I. Ibe'e goroisa Dario wa ha khö razo mangandrö niha edit
1 Ba Dario, Dawa Media, zi tobali razo, me no 52 fakhe, wa'atuania. 2 Ba omasi Dario andrö, 120 ifataro kumandru, ba gamatöröŵania ma'asagörö, ifosasi. 3 Ba datölu ibe'e högöra tua sebua, samösa Danieli, ena'ö la'ombakha'ö ba da'ö kumandru andrö, he wisa, fa böi manö te'ala razo. 4 Ba högö zui Danieli, högö dua sebua andrö, ba högö gumandru fefu, me no so khönia Geheha sebua; ba tödö razo sa'ae: ibe'e barö mbawa Danieli gamatöröŵania ma'asagörö. 5 Ba la'alui sibai ira tua sebua andrö, awö gumandru, nibe'e esuanö Danieli ba halöŵönia famatörö andrö. Ba lö lasöndra hadia ia gesuanö, ba he hadia ia zi lö sökhi, me no lö falimosa khö Danieli, ba he fa'areu ba he bö'önia si lö sökhi, ba lö lasöndra khönia. 6 Ba lamane niha andrö: Lö tasöndra mbörö khö Danieli andrö, na tenga ba wolo'önia oroisa Lowalangira. 7 Ba mangandrö sibai ira khö razo, ira tua sebua andrö, awö gumandru, lamane khönia: He razo Dario! Ya si lö aetu nosou![1] 8 No mamagölö ndra tua sebua fefu ba gamatöröŵamö, ba satua ba kumandru ba ira anofulamö ba kumandra, ena'ö ibe'e goroisa razo ba ena'ö ifeta'u niha: dozi ira, na so zangandrö hadia ia, he khö Lowalangi, ba he ba niha, na tenga khöu, ya'ugö razo, 30 wongi wa'ara, ba nitibo'ö ba lösu-lösu, nahia zingo. 9 Ba iya'e, ya'ugö razo, ba be'e goroisa andrö, ba fa'ohe'ö zura, sura goroisa, si tebai awu'a, dali lala goroisa andrö ba Ndrawa Media ba ba Ndrawa Weresia, si tebai lawu'ai.[2] 10 Ba ifasura'ö goroisa andrö, awö wameta'u no mege razo Dario.
II. La'adugö Danieli si fa'udu khönia ba tetibo'ö ba lösu-lösu nahia zingo ia edit
11 Ba me irongo Danieli, wa no mube'e goroisa andrö, ba möi ia ba nomonia, ba no teboka zandrela ba mbate'e ba zi sagötö khönia, si otahögö Yeruzalema; ba medölu ma'ökhö ibalöduhini tou zalo, mangandrö ia khö Lowalanginia ba isuno Lowalangi, lö ibulö'ö zi no to'ölö ia.[3] 12 Ba fagohi moroi tou niha no mege ba la'ila, me mangandrö Danieli ba fakaosania khö Lowalangi. 13 Ba möi ira khö razo ba lasofu khönia, ba goroisania andrö, lamane: Hadia, tenga no öbe'e goroisa nitanö ba zura, wa nitibo'ö ba lösu-lösu nahia zingo dozi sangandrö hadia ia, he khö Lowalangi, ba he ba niha, na tenga khöu, ya'ugö razo, 30 wongi wa'ara? Ba itema lira razo, imane: Ya'ia, no muhonogöi da'ö, dali goroisa ba Ndrawa Media ba ba Ndrawa Weresia, si tebai awu'a. 14 Ba lamane khö razo: Ba Danieli andrö, awö ni'oloi'ö andrö, Niha Yehuda, ba no i'ositengagö ndra'ugö, ya'ugö razo, ba he oroisa andrö, nibe'eu; medölu ma'ökhö mangandröngandrö ia. 15 Ba me irongo da'ö razo, ba abu sibai dödönia, ba i'alu-alui tödönia, he iwisa wangorifi Danieli; irugi aekhu, luo i'alui lala, ba wangefa'ö ya'ia. 16 Ba laforege khö razo niha no mege, lamane khönia: Böi zi lö aboto ba dödöu, ya'ugö razo, wa no huku ba Ndrawa Media ba ba Ndrawa Weresia, wa tebai awu'a na so nitenaŵa razo, ba he ni'oroi'önia, fefu gofu hadia ia! 17 Awena ibe'e li razo, lahalö Danieli, ba wanibo ba lösu-lösu nahia zingo. Ba humede razo, imane khö Danieli: Yamu'orifi'ö Lowalangimö andrö, nifosumangeu, si lö mamalö-malö! 18 Ba la'ohe gowe, duhöduhö mbawa lösu-lösu andrö, ba ifotandro razo, tandronia ba tandro nawönia salaŵa, ena'ö böi awu'a nihuku andrö ba khö Danieli.[4] 19 Ba möi ba gödonia razo, ba mamoni ia ba zi bongi andrö; lö ifa'amöi si bakha ndra alawe; ba lö alau hörönia.
20 Ba me moluo, me afusi wali, ba maoso razo, ba i'aliogö isaŵa lösu-lösu nahia zingo. 21 Ba me lö aröu tö irugi lösu-lösu, ba mu'ao ia khö Danieli, timba ze'e. Humede razo, imane khö Danieli: He Danieli, enoni Lowalangi sauri andrö, hadia, no i'ila itimba khöu zingo andrö Lowalangiu andrö, nifosumangeu, si lö mamalö-malö? 22 Ba humede Danieli, imane khö razo: He razo! Ya si lö aetu nosou! 23 No ifatenge mala'ika khönia Lowalangigu, ba no ikusi mbawa zingo, fa böi labunu ndra'o, me no lö horögu i'ila, ba he khöu göi, ya'ugö razo, ba lö lalögu.[5] 24 Ba omuso sibai dödö razo, ba iŵa'ö lahalö yaŵa Danieli, moroi ba lösu-lösu. Ba me lahalö yaŵa ia, ba ma'ifu lö lasöndra sesokho ia, me no abe'e dödönia khö Lowalanginia. 25 Ba iŵa'ö razo, latibo'ö ba lösu-lösu nahia zingo niha andrö, sangadugö Danieli mege. Ba la'ohe ba latibo'ö si tou, fabaya fo'omora ba iraonora; ba lö sikoko ira ba doyo lösu-lösu, ba lara'u sa'ae ira singo, ba larasa dölara fefu.
26 Ba ifa'ohe'ö zura razo Dario, ba niha fefu, ha soi ira ba hadia ngawalö lira, ba guli danö misa, ma'asagörö, imane: "Ya ahowu ami![6] 27 Da'ö niŵa'ögu khömi: ba gamatöröŵagu ma'asagörö, ba khö Lowalangi Danieli manizi-nizi ami ba ya'ia mi'ata'ufi. Me no ya'ia Lowalangi sauri, si lö tebulö, irugi zi lö aetu; amatöröŵania, ba no si tebai adudu, ba fa'asalaŵania, ba si lö aetu.[7] 28 I'ila i'orifi niha ba i'ila i'efa'ö, ifazökhi dandra ba ilau zahöli-höli dödö, ba mbanua si yaŵa ba ba guli danö tou, ya'ia andrö, si no mangefa'ö Danieli ba wa'abölö zingo andrö". 29 Ba Danieli andrö, ba sohahau tödö, barö mbawa Dario andrö, ba he barö mbawa Giro, Dawa Weresia andrö, dania.[8]
Famotokhi ba gahe edit
Fabaliŵa lala edit
Olayama Danieli: 1 • 2 • 3 • 4 • 5 • 6 • 7 • 8 • 9 • 10 • 11 • 12
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö