I. Fangifi Danieli
edit1 Ba me lö döfi na razo Mbabeli Belisasa, ba mangifi Danieli, so gangilata hörönia, ba gasonia. Ba itanö ba zura wangifi andrö, tuhonia.[1] 2 Humede Danieli, imane: Ni'ilagu ba zi bongi ba wangifigu, ba ilabu angi, isaŵa nasi sebua, öfa nangi mbanua si yaŵa.[2] 3 Ba so moroi tou ba nasi zaliŵa-liŵa ba danö sebua sibai, öfa nga'eu ba no fazambuzambua. 4 Si föföna, ba no hulö zingo, ba no mo'afi moyo. Ba ufaigi-faigi manö ia: ba tedeha gafinia ba tefasindro ia, moroi ba danö, tefazizio ba gahenia si dua, hulö niha ba tebe'e khönia dödö niha.[3] 5 Ba aefa da'ö, ba so zageu tö, dua geu, möi da'ö, ba si hulö mberua da'ö; ba si tambainia, ba no sisindro, ba ba mbawania, ba tölu rozi döla nosu, ba nifönia, ba so zanguma'ö khönia: Labu, oya'ö wemanga nagole hadia ia![4] 6 Ba ufaigi, ba oroma zageu tö, si hulö harimo, ba öfa gafi wofo ba hulunia; ba öfa göi högönia, ba no mube'e khönia wa'abölö.[5] 7 Ba aefa da'ö, ba u'ila ba gangilatagu ba zi bongi, ba sageu tö zi so moroi tou sata'u ita ba sihokha mbuda, ba sabölö sibai. Si'öli nifönia, sebua sibai; i'aga'aga gönia ba ibohagö; ba si tosai, ba ihundrahundra tou. Ba no faehu ia ba da'ö no mege fefu, ba fulu rozi dandrunia.[6] 8 Ba utöngö sibai dandru andrö, ba hiza dandru bö'ö side-ide si tumbu ba gotalua, ba tölu rozi nideha tandru no mege, si föföna, börö zide-ide andrö; ba hiza, ba si so hörö dandru andrö, hulö hörö niha; ba noa göi mobawa solau fayaŵasa.
II. Angilatania: fanguhuku ösi guli danö ba fa'salaŵa Nono Niha andrö
edit9 Ba ufaigi-faigi, irugi tefedadao ba da'ö dadaoma zalaŵa ba irege dumadao "zatua andrö," si no arara: barunia, ba no si takile, afusi, fa'afusi mbetua, ba bunia, ba no timba zi ndruhu mbu mbiri-biri, ba dadaomania, ba hola-hola galitö, ba no moroda alitö sihola-hola.[7] 10 Ba hulö zahele misa galitö, sebua, si otarai ia; mehönö wa hönö ngoni-ngoninia, ba mewulu ngahönö wa fulu ngahönö zi so ba ngainia. Ba dumadao zanguhuku ba labokai zura.[8] 11 Ba ufaigi-faigi manö — börö wayaŵasa andrö, huhuo dandru andrö, sebua li — ufaigi-faigi manö, irege labunu zaliŵa-liŵa ba danö andrö, ba irege lafakiko mbotonia, ba irege latibo'ö ba galitö si hola-hola.[9] 12 Ba he ba nawönia saliŵa-liŵa ba danö andrö, ba teheta wa'abölö, ba te'ötö khöra mbongi ba inötö, ha wa'anau nosora. 13 Ba ni'ilagu na ba gangilata andrö, ba zi bongi, ba so moroi sa, ba lawuo ba mbanua si yaŵa, zi hulö niha, ba irugi zatua no mege, te'ohe khönia.[10] 14 Ba ba da'ö tebe'e sa'ae wa'abolo ba fa'ebua döi ba fa'asalaŵa: enoninia niha fefu, ha soi ira ba hadia ngawalö lira; ba fa'abölönia andrö, ba sirugi si lö aetu ba si lö tebulö, ba amatöröŵania andrö, ba lö'ö manö adudu.[11]
III. Eluaha zaliŵa-liŵa ba danö andrö, si öfa ngaeu
edit15 Ba ya'o, Danieli, ba sabu sibai bakha tödö; tobali dödögu ibe'e angilata hörögu andrö. 16 Ba u'ondrasi zamösa, si so ba da'ö, ba u'andrö khönia, ena'ö i'ombakha'ö khögu zi ndruhu geluaha da'ö fefu. Ba itema ligu, i'ombakha'ö khögu geluaha ni'ilagu andrö, imane: 17 Saliŵa-liŵa ba danö andrö, sebua sibai, si öfa nga'eu, ba daöfa dania razo ba guli danö; 18 ba ni'amoni'ö andrö khö Wondrege zalaŵa dania zanema fa'asalaŵa, ba khöra manö dania lö tebulö, götö-götö wa'ara. 19 Ba omasido, na urongo geluaha zaliŵa-liŵa ba danö andrö, fanete zi tölu, si no faehu ba nawönia andrö, fefu, ba sata'u sibai ita, si so ifö si'öli ba sa'a töla garamba, si manga-manga gönia ba samohagö, ba si hundrahundra tou si tosai, 20 ba eluaha dandru andrö si fulu, ba högönia, ba eluaha dandru si sara andrö, si tumbu [ba gotalua], ba zabo'a si tölu rozi, tandru andrö, si so hörö ba si so bawa, si so huhuo fayaŵasa, ba si no aröu ebua moroi ba nawönia, wamaigida. 21 Ba noa göi u'ila: Isuwö ni'amoni'ö andrö tandru andrö, ba ya'ia zabölö,[12] 22 ba ba gafuriata ba so "zatua" no mege, ba te'ohe ba lala huhuo niha ni'amoni'ö andrö khö Wondrege zalaŵa, ba inötö sa'ae, wa möi ba ni'amoni'ö andrö wa'asalaŵa. 23 Ba imane khögu: Saliŵa-liŵa ba danö andrö, fanete si tölu, ba no amatöröŵa fanete zi tölu, si no faehu ba gamatöröŵa bö'ö fefu, si tumbu ba guli danö dania, ba i'a danö ma'afefu ba ihundrahundra ba ifufu. 24 Ba tandru andrö si fulu rozi, ba dafulu dania razo ba gamatöröŵa andrö, ba aefa da'ö, ba so zamösa tö, si faehu ba zi so mege, fönania, ba datölu itimba razo.[13] 25 Ba ilau huhuo fayaŵasa khö Wondrege zalaŵa, ba ifakao ni'amoni'ö andrö khö Wondrege zalaŵa; iwai dania tola iwu'ai ginötö ba oroisa; ba döfi ba mendrua fakhe ba matonga ndröfi tebe'e dangania ira.[14] 26 Ba dumadao sa dania zanguhuku; ba teheta khönia wa'abölönia, adudu ba afufu, si maulu. 27 Ba tebe'e sa'ae dania ba niha ni'amoni'ö khö Wondrege zalaŵa wa'asalaŵa ba fa'abe'e ba fa'abölö, ba gamatöröŵa andrö, ba guli danö ma'asagörö; amatöröŵania, ba amatöröŵa si lö tebulö, götö-götö wa'ara, ba tobali ngoni-ngoninia zalaŵa fefu, barö mbawania ira. 28 Awai ni'ombakha'önia khögu. Ba ya'odo, Danieli, ba si tobali tödö, afusi mbawagu; ba utanö ba dödögu da'ö no mege.
Famotokhi ba gahe
edit- ↑ Faigi 2:29
- ↑ Yes 17:12
- ↑ Yer 4:7; Faigi 2:13
- ↑ Faigi 5:28; 8:3
- ↑ Faigi 8:5,21,22
- ↑ Faigi 2:40,41
- ↑ Hez 1:16; Mat 19:28; Fam 20:4
- ↑ Sin 68:18; Fam 4:5; Fam 20:12
- ↑ Fam 19:20
- ↑ Hez 1:26; Mark. 13:26; HalZin 1:11; Fam 1:13; 14:14
- ↑ Sin 2:6; 110:2; Faigi 2:44; Fil 2:9
- ↑ Fam 11:7; 13:7
- ↑ Fam 17:12
- ↑ Faigi 12:7; Fam 12:14; 13:5
Fabaliŵa lala
editOlayama Danieli: 1 • 2 • 3 • 4 • 5 • 6 • 7 • 8 • 9 • 10 • 11 • 12
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö