ba mbiri-biri andrö, afatö dandru, ma'adua rozi, ibe'e; ba me no ambö wa'abölö mbiri-biri, ba wolaŵa ya'ia, ba ituli'ö tou ba ihundra-hundra, ba lö sangefa'ö biri-biri ba wa'abölönia andrö. 8 Ba itugu abölö sibai nambi andrö, ba me no irugi wondrege wa'abölönia, ba afatö dandru sanau andrö, ba öfa zi tumbu tandru bö'ö ba nahania, miraya ba miyöce ba tanö ba gatumbukha luo, ba tanö ba gaekhula. 9 Ba ba zi sara, ba tumbu dandru side-ide, sanöínöi sibai miraya ba tanö ba gatumbukha luo ba tanö ba wondrege zi sökhi tanö andrö.[5] 10 Ba ilaŵa ngahönö ba mbanua si yaŵa, ba atoru ösa ibe'e, ba döfi ösa atoru ba danö ba ihundra-hundra. 11 Ba he salaŵa ngahönö andrö, ba ilaŵa; tobali lö'ö sa'ae labe'e ba da'ö zumange, nibe'e-be'e khönia mege, ba ladudugö naha ni'amoni'ö khönia.[6] 12 Ba börö golalöŵa andrö, wa no ngahönö nilulu, fabaya sumange andrö, sero ma'ökhö; ba ituli'ö tou zi duhu, ba mofozu wolaunia. 13 Ba urongo zihede, ni'amoni'ö, ba ni'amoni'ö bö'ö zanofu khö zihede andrö, imane: Ha wa'ara gangilata andrö, fa'atebato zumange andrö, nibe'e-be'e mege ba fanao horö andrö, götö wa no ilulu nihundra-hundra naha ni'amoni'ö andrö, awö ngahönö andrö? 14 Ba itema linia, imane: Dua ngahönö a tölu ngaotu wongi, ba te'azökhi zui naha ni'amoni'ö andrö.
II. Eluaha gangilata andrö
edit15 Ba me no u'ila gangilata andrö, ya'odo Danieli, ba me u'alu-alui hadia geluahania, ba hiza niha, ba gametahögu, ira matua wamaigigu. 16 Ba urongo li niha, si otarai nungo Gula'i, mu'ao ia, imane: He Gaberieli! ombakha'ö khönia andrö geluaha gangilata andrö![7] 17 Ba so ia, i'iagö ba ngaigu, ba tokea ndra'o, me so ia, ba ufalögu tou ndra'o. Ba imane khögu: Fondrondrongo, ono niha, me ba götö safuria dania itörö gangilata andrö.[8] 18 Ba me fahuhuo ia khögu, ba tobali hulö zi ono matelö ndra'o, si no telögu tou ba danö; ba ituyu ndra'o, ifazizio ndra'odo, ba zi sodo mege. 19 Ba imane khögu: Da'u'ombakha'ö khöu, he wisa dania, na alö sa'ae wönu Lowalangi, me no ba götö safuria tetandrösaigö ia. 20 Biri-biri si matua andrö, ni'ilau, si dua rozi tandru, ba no razo Ndrawa Media, fabaya Dawa Weresia. 21 Ba nambi si matua andrö, sanau bu, ba no razo Ndrawa Heleni. Ba tandrunia andrö, sanau, ba mbörö nikhu, ba ya'ia zi a'a razora. 22 Ba fa'afatönia, awö wa no öfa rozi zi tumbu ba nahania, ba öfa gamatöröŵa dania zi so barö mbawania mege, lö lai wa sambö fa'abölö dania ira, moroi khönia mege.
III. Ba zi sambua dania maoso zamufu naha ni'amoni'ö, ba nifakiko dania ia
edit23 Ba ba gamozua wa'asalaŵara dania, na no lafönui zu'a-su'a sanao horö andrö, ba so zalaŵa safaito, sangila köiköi fefu. 24 Sabölö sibai ia dania, ba tenga sa fa'abölö si to'ua khönia; famakiko si tenga inötö ilau, ba sofozu wolaunia; sabölö ifakiko, ba tödönia dania, ena'ö i'ila ihori ni'amoni'ö andrö. 25 Ba falimosa andrö, nifakhainia, ba mofozu, si fayaŵa ia ba ato ifakiko, si lö mudöna-döna, ba ilaŵa Wondrege zalaŵa, ba nirasa dania ia, ba tenga moroi ba danga [niha].[9] 26 Ba angilata andrö, nifa'ele'ö — ha uga bongi ia — ba no si ndruhu; ba ya'ugö, ba böi ombakha'ö gangilata andrö, me no ba götö saröu mitou dania tetandrösaigö.[10] 27 Ba ya'odo, Danieli, ba mofökhö, ha uga bongi. Ba aefa da'ö, ba ifuli abe'e ndra'o, ba u'ila uhalö halöŵögu khö razo; ba no sahöli-höli sibai tödö ndra'o ba gangilata andrö, lö lai wa lö aboto ba dödögu ia.
Famotokhi ba gahe
editFabaliŵa lala
editOlayama Danieli: 1 • 2 • 3 • 4 • 5 • 6 • 7 • 8 • 9 • 10 • 11 • 12
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö