Ba nahia andre tefa'oli zi öfa mbuku Duria Somuso Dödö ma asese latötöi ia Injil ba li Indonesia. No mufa'anö ia soguna khö ndraono si bohou ebua nifotöi generasi digital, sonekhe ba wangoguna'ö internet ba sombaso fefu hadia ia ba zandrela smartphone (HP).
Ohitö dödö wama'anö mbuku Duria Somuso Dödö andre ya'ia ba wama'ema Taromali Lowalangi ba li niha khöda ma'ökhö, saoha ba salio aboto ba dödöra ya'ira si lö manema famahaö ba teologi ma zui ba filsafat, töra-töra ndraono si bohou ebua nifotöi generasi digital andrö yaŵa.
Hana moguna Zura Ni'amoni'ö si bohou edit
Li Niha si so bakha ba Zura Ni'amoni'ö nifa'anö H. Sundermann asese lö i'anema'ö aboto ba dödöda, börö me konstruksi wehede, ngawua wehede (kosa kata) nifilinia ba maedo-maedo ni'oguna'önia no moroi ba zi töra otu fakhe si lalö.
Sambua duma-duma: i'oguna'ö wehede utu ndru'u si lö faudu sa'ae ma'ökhö. Aurifö sauri ba gatua simane belu, arawi, singo btn. tenga utu side-ide da'ö.[1]
Baero da'ö no oi labali'ö li Niha fefu döi niha awö döi nahia, börö me luo no oi fakaole lela ndra tuada wanötöi töi simane Matius andrö labali'ö ia Matai'o, Ester tobali Gesitera, btn. Duma-dumania na tabaso "Ba humöngö duriania ba danö Ziria ma'asagörö" (Mat 4:24), lö itörö tödöda wa nitötöi andrö no Suriah, si so ba gotalara negara Yordania ba Lebanon.
Ena'ö tola la'alui banuada hadia döi niha ba ma zui töi zi sambua naha ba heza tesöndra ia ba Internet, no oya munönö khai-khai ba wamatokhi si so ba Internet. Simanö göi ngawalö wehede awö istilah si lö sa'ae la'ila geluahania banuada ma'ökhö. Ba da'ö no göi mufaogö khai-khai ba Wikikamus Nias faoma ba Wikipedia Nias ena'ö tola lafaigi hadia geluahania ira banuada ba da'ö sisa.
Lala nitörö edit
Halöŵö andre tenga nilau ba wa'alio ma zui ha sakali manörö. Töra-töra me mulau ia ba ginötö wolombase (ero ita so duho halöŵöda si ero ma'ökhö). Börö da'ö simane wolaugu:
- Uhalö teks si no so ba Zura Ni'amoni'ö nifa'anö Heinrich Sundermann.[2]
- Ufaedogö ia ba teks asli Zura Ni'amoni'ö ba li Yunani.[3] Heza fabö'ö teks asli Yunani ba teks Sundermann, u'alui lala wangali ya'ia ba li khöda sabölö faudu. Ba da'a u'oguna'ö teks Zura Ni'amoni'ö nifa'anö Hadrian Hess[4] awö teks Zura Ni'amoni'ö tanö bö'ö ba li bö'ö. Tohugö wombaso wamaigi gumbu bö'ö ni'oguna'ögu.
- Heŵa'ae ohitö dödö ena'ö alösö wangali ya'ia, no u'odödögö ena'ö ahatö teks ba li Niha ba teks asli Yunani. Hana? Ena'ö ba zi so föna aoha göi khö program komputer (nifotöi kecerdasan buatan ma artificial intelligence) ba wangila hewisa wangali li bö'ö ba li Niha ma wangali li li Niha ba li bö'ö. Si tobali duma-dumania, faedogö teks Sundermann faoma teks Mrk 2:17 ni'ali ba da'e moroi ba li Yunani.
- Unönö högö waosatö, same aoha khö niha si fagölö wombaso ya'ia.[5] Ufaigi ua högö andrö moroi ba teks Hess andrö yaŵa, awena u'atulö'ö ia aefa u'angeragö heza zabölö sökhi wanguma'ö ya'ia ba li khöda. Te moguna tebotokhi khö ndra banuada si lö irai mamoha ba teologi, wa ngawalö högö si so bakha ba Zura Ni'amoni'ö nisöndrada he ba teks Sundermann ba he ba teks Sura Ni'amoni'ö bö'ö, no tenga föfö Zura Ni'amoni'ö ia. No ninönö zama'anö ya'ia ena'ö aoha khö zombaso. Simanö göi nomoro faoma faza. Lö ya'ia bakha ba Zura Ni'amoni'ö. Ninönö da'a ba ginötö furi ba wanolo ena'ö tola tasöndra sambua ayati.
- Itaria ubaso mangawuli teks si no mu'ali, ba u'atulö'ö zui ia na moguna, aefa wamaresogu mbuku Zura Ni'amoni'ö ba li bö'ö simane ba li Jerman,[6] Inggris[7] ba Indonesia.[8] Simanö göi itaria ufaedogö ia ba Zura Ni'amoni'ö nifotöi New Revised Standard Version ba li Inggris nitema'ö he ba Gereja Katolik ba ba Gereja Protestan, si itaria latötöi göi Sura Ni'amoni'ö khö fefu niha Keriso, tenga ha khö niha Katolik ma ha khö niha Protestan.[9] Baero da'ö itaria göi möido ufaigi wo'ali Zura Ni'amoni'ö nifa'anö ndra jw.org.[10]
Lala wanura edit
No göi ifaudugö Sundermann lala wanura Sura Ni'amoni'ö ba li Belanda (me luo da'ö lö nasa so negara Indonesia, so ndra tuada nasa barö wamatörö Belanda) awö ba ejaan Van Ophuijsen ni'oguna'ö ba ginöto da'ö. Bahiza no so ita ma'ökhö ba negara Indonesia sangoguna'ö ejaan EYD. Börö da'ö tafaudugö wanura Turia Somuso Dödö andre ba ejaan li Indonesia, fao ba da'ö wamabali ngawua wehede nifomendrua: ali-ali, manaho-naho, atua-tua, btn. Faduhu dödögu na ma'ökhö ifa'anö Zura Ni'amoni'ö andrö Sundermann, silötolalö'ö ifaudugö ba ejaan li Indonesia nifahaö ba zekola ma'ökhö.
Onönötania: fehede si dombua hua bahiza ha sambua geluaha no ufaogö manö wanura ya'ia simane taromali, silötolalö'ö, bahiza, ulidanö, btn. Da'a no li Niha khöda ma'ökhö ba era digital, tenga li Niha simane nifa'anö ndra misionaris me töra 100 fakhe si lalö!
Umbu onönöta edit
Simane si no muŵa'ö yaŵa, Amabu'ulali Sibohou nifa'anö namada H. Hess faoma H. Sundermann andrö, ha dane-dane ia. No u'adölö'ö ba u'alösö'ö ia.
Ma'ökhö no aoha sibai khöda wolau simane, börö me oya teks Zura Ni'amoni'ö ba li bö'ö si tola ta'oguna'ö ba wamaigi hadia wehede ni'oguna'ö me lasura injil ira Matius, Markus, Lukas ba Yohanes, ba hadia geluahania ba li bö'ö. Tola tafaedogö hewisa wo'ali Taromali andrö ba li bö'ö simane li Indonesia, li Jerman, li Inggris, li Latin, li Yunani, btn. Buala sebua da'a khöda ma'ökhö. Ba ginötöma me sekola filsafat ba teologi ndra'aga, lö nasa so mbolokha gu'ö simane biblehub.com, same'e khöda nifotöi terjemahan paralel ba ngawalö li ba gulidanö! Me luo da'ö so mbuku niraka si so bakha terjemahan paralel, bahiza ebua sibai mbölinia, irege lö tola khögu wowöli ya'ia.
Na omasi'ö wamaedogö oi waosatö Zura Ni'amoni'ö ba ngawalö li ba gulidanö, tola ö'oguna'ö mbolokha gu'ö andre: https://biblehub.com
Buku Duria Somuso Dödö edit
Lö fa'abölö ba wangali fefu zura si so bakha ba Zura Ni'amoni'ö. Börö da'ö ha buku si öfa ngawua nifotöi Injil nibohouni wangali andre:
Fango'ozui edit
Heŵa'ae ohitö dödögu wamohouni fangali ba li Niha zi öfa Injil andrö yaŵa, omuso sa dödögu na so ndra talifusöda bö'ö somasi mamohouni wangali zura tanö bö'ö!
(Sinunö 119:105)Taromalimö andrö no sulu ba lalagu
Hulö simanö ua moroi khögu.
Moroi khö dalifusömi Sirus Laia,
dali wa'atumbu moroi ba Lölömatua,
dali wobanua moroi ba London, Inggris.
Khai-khai baero edit
- Bible Hub, biblehub.com
Umbu edit
- ↑ Andrö göi mbörö wa Sura Ni'amoni'ö ba li bö'ö lö aetu labohouni wangali ya'ia. Angeragö manö ha'uga kali sa'ae tebohouni Zura Ni'amoni'ö ba li Indonesia, Inggris, Jerman, btn. No oya kali. Ha'uga kali göi tebohouni Zura Ni'amoni'ö ba li Niha? Sakali?
- ↑ Heinrich Sundermann no samösa misionaris Protestan moroi ba Jerman so'ali Zura Ni'amoni'ö ba li Niha me töra otu fakhe si lalö. Sura Ni'amoni'ö andre zasese ta'ila so ba nomo misa, nisura nasa ba gila-ila zura (li Indonesia ejaan) Van Ophuijsen ni'oguna'ö ba ginötö da'ö.
- ↑ Teks ba li Yunani si tola mufaigi ba gu'ö so ba biblehub.com. Ena'ö aoha khö zombaso göi wamareso teks nifo'eluaha ba da'a no u'oguna'ö teks Yunani moroi ba da'ö.
- ↑ Hadrian Hess no samösa misionaris Katolik moroi ba Jerman. Toröi ba mohalöŵö ia 39 fakhe ba Danö Niha irugi ndröfi 2013 me mangawuli ia ba khöra. Oya ifa'anö mbuku si fakhai ba liturgi, fao ba da'ö zura ni'amoni'ö Amabu'ulali Sibohou, si tobali dane-dane mbuku Duria Somuso Dödö andre.
- ↑ No ta'ila wa wame'e nomoro faza ba ayati bakha ba Zura Ni'amoni'ö lö konsisten molo'ö ösi ma paragraf (no tobali fangi'ila umum da'a ba gotalua ndra ere Zura Ni'amoni'ö).
- ↑ Die Bibel | Revidierte Einheitsübersetzung 2016
- ↑ The New Jerusalem Bible
- ↑ Alkitab (LAI)
- ↑ New Revised Standard Version
- ↑ Sura Ni'amoni'ö Online nifa'anö jw.org.