Wb/nia/Turia Somuso Dödö/Mareko/2
Ifadöhö zi mate dambai edit
1 Mato ha'uga ngaluo aefa da'ö, ifuli möi Yesu ba Gafana'uma. Ba larongo niha wa no tohare ia. 2 Andrö owulo ato niha irege lö naha-naha, he föna mbawandruhö. Ba ibotokhi khöra daromali.
3 Ba la'ohe khönia samösa zi mate dambai, ni'osa'ö daöfa niha. 4 Me tebai latörö gotalua niha sato ba wangondrasi Yesu, andrö labokai zagö gamaudu zi so Yesu, ba ladada tou zi mate dambai andrö awö dufonia.[1]
5 Me i'ila wamatira, imane khö zi mate dambai andrö Yesu, He onogu, no te'efa'ö khöu horöu.
6 Ba so ösa zangila amakhoita si dadao ba da'ö ba lamane tödöra: 7 Hana iŵaö zimanö niha da'a? Mangaohasi Lowalangi ia! Haniha zi tola mangefa'ö horö baero Lowalangi samösa?
8 I'anema'ö i'ila ba dödönia Yesu, wa laŵaö tödöra zi manö. Hana wa manofu dödömi simane da'ö? isofu khöra. 9 He zaoha ira: manguma'ö khö zi mate dambai 'no te'efa'ö khöu horöu' ma zui manguma'ö 'Faoso, fazaŵa dufomö ba owaö-waö'? 10 Ba ena'ö mi'ila, wa so wa'abölö khö Nono Niha andrö ba gulidanö andre ba wangefa'ö horö.
Ba imane khö zi mate dambai andrö, 11 Uŵa'ö khöu, faoso, fazaŵa dufomö ba fuli'ö ba nomo!
12 I'anema'ö maoso niha andrö, ifazaŵa dufonia ba mofanö ia ba zanehe niha sato. Börö da'ö ahöli-höli dödö dozi niha ba lasuno Lowalangi lamane, Alukhö ta'ila zimanö!
Ikaoni Lewi edit
13 Ba ifuli möi Yesu ba mbewe mbaŵa. ba la'ondrasi ia fefu niha, ba ifahaö ira ba da'ö.
14 Me itörö, i'ila Lewi, ono Galifaio, si dadao ba naha wanema beo. O'ö ndra'o, iŵaö khönia Yesu, ba maoso ia, i'o'ö Yesu.
15 Ba me manga Yesu ba nomonia, ba ato zanema beo[2] ba si so horö manga awö Yesu ba nifahaönia; me ato sa zolo'ö ya'ia.
16 Ba me la'ila ira sangila amakhoita, farizaio,[3] manga Yesu awö zanema beo, lasofu khö ndra nifahaönia: Hana manga ia awö ndra zanema beo ba niha si so horö?
17 Ba me irongo da'ö Yesu, imane khöra, Tenga khö niha sowaöri boto moguna doto, bahiza khö niha sofökhö. Tenga andrö tohare ndra'o ba wogaoni niha satulö, bahiza niha si so horö.
Hana lö mamoni ndra nifahaö edit
18 Ba mamoni ba gö ndra nifahaö Yohane awö ndra farizaio. Andrö möi ira khönia, lamane, Hana lö mamoni ba gö ndra nifahaöu simane ndra nifahaö Yohane ba nifahaö ndra farizaio?[4]
19 Ba itema li Yesu, Hadia tola mamoni ba gö ndra tome ni'owalu gasa-gasa so ba gotaluara ni'owalu andrö? Sagötö so ia khöra, lö mamoni ira ba gö. 20 Bahiza irugi baŵa dania, me lahalö ia; aefa da'ö mamoni ira.
21 Lö sanagu balö nukha si bohou ba nukha satua. Ba na ilau ia ba faefa dania mbalö nukha si bohou andrö moroi ba nukha satua ba tobali abölö asika ia. 22 Ba lö niha sonönö agu si bohou ba naha nagu satua. Na ilau da'ö ba isika dania naha nagu andrö, irege he agu ba he nahania oi tekiko. Börö da'ö labe'e nagu si bohou bakha ba naha nagu si bohou.
So'aya luo Sabato Nono Niha edit
23 Ba samuza luo sabato itörö Yesu dalu nowi, ba labörötaigö lateteu lai wakhe si fakhai ba lala ira nifahaönia.
24 Ba lamane khönia ira farizaio, Hiza, hana wa lalau zi tebai ba luo sabato?[5]
25 Ba itema lira, Hadia lö irai mibaso nilau Dawido, me olofo ba tebai ia ba awönia fao?[6] 26 Ba ginötö ere sebua Gabiataro, me möi ia ba nomo Lowalangi ba i'a roti nifahowu'ö andrö, si ha tola la'a ira ere, ba ibe'e ösa khö ndra awönia fao göi?[7]
27 Ba imane khöra, No te'a'asogö sabato khö niha, tenga so niha khö sabato.[8] Börö da'ö Ono Niha andrö no So'aya, göi So'aya zabato.[9]
Famotokhi ba gahe edit
- ↑ Ba li Yunani κράβαττον (krabatton) si tola tefo'eluaha faoma naha wemörö, kaso ma tufo. Ba da'a ta'ali ia faoma tufo. Haniha ni'osa'ö faoma kaso? Lö göi aoha wodada kaso moroi ba zagö. Bahiza aoha wangosa'ö niha faoma tufonia ma sasese ba Danö Niha faoma muko. Abölö aoha göi wodada ya'ia moroi yaŵa ba zagö.
- ↑ Sanema beo eluahania sohalöŵö ba gödo wamatörö nifotöi kantor pajak. Beo ni'owuloi andrö möi khö ndra niha Romawi samatörö niha Yahudi me luo da'ö, andrö wa lafökhösi tödö ira niha Yahudi zangowuloi beo andrö. Ba dödöra mangowuloi beo khö zamaki ya'ira no horö.
- ↑ Sangila amakhoita ba farizaio no dombua orahua niha ba agama Yahudi ba ginötö Yesu. Sangila amakhoita andrö no sogonekhe ba wangi'ila huku (me luo da'ö huku nisura bakha ba Zura Ni'amoni'ö) ba börö da'ö mohalöŵö ira ba gödo wamazökhi zura simane sura wangowalu, sura wowöli tanö btn. Farizaio no göi sogonekhe ba wangi'ila Zura Ni'amoni'ö, bahiza ohitö dödöra töra-töra ba wamo'eluaha Taromali ba wa'auri si ero ma'ökhö.
- ↑ Mamoni ba gö eluahania lö manga gö ba ginötö si no muhonogöi ena'ö tola mofozu hadia nidöna-döna. So wolau simane tenga ha ba niha Yahudi, bahiza ba soi bö'ö göi. Oya wamoni ba gotalua Nono Niha me föna, simanö ba soi bö'ö ba Indonesia. Bakha ba Gereja so wamoni simane si-40 hari wuasö ba famoni bakha ba Gereja Katolik fatua lö mangowasaini Paskah.
- ↑ Molo'ö ndra farizaio luo sabato andrö no luo wolombase, tebai moholöŵö gofu hadia ia niha, ha tola molau halöŵö ba wamolakhömi Lowalangi. Faneteu lai wakhe nilau ndra nifahaö no sambua halöŵö molo'ö ndra farizaio. Bahiza simane oroma dania ba zura Mareko andre, molo'ö Yesu, tola molau gofu hadia halöŵö sangorifi niha ba luo sabato. Ha fohalöŵö ba danö zi lö faudu ba luo sabato.
- ↑ 1Sam 21:6.
- ↑ MozII 29:32.
- ↑ MozIV 5:14.
- ↑ Ono Niha andrö So'aya zabato eluahania mofa'abölö Yesu andrö (bakha ba Injil Ono Niha no töi Yesu) irege tola ifataro hadia zi tola ba si tebai mu'ohalöŵögöi ba luo sabato.
Fabaliŵa lala edit
Injil Mareko: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16
Turia Somuso Dödö: Mataio • Mareko • Luka • Yohane
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö