Wb/nia/Ngenu-Ngenu Yeremia/5

I. Fa'aila Yeruzalema

1 He Yehowa, törö tödöu zi no göna ndra'aga; faigi, ba nehegö wa'ailama andre! 2 Si so khöma mege, ba no möi ba danga niha bö'ö, ba omoma ba no la'okhögö Dawa baero. 3 Si lö ama ndra'aga sa'ae, no lakha mbanua ninama. 4 Öma idanö, ba ni'öli, ba awena falukhaga geuma, na mabe'e mböli. 5 Falu'i khöma zolohi ya'aga; no erege dödöma, lö labe'e molombase ndra'aga. 6 No ma'oro'ö dangama ba Ndrawa Miserayi, ba ba Ndrawa Asiria, ena'ö masöndra zabönö öma. 7 No molalö ndra tuama; lö ya'ira sa'ae, ba ya'aga zolu'i olalöŵara. 8 Sawuyu zamatörö ya'aga; lö sangefa'ö ya'aga ba dangara. 9 Sata'u mate ndra'aga wangai göma; ba zi'öli nemali andrö, ba danö si mate. 10 No aitö gulima, hulö mbowoa, ba wa'afökhö wa'olofo andrö. 11 Ira alawe ba Ziona, ba no lahoröni, fabaya ono alawe, ba mbanua mado Yuda misa. 12 No lataŵi zalaŵa tangara, ba bawa zatua, ba lö ba dödöra. 13 Ono matua, ba no labe'e sanutu fakhe, ba salau-lau ndraono ba norora eu. 14 Lö'ö sa'ae möi ba mbawa göli zatua; ba no labato wolau biola ono matua.^[1] 15 No taya wa'omuso dödöma; no tobali fangarö-ngarö wanunöma. 16 No aekhu tou zaembu ana'a andrö moroi ba högöma: alai ndra'aga, me no mafazökhi horö! 17 Ba da'ö, wa tobali sofökhö dödöma; ba da'ö, wa no balunö höröma; 18 ba hili Ziona andrö, me no afufu, me ladörö-dörö asu gatua.^[2]

II. Fangandrö fa'ahakhö dödö

19 Ba ya'ugö Yehowa, ba si lö aetu fa'asalaŵa; dadaomamö andrö, ba götö-götö wa'ara.^[3] 20 Hana wa lö mamalö-malö ö'olifugö'ö ndra'aga, hana wa ö'erogö ndra'aga, sagötö ya'aga? 21 He Yehowa, halö mangawuli ndra'aga khöu, ba mafuliga; bohouni mbaŵama, si mane ba götö föna!^[4] 22 Ma no alua ötibo'ö ndra'aga; hadia, no falawu wönumö khöma?