ꠡꠣꠔ ꠇꠁꠘꠣꠞ ꠛꠣꠈꠣꠘ ꠇꠛꠤ ꠍꠂꠅꠖ ꠡꠣꠢꠘꠥꠞꠞ ꠟꠦꠈꠣ ꠄꠇꠐꠣ ꠇꠤꠔꠣꠛ ꠍꠤꠟꠐ ꠘꠣꠉꠞꠤ ꠢꠞꠚꠦ ꠍꠣꠙꠣ ꠡꠛꠌꠣꠁꠔꠦ ꠛꠦꠡꠤ ꠙꠠꠣ ꠇꠛꠤꠔꠣꠞ ꠝꠣꠏꠦ ꠄꠇ ꠅꠁꠟ ꠡꠣꠔ ꠈꠁꠘꠣꠞ ꠛꠣꠢꠣꠘ ⁕ ꠃꠘꠤꠡ ꠡꠔꠇꠅ ꠁ ꠇꠤꠔꠣꠛ ꠙꠄꠟꠣ ꠍꠣꠙꠣ ꠅꠄ ⁕
| ꠎꠟꠣꠟ-ꠀꠛꠣꠖꠤ ꠙꠥꠕꠤ | |
| ꠍ꠆ꠞꠤꠅꠐ꠆ꠐ ꠘꠣꠉ꠆ꠞꠤ ꠙꠥꠕꠤ | |
| ꠍꠤꠟꠦꠐ ꠘꠣꠉꠞꠤ ꠙꠥꠕꠤ | |
 | |
| ꠔꠁꠔ꠆ꠔ | |
| ꠎꠦ ꠎꠦꠉꠣꠞ | ꠍꠤꠟꠐ ꠅꠘ꠆ꠌꠟ |
| ꠖꠤꠇ | ꠛꠣꠃꠔꠘꠦ ꠒꠣꠁꠘꠦ |
| ꠇꠥꠘ ꠡꠝꠄꠇꠥꠞ | ꠀꠉꠞꠀꠝꠟꠤ (ꠍꠤꠞꠤꠢꠐ꠆ꠐꠤ) 1303 (ꠡꠣꠎꠟꠣꠟꠞ ꠡꠝꠄꠇꠥꠞ) 1559-1774 (ꠉꠥꠟꠣꠝ ꠢꠥꠍꠘ) 1870 (ꠁꠍꠟꠣꠝꠤꠀ ꠙ꠆ꠞꠦꠌ) |
| ꠙꠥꠕꠤꠘ | |
| ꠇꠦꠔꠣꠛ | |
| ꠜꠣꠡꠣ ꠟꠤꠙꠤꠞ ꠔꠁꠔ꠆ꠔ | |
| ꠟꠤꠙꠤ | ꠍꠤꠟꠐꠤ ꠟꠤꠙꠤ ꠨ Sylo (316) |
| ꠜꠣꠡꠣꠁꠘ | |
| ꠇꠞꠎ ꠡꠛ꠆ꠖꠣꠁꠘ | |
| ꠗꠣꠌ (ꠁꠡ꠆ꠐꠣꠁꠟ) |
|
| ꠗꠞꠘ |
|
| ꠉ꠆ꠞꠣꠝꠣꠞ | ꠟꠦꠈ꠆ꠞꠣꠁꠘ꠆ꠔꠞ ꠖꠦꠅꠀ ꠘꠣꠝ
|
| ꠃꠌ꠆ꠌꠣꠞꠘ | |
ꠡꠣꠔ ꠈꠁꠘꠣꠞ ꠛꠣꠈꠣꠘ ꠙꠥꠕꠤꠔ ꠡꠣꠔꠎꠣꠔ ꠛꠦꠐꠤꠞ ꠈꠣꠍꠟꠔꠞ ꠇꠕꠣ ꠇꠀ ꠅꠁꠍꠦ ꠨ ꠁꠔꠣ ꠅꠁꠟ ꠪ ꠢꠡ꠆ꠔꠥꠘꠤ ꠨ ꠡꠋꠇꠥꠘꠤ ꠨ ꠘꠣꠉꠥꠘꠤ ꠨ ꠇꠣꠋꠇꠥꠘꠤ ꠨ ꠇꠤꠋꠇꠥꠘꠤ ꠨ ꠌꠤꠘ꠆ꠔꠥꠘꠤ ꠨ ꠙꠖꠖꠥꠘꠤ ⁕ ꠝꠥꠟꠔ ꠘꠣꠘꠣꠘꠎꠣꠔ ꠎꠣꠘꠥꠀꠞ ꠀꠞ ꠎꠤꠘꠤꠡꠞ ꠟꠉꠦ ꠔꠥꠟꠘꠣ ꠖꠤꠀ ꠛꠦꠐꠤꠘꠔꠞ ꠈꠣꠍꠟꠔꠞ ꠛꠄꠀꠘ ꠇꠞꠍꠁꠘ ⁕
ꠀꠝꠞꠣꠞ ꠡꠝꠣꠎꠧ ꠊꠞ ꠙꠞꠤꠛꠣꠞ ꠍꠦꠝꠐꠤꠛꠣꠞ ꠖꠣꠄ ꠀꠍꠔꠣꠐꠣ ꠛꠦꠐꠤꠘꠔꠞ ꠃꠙꠞꠦ ꠙꠞꠤ ꠎꠣꠄ ⁕ ꠅꠘꠦꠇ ꠇꠡ꠆ꠐ ꠇꠞꠤ ꠊꠞꠛꠣꠞ ꠡꠣꠝꠟꠣꠁꠀ ꠞꠣꠈꠁꠘ ꠛꠦꠐꠤꠘꠔꠦ ꠨ ꠀꠛꠣꠞ ꠅꠘꠦꠇꠡꠝꠄ ꠖꠦꠈꠣ ꠎꠣꠄ ꠛꠦꠐꠤꠘꠔꠞ ꠈꠣꠍꠟꠔꠞ ꠇꠣꠞꠘꠦ ꠙꠞꠤꠛꠣꠞꠅ ꠅꠡꠣꠘ꠆ꠔꠤ ꠖꠦꠈꠣ ꠖꠦ ⁕ ꠡꠣꠢꠘꠥꠞꠦ ꠔꠣꠘ ꠇꠤꠔꠣꠛꠧ ꠇꠛꠤꠔꠣꠞ ꠍꠘ꠆ꠖꠦ ꠙꠞꠤꠛꠣꠞꠧ ꠛꠦꠐꠤꠘꠔꠞ ꠜꠥꠝꠤꠇꠣ ꠔꠥꠟꠤꠀ ꠗꠞꠍꠂꠘ ⁕
ꠁ ꠇꠤꠔꠣꠛꠧ ꠖꠦꠈꠣ ꠎꠣꠄ ꠛꠦꠐꠤꠘꠔꠞ ꠊꠞꠞ ꠜꠤꠔꠞꠦ ꠕꠣꠇꠣ ꠨ ꠢꠈꠟ ꠇꠣꠝ ꠇꠞꠣ ꠨ ꠎꠣꠝꠣꠁ ꠀꠞ ꠢꠃꠞꠛꠣꠠꠤꠞ ꠖꠤꠟ ꠈꠥꠡ ꠞꠣꠈꠣꠃ ꠛꠦꠐꠤꠘꠔꠞ ꠄꠇꠝꠣꠔ꠆ꠞ ꠇꠣꠝ ⁕ ꠁꠘꠕꠣꠇꠤ ꠛꠥꠎꠣ ꠎꠣꠄ ꠁ ꠇꠤꠔꠣꠛꠧ ꠝꠥꠟꠔ ꠚꠥꠐꠤꠀ ꠃꠑꠍꠦ ꠢꠤ ꠡꠝꠄꠇꠥꠞ ꠛꠦꠐꠣꠡꠣꠡꠤꠔ ꠡꠝꠣꠎꠞ ꠌꠤꠘ꠆ꠔꠣ ꠈꠤꠀꠟ ⁕
ꠢꠡ꠆ꠔꠥꠘꠤ ꠇꠁꠘꠣꠞ ꠛꠄꠀꠘ
edit⁕ ꠙꠢꠦꠟꠣ ꠛꠄꠀꠘ ꠢꠡ꠆ꠔꠥꠘꠤ ꠇꠁꠘꠣꠞ ⁕
ꠙꠢꠦꠟꠣ ꠛꠄꠀꠘ ꠜꠣꠁ ꠔꠣꠔꠦ ꠇꠞ ꠝꠘ ॥
ꠡꠣꠔ ꠇꠁꠘꠣꠞ ꠛꠣꠈꠣꠘ ꠀꠝꠤ ꠟꠦꠈꠤꠝꠥ ꠄꠈꠘ ⁕
ꠎꠖꠤ ꠛꠣꠙꠦꠞ ꠛꠦꠐꠣ ꠢꠄ ꠅꠡ꠆ꠔꠣꠖꠦꠞ ꠉꠟꠣꠞ ꠢꠣꠞ ॥
ꠘꠄꠀꠘꠦ ꠖꠦꠈꠤꠟꠦ ꠔꠣꠞꠦ ꠙꠣꠞꠦ ꠌꠤꠘꠤꠛꠣꠞ ⁕
ꠝꠣꠄꠞ ꠙꠤꠀꠞꠣ ꠛꠦꠐꠣ ꠀꠞ ꠛꠣꠙꠦꠞ ꠙꠞꠣꠘ ॥
ꠙꠞꠕꠝꠦ ꠟꠦꠈꠤꠝꠥ ꠀꠝꠤ ꠢꠡ꠆ꠔꠥꠘꠤꠞ ꠛꠄꠀꠘ ⁕
ꠢꠡ꠆ꠔꠥꠘꠤ ꠎꠦꠁ ꠘꠣꠞꠤ ꠎꠦꠝꠘ ꠌꠟꠦ ꠢꠡ꠆ꠔꠤ ॥
ꠗꠝ ꠗꠝꠣꠁꠀ ꠚꠣꠐꠦ ꠛꠦꠐꠤ ꠄꠁ ꠔꠣꠞ ꠉꠔꠤ ⁕
ꠡꠣꠝꠤꠞ ꠡꠘꠦ ꠛꠤꠛꠣꠖ ꠇꠞꠤꠀ ꠙꠥꠡꠣꠁꠟ ꠞꠎꠘꠤ ॥
ꠡꠥꠡ꠆ꠛꠣꠝꠤꠞꠦ ꠖꠣꠔꠦ ꠇꠣꠐꠤ ꠟꠢꠥ ꠇꠞꠤꠀꠍꠦ ꠙꠣꠘꠤ ⁕
ꠟꠢꠥ ꠡꠥꠇꠣꠁ ꠉꠥꠡ꠆ꠔ ꠡꠥꠇꠣꠁ ꠍꠣꠝꠠꠣ ꠢꠁꠟ ꠖꠠꠤ ॥
ꠢꠡ꠆ꠔꠦ ꠟꠣꠐꠤ ꠟꠁꠀ ꠝꠞꠖꠦ ꠚꠤꠞꠦ ꠛꠣꠠꠤ ꠛꠣꠠꠤ ⁕
ꠡꠋꠇꠥꠘꠤ ꠇꠁꠘꠣꠞ ꠛꠄꠀꠘ
edit⁕ ꠖꠥꠍꠞꠣ ꠛꠄꠀꠘ ꠡꠋꠇꠥꠘꠤ ꠇꠁꠘꠣꠞ ⁕
ꠀꠞꠦꠇ ꠛꠄꠀꠘ ꠜꠣꠁ ꠔꠣꠔꠦ ꠇꠞ ꠝꠘ ॥
ꠡꠋꠇꠥꠘꠤ ꠇꠁꠘꠣꠞ ꠇꠤꠍꠥ ꠟꠦꠈꠤꠝꠥ ꠄꠈꠘ ⁕
ꠡꠋꠇꠥꠘꠤ ꠎꠦꠁ ꠇꠁꠘꠣ ꠎꠦꠍꠣ ꠡꠋꠈꠦꠞ ꠝꠥꠞꠣ ॥
ꠝꠞꠖ ꠎꠣꠞ ꠜꠣꠟ ꠢꠄ ꠔꠤꠞꠤ ꠙꠣꠄ ꠛꠥꠞꠣ ⁕
ꠀꠁꠔꠦ ꠇꠣꠐꠦ ꠎꠣꠁꠔꠦ ꠇꠣꠐꠦ ꠡꠦꠁ ꠇꠞꠣꠔꠦꠞ ꠗꠣꠞ ॥
ꠛꠤꠘꠣ ꠡꠥꠘꠤ ꠇꠢꠦ ꠇꠕꠣ ꠝꠣꠉꠤꠀ ꠚꠥꠟꠦꠞ ꠢꠣꠞ ⁕
ꠛꠤꠘꠣ ꠡꠥꠘꠤ ꠇꠢꠦ ꠇꠕꠣ ꠝꠗꠥꠞꠡ ꠛꠣꠘꠤ ॥
ꠇꠣꠟ ꠘꠣꠉ ꠢꠁꠀ ꠝꠞꠖꠦꠞ ꠟꠁꠀꠍꠦ ꠙꠞꠣꠘꠤ ⁕
ꠛꠥꠏꠣꠁꠟꠦ ꠘꠣ ꠛꠥꠏꠦ ꠇꠁꠘꠣ ꠃꠟ꠆ꠐꠣ ꠙꠣꠘꠤ ॥
ꠛꠣꠄ ꠙꠣꠙꠦꠞ ꠜꠞꠣ ꠜꠞꠤꠀ ꠖꠤꠟ ꠡꠖꠉꠞꠦꠞ ꠘꠣꠄ ⁕
ꠛꠥꠏꠣꠁꠟꠦ ꠘꠣ ꠛꠥꠏꠦ ꠔꠤꠞꠤ ꠃꠟ꠆ꠐꠣ ꠔꠣꠞ ꠝꠘ ॥
ꠒꠣꠇꠣꠁꠔꠦꠞ ꠢꠣꠔꠦ ꠎꠦꠘ ꠡꠣꠃꠗꠦꠞ ꠝꠞꠘ ⁕
ꠘꠣꠉꠥꠘꠤ ꠇꠁꠘꠣꠞ ꠛꠄꠀꠘ
edit⁕ ꠔꠤꠍꠞꠣ ꠛꠄꠀꠘ ꠘꠣꠉꠥꠘꠤ ꠇꠁꠘꠣꠞ ⁕
ꠀꠞꠦꠇ ꠛꠄꠀꠘ ꠜꠣꠁ ꠔꠣꠔꠦ ꠇꠞ ꠝꠘ ॥
ꠘꠣꠉꠥꠘꠤ ꠇꠁꠘꠣꠞ ꠇꠤꠍꠥ ꠟꠦꠈꠤꠝꠥ ꠄꠈꠘ ⁕
ꠘꠣꠉꠥꠘꠤ ꠎꠦꠁ ꠇꠁꠘꠣ ꠝꠞꠖꠦ ꠇꠄ ꠡꠔꠤ ॥
ꠖꠤꠘꠦ ꠞꠣꠁꠔꠦ ꠈꠦꠖꠝꠔ ꠇꠞꠦ ꠝꠞꠖꠦꠞ ꠃꠟꠝꠔꠤ ⁕
ꠝꠞꠖꠦ ꠇꠢꠦ ꠀꠝꠣꠞ ꠔꠤꠞꠤ ꠛꠠꠡꠔ꠆ꠔꠤ ꠀꠍꠦ ॥
ꠟꠥꠇꠣꠁ ꠍꠣꠙꠣꠁ ꠇꠁꠘꠣ ꠇꠔ ꠝꠞꠖ ꠞꠣꠈꠤꠍꠦ ⁕
ꠀꠛꠦꠞ ꠇꠣꠈꠁꠄ ꠇꠁꠘꠣ ꠡꠥꠗꠥ ꠛꠣꠘ꠆ꠖꠁꠘ ꠇꠦꠡ ॥
ꠇꠝꠞ ꠛꠦꠇꠣ ꠖꠤꠀ ꠢꠣꠐꠦ ꠗꠞꠦ ꠘꠣꠘꠣꠘ ꠜꠦꠡ ⁕
ꠇꠝꠞ ꠛꠦꠇꠣ ꠖꠤꠀ ꠢꠣꠐꠦ ꠝꠣꠎꠣ ꠇꠞꠦ ꠈꠤꠘ ॥
ꠖꠥꠁ ꠌꠃꠇ ꠊꠥꠞ ꠇꠞꠤ ꠌꠣꠄ ꠇꠤꠛꠣ ꠞꠣꠔꠞ ꠖꠤꠘ ⁕
ꠡꠡꠥꠠꠤꠄ ꠖꠤꠟꠦ ꠉꠣꠟꠤ ꠃꠖꠞ ꠜꠞꠤ ꠕꠄ ॥
ꠀꠙꠘ ꠡꠣꠝꠤ ꠛꠣꠠꠤ ꠀꠁꠟꠦ ꠇꠣꠘ꠆ꠖꠤ ꠔꠣꠞꠦ ꠇꠄ ⁕
ꠎꠖꠤ ꠇꠝꠛꠈꠔ ꠛꠦꠐꠣ ꠢꠄ ꠡꠥꠘꠦ ꠛꠃꠞ ꠇꠕꠣ ॥
ꠛꠃꠞ ꠇꠕꠣ ꠡꠥꠘꠤꠀ ꠎꠦ ꠍꠣꠠꠤ ꠝꠣꠔꠣ ꠙꠤꠔꠣ ⁕
ꠝꠣꠔꠣꠞ ꠇꠕꠣ ꠝꠤꠍꠣ ꠢꠄ ꠛꠃꠞ ꠇꠕꠣ ꠢꠣꠍꠣ ॥
ꠡꠄꠔꠣꠘꠦ ꠙꠣꠁꠀ ꠔꠣꠞꠦ ꠇꠞꠤꠍꠦ ꠡꠞꠛꠔꠣ ⁕
ꠙꠞꠤ ꠛꠣꠠꠤ ꠎꠣꠁꠔꠦ ꠘꠣꠞꠤ ꠉꠣꠁꠐꠦ ꠛꠣꠘ꠆ꠖꠦ ꠙꠣꠘ ॥
ꠜꠤꠘ ꠙꠥꠞꠥꠡ ꠒꠣꠇꠤꠀ ꠎꠃꠛꠘ ꠇꠞꠦ ꠖꠣꠘ ⁕
ꠇꠣꠋꠇꠥꠘꠤ ꠇꠁꠘꠣꠞ ꠛꠄꠀꠘ
edit⁕ ꠌꠃꠕꠣ ꠛꠄꠀꠘ ꠇꠣꠋꠇꠥꠘꠤ ꠇꠁꠘꠣꠞ ⁕
ꠀꠞꠦꠇ ꠛꠄꠀꠘ ꠜꠣꠁ ꠔꠣꠔꠦ ꠇꠞ ꠝꠘ ॥
ꠇꠣꠋꠇꠥꠘꠤ ꠇꠁꠘꠣꠞ ꠇꠤꠍꠥ ꠟꠦꠈꠤ ꠛꠤꠛꠞꠘ ⁕
ꠇꠣꠋꠇꠥꠘꠤ ꠎꠦꠁ ꠇꠁꠘꠣ ꠙꠥꠡꠣꠉ ꠟꠣꠉꠣꠄ ॥
ꠡꠣꠔ ꠇꠣꠝ ꠊꠞꠦ ꠕꠁꠀ ꠙꠠꠤ ꠛꠣꠠꠤ ꠎꠣꠄ ⁕
ꠙꠞꠤ ꠛꠣꠠꠤ ꠎꠣꠄ ꠛꠦꠐꠤ ꠖꠤꠟꠦ ꠈꠥꠡꠤ ꠢꠁꠀ ॥
ꠙꠞꠤ ꠛꠣꠠꠤꠞ ꠛꠦꠐꠤ ꠛꠣꠞꠄ ꠈꠣꠐ ꠙꠤꠠꠤ ꠟꠁꠀ ⁕
ꠀꠁꠡ ꠀꠁꠡ ꠅꠢꠦ ꠛꠁꠘ ꠉ ꠈꠣꠅ ꠛꠣꠐꠣꠞ ॥
ꠙꠣꠘ ꠔꠥꠝꠣꠞꠦ ꠘꠣ ꠖꠦꠈꠤꠟꠦ ꠜꠁꠘ ꠃꠠꠤ ꠎꠣꠄ ꠙꠞꠣꠘ ⁕
ꠖꠥꠈꠦ ꠡꠥꠈꠦ ꠙꠠꠤꠟꠦ ꠜꠁꠘ ꠉ ꠇꠦꠘ ꠘꠣꠁ ꠙꠣꠁ ॥
ꠇꠥꠘꠥ ꠉꠠꠤ ꠀꠡꠤꠛꠣꠄ ꠜꠁꠘ ꠉ ꠙꠕꠦꠞ ꠙꠣꠘꠦ ꠌꠣꠁ ⁕
ꠇꠝꠛꠈꠔꠦ ꠇꠝꠛꠈꠔꠦ ꠎꠖꠤ ꠝꠤꠟꠘ ꠢꠁꠟ ꠙꠥꠞꠣ ॥
ꠖꠤꠟꠦꠞ ꠇꠕꠣ ꠜꠣꠋꠉꠤ ꠇꠁꠟꠦ ꠝꠞꠖꠦꠞ ꠢꠄ ꠛꠥꠞꠣ ⁕
ꠇꠤꠋꠇꠥꠘꠤ ꠇꠁꠘꠣꠞ ꠛꠄꠀꠘ
edit⁕ ꠙꠣꠌꠅꠀ ꠛꠄꠀꠘ ꠇꠤꠋꠇꠥꠘꠤ ꠇꠁꠘꠣꠞ ⁕
ꠀꠞꠦꠇ ꠛꠄꠀꠘ ꠜꠣꠁ ꠔꠣꠔꠦ ꠇꠞ ꠝꠘ ॥
ꠇꠤꠋꠇꠥꠘꠤ ꠇꠁꠘꠣꠞ ꠇꠤꠍꠥ ꠟꠦꠈꠤꠝꠥ ꠄꠈꠘ ⁕
ꠇꠤꠋꠇꠥꠘꠤ ꠎꠦꠁ ꠇꠁꠘꠣ ꠡꠘꠗꠤ ꠎꠣꠘꠦ ꠛꠦꠡ ॥
ꠀꠙꠘ ꠝꠞꠖ ꠟꠁꠀ ꠎꠣꠄ ꠝꠣꠁ ꠛꠣꠙꠦꠞ ꠖꠦꠡ ⁕
ꠀꠝꠣꠞ ꠛꠣꠙ ꠜꠣꠁ ꠀꠍꠁꠘ ꠟꠣꠈꠦꠞ ꠡꠖꠣꠉꠞ ॥
ꠔꠥꠝꠣꠞꠦ ꠛꠣꠘꠣꠁꠀ ꠖꠤꠝꠥ ꠢꠤꠋꠉꠥꠟ ꠝꠘ꠆ꠖꠤꠞ ꠊꠞ ⁕
ꠖꠡ ꠙꠣꠌ ꠖꠣꠡꠤ ꠖꠤꠛ ꠈꠦꠖꠝꠔꠦ ꠔꠥꠝꠣꠞ ॥
ꠄꠁ ꠝꠔꠦ ꠘꠤꠡꠤ ꠙꠥꠡꠣꠁ ꠎꠣꠁꠛꠦ ꠎꠦ ꠀꠞ ⁕
ꠇꠦꠅ ꠗꠞꠛꠣ ꠀꠛꠦꠞ ꠍꠣꠔꠤ ꠇꠦꠅ ꠗꠞꠛꠣ ꠛꠣꠔꠤ ॥
ꠢꠣꠡꠤꠔꠦ ꠈꠦꠟꠤꠔꠦ ꠎꠣꠁꠛ ꠌꠣꠁꠞ ꠙꠞ ꠞꠣꠔꠤ ⁕
ꠡꠡꠥꠠ ꠛꠣꠠꠤ ꠉꠦꠟꠣ ꠖꠣꠝꠣꠘ꠆ꠖ ꠌꠣꠘ꠆ꠖꠦꠞ ꠡꠝꠣꠘ ॥
ꠢꠤꠋꠉꠤꠞ ꠢꠥꠐꠇꠤ ꠙꠥꠠꠤꠀ ꠍꠣꠝꠘꠦ ꠖꠤꠟ ꠔꠣꠘ ⁕
ꠈꠣꠘꠣ ꠙꠣꠘꠤ ꠖꠤꠟꠣꠝ ꠛꠥꠁꠗꠤ ꠘꠣꠁ ꠇꠦꠘꠦ ꠌꠣꠅ ॥
ꠡꠣꠟꠣꠞ ꠛꠃꠄ ꠃꠑꠤꠀ ꠛꠟꠦ ꠛꠣꠡꠤ ꠜꠣꠔ ꠈꠣꠅ ⁕
ꠄꠁ ꠡꠛ ꠇꠕꠣ ꠡꠥꠘꠤ ꠢꠦꠐ ꠇꠁꠟ ꠝꠣꠕꠣ ॥
ꠛꠥꠇꠦ ꠙꠠꠤ ꠉꠦꠟ ꠎꠦꠘ ꠜꠣꠖ ꠝꠣꠁꠀ ꠑꠣꠐꠣ ⁕
ꠌꠤꠘ꠆ꠔꠥꠘꠤ ꠇꠁꠘꠣꠞ ꠛꠄꠀꠘ
edit⁕ ꠍꠐꠀ ꠛꠄꠀꠘ ꠌꠤꠘꠔꠥꠘꠤ ꠇꠁꠘꠣꠞ ⁕
ꠀꠞꠦꠇ ꠛꠄꠀꠘ ꠜꠣꠁ ꠔꠣꠔꠦ ꠇꠞ ꠝꠘ ॥
ꠌꠤꠘꠔꠥꠘꠤ ꠇꠁꠘꠣꠞ ꠇꠤꠍꠥ ꠟꠦꠈꠤꠝꠥ ꠄꠈꠘ ⁕
ꠌꠤꠘꠔꠥꠘꠤ ꠎꠦꠁ ꠇꠁꠘꠣ ꠌꠤꠔꠦ ꠔꠣꠞ ꠝꠔꠤ ॥
ꠡꠥꠡꠣꠝꠤꠞ ꠖꠥꠟꠛ ꠇꠁꠘꠣ ꠊꠞꠦ ꠛꠣꠞꠦ ꠡꠔꠤ ⁕
ꠛꠤꠀꠘꠦ ꠃꠐꠤꠀ ꠇꠁꠘꠣ ꠉꠣꠋꠉꠦ ꠡꠤꠘꠣꠘ ꠇꠞꠦ ॥
ꠞꠁꠡ ꠛꠀꠁꠀ ꠖꠤꠟ ꠀꠙꠘꠣ ꠝꠘ꠆ꠖꠤꠞꠦ ⁕
ꠡꠥꠛꠁꠘꠦꠞ ꠕꠣꠟꠦ ꠝꠣꠘ꠆ꠎꠤꠀ ꠖꠤꠟ ꠈꠣꠘꠣ ॥
ꠌꠤꠘ꠆ꠔꠥꠘꠤꠞ ꠡꠥꠡꠣꠝꠤ ꠎꠦꠘ ꠘꠘꠤꠞ ꠇꠣꠘꠌꠣ ꠡꠥꠘꠣ ⁕
ꠄꠁ ꠇꠁꠘꠣ ꠟꠁꠀ ꠎꠦꠛꠣ ꠇꠞꠦ ꠉꠤꠞꠤꠢ ꠛꠣꠡ ॥
ꠍꠄ ꠛꠞꠍꠦꠞ ꠀꠁꠃ ꠛꠣꠠꠦ ꠀꠘꠌꠟꠦꠞ ꠛꠣꠔꠣꠡ ⁕
ꠙꠖ꠆ꠖꠥꠘꠤ ꠇꠁꠘꠣꠞ ꠛꠄꠀꠘ
edit⁕ ꠡꠣꠔꠅꠀ ꠛꠄꠀꠘ ꠙꠖꠖꠥꠘꠤ ꠇꠁꠘꠣꠞ ⁕
ꠀꠞꠦꠇ ꠛꠄꠀꠘ ꠜꠣꠁ ꠔꠣꠔꠦ ꠇꠞ ꠝꠘ ॥
ꠙꠖꠖꠥꠘꠤ ꠇꠁꠘꠣꠞ ꠇꠤꠍꠥ ꠟꠦꠈꠤꠝꠥ ꠄꠈꠘ ⁕
ꠙꠖꠖꠥꠘꠤ ꠎꠦꠁ ꠇꠁꠘꠣ ꠙꠃꠖ ꠔꠣꠞ ꠝꠘ ॥
ꠖꠤꠘꠦ ꠞꠣꠁꠔꠦ ꠈꠦꠖꠝꠔ ꠇꠞꠦ ꠡꠥꠡꠣꠝꠤꠞ ꠌꠞꠘ ⁕
ꠙꠢꠦꠟꠣ ꠉꠤꠀ ꠗꠟꠣꠁ ꠛꠣꠟꠤ ꠅꠋꠉꠦ ꠓꠣꠟꠦ ꠙꠣꠘꠤ ॥
ꠙꠖꠖꠥꠘꠤꠞ ꠝꠞꠖ ꠖꠦꠈ ꠚꠇꠤꠞꠦꠞ ꠘꠤꠡꠣꠘꠤ ⁕
ꠙꠥꠛꠦ ꠖꠤꠀ ꠃꠐꠦ ꠜꠣꠘꠥ ꠀꠛꠞ ꠗꠞꠦ ꠍꠣꠄꠀ ॥
ꠙꠖꠖꠥꠘꠤꠞ ꠡꠥꠡꠣꠝꠤ ꠖꠦꠈ ꠎꠦꠘ ꠇꠣꠘꠌꠣ ꠡꠥꠘꠣ ⁕
ꠀꠞꠅ ꠖꠦꠈꠂꠘ
edit
ꠕꠥꠇꠣꠘꠤ
edit| ꠀ | ꠁ | ꠃ | ꠄ | ꠅ | ꠇ | ꠈ | ꠉ | ꠊ | ꠌ | ꠍ | ꠎ | ꠏ | ꠐ | ꠑ | ꠒ |
| ꠔ | ꠕ | ꠖ | ꠗ | ꠘ | ꠙ | ꠚ | ꠛ | ꠜ | ꠝ | ꠞ | ꠟ | ꠡ | ꠢ | ꠠ | ꠓ |
|
|
|
|
|
|
|
|
|
|
|
