Wb/nia/Ngenu-Ngenu Yeremia/3

I. Mangarö-ngarö Yeremia ba wamakao andrö, si göna ia

edit

1 Ya'odo niha andrö, sangila famakao, ba mbözi-bözi andrö khönia ba wönunia. 2 Ya'odo nifasaonia, nifatörönia ba zogömi-gömi ba ba zi lö haga. 3 Khögu ifonumanumalö dangania, ma'öma'ökhö. 4 Sariri nösigu ba uligu, ibe'e; tölagu, ba no irasa. 5 No ifasui ndra'odo, wama'anö langu ba famakao. 6 No ibe'e ba zogömi-gömi ndra'odo, amaedola zi mate, lö fangorifi sa'ae. 7 No ikölini ndra'o kara, lö lala, no abua rate khögu, ibe'e.[1] 8 Ba he mu'ao ndra'o, he ŵa'ae ebua ligu, ba iba'a wangandrögu. 9 Iba'a lalagu kara sebua; ifufu nitörögu ena'ö. 10 Amaedola mberua sanaronaro ia khögu, amaedola zingo ba mbini-mbini.[2] 11 Selungu lalagu ibe'e; no isasawi ndra'odo; adudula ndra'odo ibe'e. 12 No ikhai wanania, ba no ibe'e tandra wana ndra'odo.[3] 13 No ifatörö ba mbuagu nono wana khönia. 14 No tobali fama'iki ndra'o ba mbanuama fefu, ayara ma'öma'ökhö.[4] 15 No i'abusoi'ö ndra'o safeto, no ifabadugö khögu nidanö mbulu mbala. 16 Ubohagö nene ibe'e, ba ufagaölö ndra'o bawu. 17 No ötayaigö wa'ohahau dödögu, olifu ndra'o zi sökhi. 18 Ba umane: No taya wa'abe'egu, ba fanötönagu khö Yehowa.

II. Fangandrönia; i'ide-ide'ö ia ba idöna-döna wa'ahakhö dödö Lowalangi

edit

19 Törö tödöu wa'anumanagu ba folohi ya'odo andrö, ba idanö mbulu mbala andrö, awö langu andrö! 20 U'angerangeragö, ba iköwö ia bakha tödögu. 21 Da'ö utanö ba dödögu, ba andrö udöna-döna: 22 Lö'ö sa atö saetu na wa'ebua dödö Yehowa, lö sahori na wa'ahakhö dödönia; 23 ero mahemolu, ba ifuli bohou, abölö wa lö faröi ndra'ugö![5] 24 Tana khögu Yehowa, iŵa'ö tödögu, andrö wa khönia udöna-döna.[6] 25 Sebua tödö Yehowa ba zanötöna khönia, ba niha sangalui ya'ia. 26 Si sökhinia, tadöna-döna wangorifi andrö khö Yehowa, lö hede-hede. 27 Sökhi ba niha, na ilu'i galo mbagi andrö, fatua ono matua na ia. 28 Ya dumao-dao lö awö ba lö hede-hede, na ihare'ö ba mbaginia. 29 Ya fa'ago bawa ia ba gawu-gawu tou — ma atö so na dötönafö; 30 Yamu'oro'ö mbo'önia ba zamalisi ya'ia, ya abuso fango'aya. 31 Tenga si lö mamalö-malö wanibo Zo'aya. 32 Na no ifatörö wa'abu dödö, ba [ifuli] ahakhö dödö, ba wa'afahöna wa'ebua dödönia andrö. 33 Tenga sa fa'omasinia wamakao ba famusi tödö nono niha. 34 Wa lahundragö fefu nira'u andrö, ba danö, wa lawu'ai huku, 35 ba zanehe Wondrege Zalaŵa, 36 wa lafuyu'ö huhuo niha, ba hadia, lö i'ila So'aya? 37 Ha niha zanguma'ö, ba no itörö, na tenga moroi ba li Zo'aya?[7] 38 Hadia, tenga umbu zi lö sökhi ba umbu zi sökhi göi mbawa Wondrege Zalaŵa?[8] 39 Hadia wa mangarö-ngarö manö niha, sagötö ya'ia? Ba horönia ya mangarö-ngarö zamösana!

III. Fangombakha horö

edit

40 Datafaigi döröŵada, ta'alu-alui, ba tafuli ita khö Yehowa! 41 Datafazaŵa dödöda ba tangada khö Lowalangi ba zorugo! 42 No elungu ita, ba no tandrotandrofö ita — ba lö nibe'eu aefa [da'ö]. 43 No öfobalu-balu ndra'ugö fönu ba no ögohi ndra'aga, no öbubunu ndra'aga, lö fa'ahakhö dödö. 44 No öbalugö ndra'ugö lawuo, fa tebai isösö fangandrö. 45 No öbali'ö sasao ba sogoro niha ndra'aga, ba hunö niha baero.[9] 46 No lafaboka mbawara khöma dozi si fa'udu khöma.[10] 47 Fehokha mbu ba kohokoho gurakhama, ba fa'adudu ba fa'afufu. 48 Mangele daŵa hörögu, ba wa'afufu nono alawe andrö, ono niwada.[11] 49 Mo'ala'ala manö hörögu, lö mamalö-malö,[12] 50 balazi ifaigi moroi yaŵa, balazi ifaigi lala Yehowa, moroi ba zorugo. 51 Afökhö bakha dödögu ibe'e [taŵa] hörögu andrö, ba nono alawe andrö, banuada, fefu. 52 No lagohi ndra'o, nifolohi fofo, si fa'udu khögu, lö börö-börö, 53 no la'etu'ö nosogu ba gohokoho danö ba no lahawui ndra'o kara.[13] 54 No ilawui högögu idanö, ba umane: si mate ndra'o.

IV. Ifondrondrongo Lowalangi ba itolo nifakao

edit

55 Ba no u'angaröfi li döimö, ya'ugö Yehowa, moroi ba wondrege gohokoho.[14] 56 Ba no öfondrondrongo we'aogu andrö: "Böi duhö dögi dalingau; okafui dödögu, tolodo!" 57 No ahatö ndra'ugö, me mu'aodo khöu, ömane: "Böi busi dödöu!" 58 No öfatunö huhuogu, ya'ugö Yehowa, no ö'orifi ndra'odo. 59 No ö'ila wamakao ya'odo andrö, ya'ugö Yehowa: ohe ba lala huhuogu andrö! 60 No anehe'ö dödöra ba wolau khögu, fefu nifakhaira khögu. 61 No örongo wango'ayara andrö, ya'ugö Yehowa, fefu nifakhaira khögu, 62 huhuo zi fa'udu khögu ba tödöra fa'udusa khögu, ma'öma'ökhö. 63 Faigi, ba wedadaora ba ba wemaosora, ba ayara ndra'odo. 64 Ya'ugö Yehowa zanulöni khöra, dali nilau dangara;[15] 65 ö'abösi'ö dödöra — ba ya tohare khöra wangelifiu! 66 Ögohi ira ba wönumö ba öhori ira, barö mbanua khö Yehowa!

Famotokhi ba gahe

edit
  1. Yob 3:23
  2. Yob 10:16
  3. Yob 16:12; Sin 7:13
  4. Yob 30:9
  5. Sin 30:6
  6. Sin 16:5; 73:26; Yer 10:16
  7. Sin 33:9
  8. Yes 45:7
  9. KorI 4:12
  10. Faigi 2:16
  11. Faigi 3:11
  12. Faigi 2:18
  13. Yer 38:6
  14. Sin 130:1
  15. Rom 2:6

Fabaliŵa lala

edit

Olayama Ngenu-Ngenu Yeremia: 12345

Amabu'ulali Siföföna: Moze IMoze IIMoze IIIMoze IVMoze VYosuaSanguhukuRutiSamueli ISamueli IIRazo IRazo IINga'ötö INga'ötö IIEseraNehemiaEsiteraYobiSinunöAmaedola ZelomoSangombakhaSinunö SebuaYesayaYeremiaNgenu-Ngenu YeremiaHezekieliDanieliHoseaYoeliAmosiObadiaYonaMikhaNakhumiHabakukiSefaniaHagaiSakhariaMaleakhi

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö