Wikimedia Incubator

Wb/nia/Turia Somuso Dödö/Mareko/3

< Wb | nia | Turia Somuso Dödö | Mareko
Wb > nia > Turia Somuso Dödö > Mareko > 3

Ifadöhö zi mate tanga

edit

1 Ba ifuli möi ba zekola. Ba so ba da'ö niha si no mate tanga,[1] si sara. 2 Ba lafaigi-faigi ia, na ifadöhö ba luo sabato, ba wangadugö ya'ia. 3 Ba imane ba niha andrö, si no mate tanga: Faoso, ae ba da'e! 4 Ba imane khöra: Hadia, tola lalau zi sökhi ba luo sabato, ba ma si lö sökhi, tola la'orifi niha, ma labunu?[2] Ba lö hede-hedera. 5 Ba ifaigi ira, fasui, mofönu ia, abu dödönia ba wa'abe'e dödöra, ba imane ba niha no mege: Oro'ö dangau! Ba i'oro'ö, ba döhö wökhö dangania.

Ifadöhö ngawalö wökhö ba zinga mbaŵa

edit

6 Ba ladölö ira baero farizaio, mamagölö ira ba zi fao-fao khö Herode, ba khönia andrö, ba wamunu ya'ia.[3]

7 Ba iheta ia Yesu, awö nifahaönia, isaŵa mbaŵa,[4] ba ato niha solo'ö ya'ia, banua Galilaia ba banua Yudaia, 8 ba banua Yeruzalema ba banua Gidumaia ba moroi ba zi tambai Yoridano ba moroi ba zi fasui Diro ba Sidona, ato niha, me larongo nilaunia fefu, ba la'ondrasi ia.

Ifaha'ö niha sato Yesu moroi ba dundraha (faigi Mareko 4:1)

9 Ba iŵa'ö ba nifahaönia, ena'ö lahönagö lafaigi dundraha khönia, ba wa'ato niha, fa böi lalangögö ia. 10 Ato sa nifadöhönia fökhö, tobali lafadege ira khönia dozi si so safökhö, ba wombambaya ya'ia.[5]

11 Ba bekhu si ra'iö andrö, na la'ila ia, ba latuhi danö, fönania, mu'ao ira, lamane: Ono Lowalangi ndra'ugö![6] 12 Ba itenaŵa sibai ira, fa böi la'ombakha'ö ia.[7]

Ituyu nifahaö si felendrua

edit

13 Ba möi ia ba hili, humede ia ba zomasi ia, ba la'ondrasi.[8]

Isasai gahe ndra nihafa'önia Yesu, ba zibongi fatua lö lara'u ia ba laforöfa

14 Ba i'oniagö zi felendrua, ena'ö awönia ira ba ena'ö ifatenge ira ba wangombakha,[9] 15 ena'ö tetehe khöra wamofanö bekhu andrö. 16 I'oniagö zi felendrua andrö, ibe'e töi Zimoni andrö Wetero, 17 awö Yakobo, ono Zebedaio, ba Yohane, talifusö Yakobo, ba ibe'e töi zi darua andrö Mboaneregesi, — ono we'ugu-ugu mbanua geluahania;[10] 18 ba Andrea ba Filifo ba Batolomaio ba Mataio ba Toma ba Yakobo, ono Galifaio andrö, ba Tadaio, ba Simoni Kananaio, 19 ba Yuda, banua Kariota, si manga mbölinia andrö.

Edöna lara'u ia ira talifusönia

edit

20 Ba möi ia yomo. Ba owulo zui niha sato, tobali tebai na i manga ira.[11]

21 Ba me larongo da'ö talifusönia, ba möi ira mondra'u ya'ia, noa sa owöhö ia, laŵa'ö.[12]

Fabu'ali ia khö ndra sangila amakhoita

edit

22 Ba lamane sangila amakhoita andrö,[13] si no möi mitou moroi ba Yeruzalema: No so khönia Mbelesebu, ba moroi ba zalaŵa mbekhu andrö, wa ifofanö mbekhu.[14]

23 Ba ifalukha'ö ira, iŵa'ö khöra gamaedola, imane: He wisa ifofanö Zatana Satana? 24 Ba na fabali dödö nöri, ba tebai aro nöri andrö. 25 Ba na fabali dödö zi sangambatö, ba lö fakhai zi samba omo andrö.[15] 26 Ba na no ilaŵa ia Satana ba na dua dödönia, ba lö fakhai, awai sa'ae. 27 Lö'ö sa sangila möi baomo ba nomo zabölö, ba worabu gama-gamania, na lö ihönagö iböbö zabölö andrö, ba awena irabu hadia ia ba nomonia.[16] 28 Si ndruhu niŵa'ögu khömi, fefu ngawalö horö andrö, ba tebe'e aefa ba nono niha; he fanandraŵa andrö, ha wa'oya wanandraŵara,[17] 29 ha na so zanandraŵaisi Eheha ni'amoni'ö andrö, ba lö fangefa khönia, götö wa'ara dania; ilu'i horö andrö, götö-götö wa'ara. — 30 Me laŵa'ö: "Sobekhu ia, bekhu si ra'iö."[18]

Ina ba talifusö Yesu sindruhu

edit

31 Ba so ninania ba ira talifusönia,[19] no so baewali ba lafatenge khönia, lafahede'ö khönia.

32 Ba no lafasui ia wedadao niha sato. Ba lamane khönia: Hiza, no so baero ninau ba ira talifusöu matua ba ira talifusöu alawe, la'alui ndra'ugö.

33 Ba itema lira, imane: Ha niha ninagu, ba ha niha dalifusögu? 34 Ba ifakhölö ia, ifaigi zi tefasui ya'ia si dadao, ba imane: Hiza ninagu ba taliftusögu. 35 Solo'ö somasi Lowalangi, da'ö dalifusögu matua ba talifusögu alawe ba inagu.

Famotokhi ba gahe

edit
  1. ↑ Mate tanga eluahania tebai mamaliŵa tanga sa'ae börö wökhö.
  2. ↑ Tola mu'alösö'ö wanguma'ö andre tobali: Hadia zinangea mufalua ba luo sabato, molau si sökhi, ya'ia da'ö mangorifi niha ma zui molau si lö sökhi, ya'ia da'ö mamunu niha?
  3. ↑ Faigi Mat 22:16
  4. ↑ Baŵa eluahania idanö si hulö nasi si so yaŵa ba danö (li Indonesia danau).
  5. ↑ Faigi Luk 6:18 ba Mat 14:36
  6. ↑ Faigi 1:24,34; Luk 4:41
  7. ↑ Faigi Mat 12:16
  8. ↑ Ayati 13-19: faigi Mat 10:1-4; Luk 6:12-16
  9. ↑ Faigi Mat 10:5
  10. ↑ Faigi Luk 9:54
  11. ↑ Faigi faza 6:31
  12. ↑ Faigi Mat 12:24-32; Luk 11:14-23
  13. ↑ Ayati 22-30: faigi Mat 12:24-32; Luk 11:14-23
  14. ↑ Faigi Yoh 8:48
  15. ↑ Faigi Mat 12:27
  16. ↑ Faigi Luk 11:21
  17. ↑ Faigi Luk 12:10
  18. ↑ Faigi Yoh 10:20
  19. ↑ Ayati 31-35: faigi Mat 12:46-50; Luk 8:19-21

Fabaliŵa lala

edit

Injil Mareko: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16

Turia Somuso Dödö: Mataio • Mareko • Luka • Yohane

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Turia_Somuso_Dödö/Mareko/3&oldid=6038006"