I. Sura Nebukanesa edit
1 "Ya'odo Nebukanesa ba no sosodo ba nomogu lö fangabu dödö, ha sambalö fa'ohahau dödö khögu ba gödogu. 2 Ba mangifi ndra'o ba tobali dödögu ba tokeado ibe'e era-eragu ba gasogu ba angilata hörögu andrö. 3 Ba ube'e li, la'ohe khögu zonekhe-nekhe ba Mbabeli, fefu, ena'ö la'ombakha'ö khögu geluaha wangifigu andrö. 4 Ba so zebua elemu ba si faeta ba Dawa Galedaia andrö ba sangila eluaha ndröfi, ba utunö khöra wangifigu andrö; ba lö la'ila la'ombakha'ö khögu geluahania.[1] 5 Ba ba gafuriata, ba so Danieli andrö, sotöi Belizasari, wangohia'ö töi Lowalangigu andrö, ba si so Eheha Lowalangi, ni'amoni'ö, ba utunö khönia wangifigu, umane:
II. I'ombakha'ö khö Danieli wangifinia: eu sebua andrö, sebua sibai edit
6 He Belizasari högö zebua elemu, si so Eheha Lowalangi ni'amoni'ö, u'ila, ba sangila mamokai si no tobini, fefu, fondrondrongo ni'ilagu ba wangifi, ba ombakha'ö khögu geluahania! 7 Angilata hörögu, ba gasogu, ba ufaigi, ba hiza geu sebua sibai, ba dalu danö.[2] 8 Ba tedou-dou wa'ebua geu andrö ba fa'esolonia; irugi mbanua si yaŵa hogunia, ba irugi ba wondrege danö oroma ia. 9 Bulunia, ba no si sökhi ba buania, ba no fahöna, dozi niha zanöndra göra khönia; mörö-mörö ba mbörönia zaliŵa-liŵa ba danö, ba lumö, ba ba ba ndrahania, ba mangazuni wofo ba dalu mbanua, ba ba khönia lasöndra göra fefu zonoso. 10 Ba u'ila ba gangilata hörögu andrö, ba gasogu, ba hiza moroi yaŵa ba mbanua si yaŵa zanaro ni'amoni'ö; mu'ao ia, 11 ibe'e li, imane: Mi'obö ge'u andrö ba mitunga ndrahania; miburusi mbulu ba mifazawili mbua! Ena'ö moloi zaliŵa-liŵa ba danö ba mbörönia, ba he fofo ba ndrahania. 12 Ba börönia, ba niröi ba danö, ba nirate, rate si'öli ba töla, ba mbenua, ena'ö hambunö ia ia namo mbanua, ba ena'ö i'aga'aga ndru'u ba danö, awö zaliŵa-liŵa ba danö. 13 Tödö niha andrö khönia, ba niheta khönia, ba tödö zaliŵa-liŵa ba danö nibe'e khönia, ba mewitu fakhe wa'ara da'ö khönia. 14 Nihonogöi zanaro andrö da'ö, ba no oroisa ni'amoni'ö andrö ba da'ö, ena'ö aboto ba dödö niha sauri, wa no ba danga Wondrege zalaŵa so wa'asalaŵa niha ba ibe'e khö zomasi ia, awö wa i'ila göi ifataro salaŵa wondrege zide-ide.[3] 15 Da'ö wangifi andrö, me mangifi ndra'odo, ya'odo, razo Nebukanesa; ba ya'ugö, Belizasari, ba hadia geluahania? Fefu zonekhe-nekhe ba danögu, ba lö'ö sa la'ila la'ombakha'ö khögu geluaha; ba ya'ugö zangila, me no so khöu Geheha Lowalangi andrö, ni'amoni'ö."
III. I'ombakha'ö geluahania Danieli: fa'owöhö Nebukanesa dania edit
16 Ba tobali dödö Danieli, sotöi Belizasari, ara ma'ifu, abu dödönia, me mangera-era ia. Ba humede razo, imane: He Belizasari, böi tobali dödöu ba wangifi andrö, ba ba geluahania! Ba itema linia Belizasari, imane: He Tua! Ena'ö na si fatiu tödö khöu dandrösa wangifi andrö, ba ena'ö na ba nemaliu tetandrösaigö geluahania! 17 Eu andrö, ni'ilau, salaŵa ba sesolo, sirugi ba mbanua si yaŵa hogu ba soroma irugi ba wondrege danö fasui, 18 si sökhi bulu ba si no fahöna bua, irege lasöndra göra dozi si möi khönia, ba zonahia zaliŵa-liŵa ba danö, ba lumö, ba ba zangazuni fofo, ba ndraha, ba ya'ugö da'ö, ya'ugö razo, 19 sebua ba sabölö, si no tedou-dou fa'ebua, irugi ba mbanua si yaŵa ba sirugi ba wondrege danö fa'abölö. 20 Ba fangila razo, wa so moroi yaŵa zanaro ni'amoni'ö, sanguma'ö: Mi'obö geu andrö ba mikhökhö, ba börönia, ba miröi ba danö ba mirate, rate si'öli ba töla, ba mbenua, ena'ö hambunö ia namo mbanua, ba ena'ö i'a wöfö gö zaliŵa-liŵa ba danö, irugi mewitu fakhe, 21 ba da'ö geluahania, ya'ugö razo, — no nihonogöi Wondrege zalaŵa, nifatörö khö zokhö ya'o razo — 22 latibo'ö dania ndra'ugö niha, ba ba zaliŵa-liŵa ba danö nahiau dania: bulu ndru'u labe'e öu, föfö gö zaŵi, ba si hambunö namo mbanua ndra'ugö, mewitu fakhe wa'ara khöu da'ö, irege aboto ba dödöu, wa no ba danga Wondrege zalaŵa so wa'asalaŵa niha, ba i'ila ibe'e ba zomasi ia.[4] 23 Ba oroisa andrö, wa lö labulö'ö ba danö mbörö geu andrö, ba eluahania, ba si lö tebulö khöu wa'arazomö; ha si'aikö aboto ba dödöu, wa no abölö zorugo. 24 Ba andrö, ya'ugö razo, fondrondrongo niŵa'ögu khöu: salahini horöu andrö fa'atulö dödö, ba olalöŵamö, ba salahini fa'ahakhö dödöu zi numana, ma atö ara dania wa'ohahau dödöu.
IV. Itörö edit
25 Ba itörö razo Nebukanesa da'ö fefu. 26 Döfi aefa da'ö no mege, ba samuza ma'ökhö, ba manörö-nörö razo ba dete gödonia. 27 Ba humede ia, imane: Hadia, tenga Babeli sebua andrö da'e, nitaru'ögu banua razo, ba wa'abölögu, si no maulu, ba ba wangebua lakhömigu! 28 Ba lö saetu na ba mbewe razo niŵa'önia andrö, ba so li si oroi mbanua si yaŵa, imane: Da'ö niŵa'ö khöu, ya'ugö razo Nebukanesa: no aheta khöu wa'asalaŵamö, 29 latibo'ö sa'ae ndra'ugö awöra niha, ba ba zaliŵa-liŵa ba danö nahiamö dania. Bulu ndru'u, föfö gö zaŵi, labe'e öu, ba mewitu fakhe wa'ara da'ö khöu, irege aboto ba dödöu, wa no ba danga Wondrege zalaŵa so wa'asalaŵa niha, ba i'ila ibe'e ba zomasi ia. 30 Ba i'anema'ö itörö Nebukanesa niŵa'ö andrö: latibo'ö ia banuania ba tobali i'aga'aga mbulu ndru'u, föfö gö zaŵi, ba hambunö ia namo mbanua, irege anau mbunia, timba mbu moyo, ba sa'ania, ba tobali timba za'a wofo.
V. Faduhu dödö Nebukanesa edit
31 Ba me no irugi inötö andrö, ba maoso ndra'o, ya'odo Nebukanesa, ufaöga hörögu ba ifuli motödö ndra'o; ba u'andrö saoha gölö khö Wondrege zalaŵa ba usuno zauri irugi zi aetu ba u'ebua'ö döinia, töi zi so fa'abölö si lö aetu, ba fa'asalaŵania, ba götö-götö wa'ara. 32 Faya manö fefu niha ba guli danö; somasi ia ba ilau, he ba ngahönö andrö ba mbanua si yaŵa, ba he ba niha ba guli danö; ba samösa lö sangila manenaŵa ya'ia, si tola manguma'ö khönia: Hadia nilaumö?[5] 33 Ba i'anema'ö ifuli motödö ndra'odo ba usöndra mangawuli wa'ebuagu föna, awö lakhömigu, fangebua döi wa'asalaŵagu. La'alui ndra'o ira anofulagu ba awögu salaŵa, ba ifuli tefataro razo ndra'odo, ba tebe'e khögu wa'abölö, si tedou moroi me föna. 34 Ba iya'e, ba manunö ndra'o ba u'andrö saoha gölö, ba usuno razo ba zorugo. No si ndruhu wolaunia fefu, ba he lala andrö khönia, ba no satulö, ba sanörö lala hokha, ba i'ila ihöndrögö.
Famotokhi ba gahe edit
Fabaliŵa lala edit
Olayama Danieli: 1 • 2 • 3 • 4 • 5 • 6 • 7 • 8 • 9 • 10 • 11 • 12
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö