Wb/nia/Danieli/1

I. Te'ohe ba Mbabeli Danieli ba awönia andrö si datölu

1 Me no alua mendrua fakhe razo Yoyaki andrö, razo mado Yuda, ba so Nebukanesa, razo Mbabeli, möi ia ba Yeruzalema, ba wanuwö ya'ira. 2 Ba ibe'e ba dangania Yoyaki razo mado Yuda So'aya, awö gama-gama ba nomo Lowalangi ösa, ba i'ohe ba danö Zineara, ba gosali Lowalanginia, ba gama-gama andrö, ba ibe'e ba mbate'e girö-girö andrö khö Lowalanginia. 3 Ba ibe'e li razo khö Asifena, mandru genoni yomo, ena'ö ifaigi ba Ndraono Gizeraeli nga'ötö razo, awö nga'ötö zalaŵa, 4 ono matua si lö si sala [ba mbotora] ba si no mufahaö ba sangila watahögö ba si so fa'aboto ba dödö, si nangea möi ngoni-ngoni razo, ba gödo, ba ena'ö na ifahaö ira ba wanura ba ba li Ndrawa Galedaia. 5 Ba iŵa'ö razo göra ma'ökhö, föfö gö razo ba föfö nagu nibadu-badunia, ba ibe'e li, medölu fakhe wa'ara la'e'ebua ira, ba na aefa da'ö, ba möi ira ngoni-ngoni razo. 6 Ba ya'ira göi mado Yuda andrö, ira Danieli, Hanania, Mizaeli ba Asaria. 7 Ba ifalalini döira mandru genoni yomo: Töi Danieli, ba Belizasari, ba töi Hanania ba Saderakhi, ba töi Mizaeli, ba Mezakhi ba töi Asaria ba Abedo-Nego ibe'e.

II. Lö i'a gö salakha Danieli

8 Ba iŵa'ö sibai tödönia Danieli, lö ihalö salakha khönia wemanga gö razo, ba he famadu agu andrö, föfö nibadu-badu razo. Ba i'andrö khö mandru genoni yomo, ena'ö alakha lö ihalö salakha khönia. 9 Ba falukha wa'ebua dödö ba fa'ahakhö dödö Danieli, khö mandru genoni yomo, ibe'e Lowalangi; 10 ba imane zui mandru andrö khö Danieli: Soso dödögu, ma dania safuofuo ami, moroi ba nono matua bö'ö, si faziazia'a khömi, wamaigi zokhö ya'o, razo, sanguma'ö gömi, andrö, ba ma ifabunu'ö dania ndra'ö razo, börö ami! 11 Ba imane Danieli khö mandru zame'e-me'e gö, nibe'e mandru genoni yomo barö mbawa ira Danieli, Hanania, Mizaeli ba Asaria: 12 Tema tandraigö ba genoniu andre, fulu bongi, ena'ö ha sambalö sinanö labe'e öma, ba idanö, nibadu. 13 Ba hana na öfaigi dania, he wisa nösima ba he wisa nösi nono matua si manga-manga wöfö gö razo; ba heza zi faduhu dödöu dania, ba da'ö ölau ba genoniu. 14 Ba i'o'ö ni'andröra, ba itandraigö fulu bongi. 15 Ba me no aefa zi fulu bongi, ba no sökhi nösira ba no esolo ira, moroi ba nono matua andrö fefu, si manga-manga wöfö gö razo. 16 Ba i'otarai da'ö, ba ifaheta'ö mandru same'e-me'e gö göra andrö ba agu andrö, ba sinanö ibe'e öra. 17 Ba ibe'e ba nono matua andrö si daöfa Lowalangi wangila watahögö ba fa'aboto ba dödö ngawalö zura fefu, awö ngawalö wa'atua-tua; ba Danieli, ba i'ila göi geluaha gangilata ba eluaha wangifi fefu.

III. Fa'omasi razo nono matua andrö

18 Ba me no irugi inötö niŵa'ö razo, ba wama'ele'ö ya'ira khönia, ba ifa'ele'ö ira khö Nebukanesa mandru genoni yomo. 19 Ba me fahuhuo khöra razo, ba lö ba khöra fefu si mane ira Danieli, Hanania, Mizaeli ba Asaria; ba möi ngoni-ngoni razo ira. 20 Ba ero na balazi wa'atua-tua ba fa'aboto ba dödö, ba isöndra razo — ero na izofu-zofu khöra — mewulu latalu'i zebua elemu ba si faeta fefu, ba mbanuani, fefu. 21 Ba Danieli, ba lö si mate na, me awena tobali razo Kiro.

Famotokhi ba gahe

Fabaliŵa lala

Olayama Danieli: 1 • 2 • 3 • 4 • 5 • 6 • 7 • 8 • 9 • 10 • 11 • 12

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö