Wikimedia Incubator

Wb/nia/Ngenu-Ngenu Yeremia/1

< Wb‎ | nia‎ | Ngenu-Ngenu Yeremia
Wb > nia > Ngenu-Ngenu Yeremia > 1

I. Fa'ebua wamakao, si no göna ira edit

1 Alai mbanua andrö, no aomöaomö, sato niha no; no tobali lakha, sebua no ba ngai niha bö'ö; samatörö banua bö'ö no, ba no göna rodi! 2 Sara wongi manö mege-ege, mowöi daŵa hörönia. Lö sondrara tödönia, dozi somasi ya'ia mege. Dozi si fahuwu khönia mege, ba no faröi khönia, no si fa'udu.[1] 3 No awu'a mado Yuda, ba wangabu dödö andrö ba ba rodi andrö, si no abe'e. Ba niha baero so ira, lö falukha zahono ira. No lakhamö ira solohi ya'ira, ba zambö fa'ebolo lala. 4 Sabu tödö lala ba Ziona, me lö si möi ba gowasa. Bawa gölinia fefu, ba no adudula; mangarö-ngarö gere khöra; sabu tödö nono alawe khöra; ba ya'ia, ba no salangu tödö. 5 No möi yaŵa zamakao ya'ira, ba ba zi fa'udu khöra, ba lö fa'abu dödö. Yehowa sa'ae zamusi tödöra, ba wa'oya horöra andrö; noa sa mu'oloi'ö ndraonora, nirabu zamakao ya'ira. 6 Ba no aheta ba nono Ziona alawe lakhöminia fefu. Salaŵara, ba no timba mböhö, si lö ö du'u, mowaö-waö lö döladöla, föna zolohi. 7 Itörö tödö Yeruzalema — na baŵa wamakao ba na baŵa wolohi — zi sökhi andrö fefu, si otarai götö föna sa'ae, me möi ba danga zamakao mbanuara, me lö sangorifi; lafaigi-faigi samakao andrö, la'igi'igi'ö ira, ba wa'ate'alara andrö. 8 Sebua horö Yeruzalema, andrö wa tobali ni'ogorofi ira. Dozi samosumange ya'ira mege, ba no si lö ba dödö ya'ira sa'ae, me no la'ila zaila ira; ba ya'ira, ba sangarö-ngarö, ba labali'ö ira furi.[2] 9 No ta'unö gahe mbarura, lö itörö tödöra lua-lua. Ba sahöli-höli dödöda wa'ahöndröra andrö, lö sondrara tödöra. "Faigi wa'anumanagu, ya'ugö Yohowa", noa sa fayaŵa zi fa'udu! 10 No i'oro'ö dangania samakao andrö, ba wangai ana'ara fefu. Ba no la'ila me möi ba ni'amoni'ö andrö khöra niha baero, niŵa'öu: lö töla orudu ira ba mbanuami.[3] 11 No ara wangarö-ngarö mbanuara fefu, wangalui balazo; labe'e-be'e gana'ara böli göra, fangorifira. Faigi, ya'ugö Yehowa, nehegö, wa no lö ba dödö niha ya'odo![4]

II. Ena'ö na abu dödö zamondrongo göi edit

12 Ya'ami fefu, sanörö, mifaigi ba minehegö, na so na wa'afökhö si mane fa'afökhö andrö khögu, nilau khögu, khögu andre, nibusi Yehowa tödö, me baŵa wönunia andrö, si no abölö-bölö sibai.[5] 13 No ilau galitö, moroi yaŵa, ifatöröi'ö ba dölagu, ba no ilau wesu gahegu ba no itimba furi ndra'odo. No ifufu ndra'o, fadoro wökhögu ibe'e. 14 No ifa'anö kalo mbagigu horögu andrö, tangania; no tefaböbö, ba no muhare'ö ba mbagigu — erege dödögu ibe'e. No ibe'e ba danga zi tebai ulaŵa ndra'odo So'aya. 15 No itibo'ö So'aya fefu zabölö, si so ba khögu mege. No ikaoni ba gowasa zi fa'udu khögu, ba womama ono matua khögu. So'aya zanguhundragö folazi khö nono Yuda andrö alawe.[6] 16 Da'ö mbörö wege-egegu; mangele manö daŵa hörögu. Noa sa aröu khögu zondrara tödö, si okafui tödögu ena'ö. No abu dödö ndraonogu, me no abölö nemali andrö.[7] 17 I'oro'ö dangania Siona, lö falukha zondrara tödö. No ifaoso gahe zamakao ma'uwu Yakobo Yehowa, fasui. No tobali ni'ogorofi Yeruzalema, ba khöra andrö. 18 Satulö Yehowa; noa sa ufadaö linia. Mifondrondrongo, ya'ami niha baero fefu, ba mifaigi wa'afökhö andre khögu! Ono alawe khögu ba ono matua, ba no mu'oloi'ö. 19 No ukaoni zomasi ya'odo mege, ba lalimodo. Ere khögu ba satua, ba no mate olofo, ba mbanua, me la'alui göra, fangorifira.[8]

III. Fangandrö Yeremia edit

20 Faigi, ya'ugö Yehowa, wa'atosagu andre; hulö galitö bakha dödögu. Ibali'ö ia tödögu barö dotogu, me no sabe'e tandro ndra'odo mege. Baero, ba si'öli, famunu ndraono, ba yomo ba mbanua, ba teu mbanua.[9] 21 Larongo niha wangarö-ngarögu — ba sondrara tödö, ba lö'ö. Dozi si fa'udu khögu, ba larongo wamakao andrö khögu, ba omuso dödöra, me no ölau [khögu]. Alua dania mbaŵa andrö, nifarongogömö, öbe'e, ba fagölö-gölö ira khögu. 22 Ya möi ba duduma höröu walösökhira andrö, fefu, ba lau khöra, si mane folaumö khögu, ba horöra andrö fefu! Noa sa fahöna wangarö-ngarögu, ba sofökhö bakha dödögu.[10]

Famotokhi ba gahe edit

  1. ↑ Sin 6:7
  2. ↑ Sin 44:15; Yes 47:3; Yer 13:26
  3. ↑ MozV 23:3; Yer 52:17
  4. ↑ Yer 52:6; Faigi 4:10
  5. ↑ Yer 14:17
  6. ↑ Yes 63:3
  7. ↑ Yer 23:17
  8. ↑ Yer 30:14
  9. ↑ Yes 16:11; Yer 14:18
  10. ↑ Yer 8:18

Fabaliŵa lala edit

Olayama Ngenu-Ngenu Yeremia: 1 • 2 • 3 • 4 • 5

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Ngenu-Ngenu_Yeremia/1&oldid=6229505"