Юлиян Рамач (*21. децембер 1963—†24. юний 2016), визначни музичар, композитор, аранжер, дириґент и музичних фаховец
| Юлиян Рамач Чамо | |
|---|---|
 | |
| Народзени | 21. децембра 1963. |
| Умар | 24. юния 2016 (53) |
| Державянство | югославянске, сербске |
| Язик творох | руски |
| Школа | Штредня музична школа Исидор Баїч Нови Сад |
| Период твореня | 1986—2016. |
| Жанри | музичар, аранжер, композитор, дириґент |
| Поховани | на теметове у Руским Керестуре |
Биоґрафия
Юлиян Рамач народзени 21. децембра 1963. року у Руским Керестуре. Родичи оцец Дюра и мац Леона родз. Медєши. Юлиян бул наймладши спомедзи пецерих дзецох у фамелиї Рамачових. Основну школу закончел у Руским Керестуре. Його позарядови талант за музику препознал Яким Сивч, так же после основней музичней школи, Юлиян Рамач початком 80-тих рокох прешлого вику закончел и Штредню музичну школу Исидор Баїч у Новим Садзе, теорийни напрям и инструменти клавир и фаґот.
Юлиянова музична драга
После законченя стреднєй школи Юлиян Рамач ше уписал на Академию уметносцох у Новим Садзе, одслухал три семестри та претаргнул студиї и 1986. року почал робиц у Доме култури у Руским Керестуре як музични сотруднїк и корепетитор. Попри тим, Юлиян Рамач вецей роки пририхтовал музични точки у вецей наших културно-уметнїцких дружтвох зоз тамтейшима аматерами, або там бул и корепетитор у пририхтованю танцох у нових хореоґрафийох.
Под час роботи у Доме култури у Руским Керестуре Юлиян зоз замеркованим успихом водзел дзивоцки хор, мишани хор, жридлову шпивацку ґрупу (хлопску и женску), парохиялни хлопски хор Церкви св. о. Николая у Руским Керестуре, тамбурови оркестер керестурского Дому култури и вельки народни оркестер Дому култури. Тиж так, вон пририхтовал и дзецински вокални ґрупи.
Попри такей анґажованосци у нашим музичним живоце, Юлиян Рамач Чамо бул и плодни композитор и аранжер. Розписовал аранжмани нє лєм за свойо композициї, алє и за композициї других авторох, котри були виводзени на Червеней ружи або на Ружовей заградки. Треба ту спомнуц же ше Юлиян Рамач Чамо опробовал и у компонованю одвитуюцей музики и за театрални представи за одроснутих и за дзеци.
Як абсолутни слухиста, цо велька ридкосц, грал на клавиятурох и гармоники, на шицких тамбурових инструментох, на дуйних, нє були му страни анї смиково инструменти и за свойо нєполни 53. роки живота зохабел за собу вельке музичне дїло и фахову роботу, цо шлєбодно мож поровнац з дїлом велїканох рускей музики, як цо Яким Сивч, браца Тимково, Витомир Бодянєц, у дзепоєдним их аж и прероснул.
У Доме култури, як музични сотруднїк Юлиян Рамач почал робиц у новембру 1986. року и три децениї бул твардо „звязани” за тоту институцию та мож шлєбодно повесц – цалосна музична дїялносц Дому култури остатнї пар децениї була на Чамових плєцох.
Як цо ношел музичну роботу Дому култури, так бул водзаца особа и у музичним живоце Руснацох на тих просторох. Окреме нашо музични фестивали мали його печац, насампредз Червена ружа и Ружова заградка, з хторима вєдно роснул и Юлин – як композитор, аранжер, дириґент, фахови руководитель.
Юлиян Рамач достал и награду Културно-просвитней заєднїци Општини Кула Зарї култури, подзекованє з нагоди ювилейного Фестивалу.
Музични опус
Юлиян Рамач Чамо компоновал коло 40 нови руски шпиванки у народним духу, коло 15 у забавним и коло 45 дзецински, найвецей на тексти своєй шестри Меланки и брата Михала, велї подоставали и награди на Ружи и Заградки. За нїм числени аранжмани, авторска музика за театрални представи, коло 50 сонґи за дзецински театрални представи, компоновал музичну приповедку Сказка о гушлї и гушлярови за Радио Нови Сад, сотрудзовал з нашима редакциями радия и ТВ, з кулску музичну школу, дириґовал и з Националним оркестром Руснацох, писал за ньго аранжмани… И шицко цо робел, робел з дзеку, вредно, даваюци цалого себе, нє шпоруюци ше.
Як позарядови фаховец у музики свойо музичне знанє и искуство нєсебично преношел и на младших, так же вишколовал велї ґенерациї музичарох, нє лєм у Керестуре, алє и у КУД-ох по местох дзе жию Руснаци.
Попри тим же бул позарядови музичар, Юлина шицки паметаю и як барз доброго чловека, котри нїкому нє превредзел и котри за каждого мал сцерпеня, без нервози и дзвиганя гласу, як у роботи з аматерами, так и вообще.
Юлиян Рамач бул оженєти зоз Татяну родз. Няради и у малженстве мали два дзивчата, Оксану и Олесю.
Юлиян Рамач умар 24. юния. 2016. року. Поховани є на теметове у Руским Керестуре.
На Фестивалу рускей култури Червена ружа од 2016. установена нова манифестация на спомин тому музичному ентузиястови под назву Музични вечар Юлиян Рамач Чамо.
Авторски композициї Юлияна Рамача
| Фестивал култури Червена ружа | |||||||
|---|---|---|---|---|---|---|---|
У народним духу
|
|||||||
| Рок | Композиция | Автор текста | Рок | Композиция | Автор текста | ||
| 1989. | Танєц любови | Мелания Римар | 2001. | Букет младосци | Мелания Римар | ||
| 1990. | У цудзим швеце | Мелания Римар | 2002. | Руски коренї | Мелания Римар | ||
| 1991. | Стари обичаї | Мелания Римар | 2003. | Жиєме любов | Мелания Римар | ||
| 1993. | Ноцни шпиванки | Михайло Зазуляк | 2003. | Нашо Нове Орахово | Любо Рац | ||
| 1994. | Зохабел ме | Амалия Хромиш | 2004. | Писня керестурских ловарох | Михал Рамач | ||
| 1995. | Чувайме свойо | Мелания Римар | 2004. | Салаши | Михал Рамач | ||
| 1996. | Златна свадзба | Мелания Римар | 2006. | Свадзебни дзень | Любомир Загорянски | ||
| 1997. | Шпивай ми | Ясмина Арва | 2007. | Стари леґинь | Михал Рамач | ||
| 1997. | Ширцом по швеце | Мелания Римар | 2008. | Студзенка | Мелания Римар | ||
| 1998. | Гудаци муша грац | Мелания Римар | |||||
| Фестивал култури Червена ружа | |||||||
|---|---|---|---|---|---|---|---|
| У забавним духу | Червене пупче | ||||||
| Рок | Композиция | Автор текста | Рок | Композиция | Автор текста | ||
| 1985. | Михалово лєто | Михал Рамач | 1993. | Велька любов | Владимир Бесерминї | ||
| 1986. | Блуканя ґу златастому | Мелания Римар | 1995. | Таня | Мария Фа | ||
| 1988. | Одходза младосци з очох | Мелания Римар | 1996. | Прешла уж жима | Раде Павелкич/М. Зазуляк | ||
| 1989. | Заорани дильови | Мелания Римар | 1997. | Пре нови амрел | Мелания Римар | ||
| 1989. | Гварел ши ми же одходзиш | Любка Гаргаї | 1997. | Чом Иринка финка | Мелания Римар | ||
| 1991. | Най ружа останє | Владимир Бесерминї | 1998. | Моя школа | Серафина Макаї | ||
| 1993. | Єшеньски нємири | Михайло Зазуляк | 1998. | Фантазиї | Мелания Римар | ||
| 1993. | Дзивоцки чеканя | Михайло Зазуляк | 1998. | Новотни тротинет | Мелания Римар | ||
| 1995. | Знова до цудзини | Михайло Зазуляк | 2001. | Любим Мижа | Янко Николич | ||
| 1996. | По полноци | Мелания Римар | 2001. | Добре пчолом | Мелания Римар | ||
| 1997. | Христово роки | Михайло Зазуляк | 2002. | Моя мамочка | Любомир Загорянски | ||
| 1998. | Тей ноци | Ясмина Арва | 2002. | Прави дїдо | Мелания Римар | ||
| 2003. | Дражка на салаш | Михал Рамач | 2003. | Ми би сцели | Мелания Римар | ||
| 2010. | Чувай ме | Мелания Римар | 2003. | Муки любовни | Мелания Римар | ||
| 2004. | Стреже за мну Сенка | Михайло Зазуляк | |||||
| Червене пупче | 2004. | Мацерово лїки | Мелания Римар | ||||
| 1987. | Лєто у дїда | Мелания Римар | 2006. | Баба метеоролоґ | Мелания Римар | ||
| 1988. | Стари приповедки | Мелания Римар | 2006. | Чаривне путованє | Любомир Загорянски | ||
| 1988. | Нажалєна математика | Мелания Римар | 2007. | Чарни слон | Мелания Римар | ||
| 1988. | Семафор | Владимир Бесерминї | 2007. | Дїдово витамини | Мелания Римар | ||
| 1989. | Зебра | Владимир Бесерминї | 2008. | Пупче мале | Владимир Еделински | ||
| 1989. | Нєясни рахунки | Мелания Римар | 2008. | Цмота нїчовка | Мелания Римар | ||
| 1989. | Бавиц нам ше дайце | Михайло Зазуляк | 2009. | Школа у природи | Мелания Римар | ||
| 1990. | Дзеци без гришки | Мелания Римар | 2009. | Нїяка жима | Мелания Римар | ||
| 1990. | Живи бависка | Мелания Римар | 2013. | Здравко люштавко | Мелания Римар | ||
| 1991. | Цибулько моя | Михайло Зазуляк | 2013. | Стародавни лакотки | (Ю.Рамач - М.Римар) | ||
| 1991. | Лєгко зубарови | Мелания Римар | 2014. | Коцки | (Ю.Рамач - М.Римар) | ||
| 1993. | Нє страшце нас з бубушами | Мелания Римар | 2015. | Чаривни заглавчок | (Ю-Рамач - М.Римар) | ||
| 1993. | Любовна загадка | Михайло Зазуляк | 2016. | Нїч нє прескочим | Мелания Римар | ||
| Ружова заградка | |||||||
|---|---|---|---|---|---|---|---|
| Рок | Композиция | Автор текста | Рок | Композиция | Автор текста | ||
| 1992. | У вербинкох | Мелания Римар | 2005. | Даруй ше | Мелания Римар | ||
| 1993. | Свадзебна | Мелания Римар | 2007. | Млади мешац | Мелания Римар | ||
| 1993. | Буджацка | Михайло Зазуляк | 2007. | Три руски валали | С. Макаї | ||
| 1997. | Одходзим | Ясмина Арва | 2008. | Ноцне шпиванє | Мелания Римар | ||
| 1997. | Любме любени | Мелания Римар | 2010. | Паприґарска | Михайло Зазуляк | ||
| 1998. | Нашо нєдзелї | Мелания Римар | 2012. | Цепли домик | Мелания Римар | ||
| 1999. | Били жими | Мелания Римар | 2014. | Шпиванка лїчи | Мелания Римар | ||
| 2001. | Млада руска андя | Серафина Макаї | 2015. | Дзе любов греє | Мелания Римар | ||
| 2003. | Мам гунцута | Михайло Зазуляк | 2016. | Ми єдно друге маме | Мелания Римар | ||
| 2004. | Руснакова драга | Владимир Дїтко | |||||
Литература
Тамаш, др Юлиян: „Дом културиˮ, Руски Керестур, лїтопис и история (1745-1991), Месна заєднїца Руски Керестур, 1992, бок 419.
Вонкашнї вязи
- Юлиян Рамач Чамо (биоґрафия и список композицийох), Червена ружа 1962-2011, Том II, Завод за културу войводянских Руснацох, Нови Сад, 2014., б. 526-528.
- MUKI LJUBOVNI (МУКИ ЛЮБОВНИ), Проєкт Дома култури Руски Керестур – Червене пупче 2020. Музика: Юлиян Рамач Чамо Текст: Михайло Зазуляк Аранжман: Мирослав Пап
- РУСАЛКА Премиєра: 28.01.2012. Руски Керестур, директор Сашо Палєнкаш, Автор: Штефан Гудак, Режия, адаптация и вибор музики: Михайло Зазуляк, Сценоґрафия: Биляна Роман, Костимоґраф: Таня Орос, Автор музики: Юлиян Рамач Чамо и Яким Сивч
- IN MEMORIAM: Julijan Ramač Čamo (1963-2016), Danas, kultura, 28.06.2016.
- Preminuo Julijan Ramač Čamo, Radio-televizija Vojvodine, Hronika, 24. jun 2016., Novi Sad
- in memoriam Юлиян Рамач Чамо - in memoriam Julijan Ramac Camo, YouTube. РТВ Войводина, Jun 24, 2016
- Revijalna časc, predstavjanje muzičnej tvorčosci Julijana Ramača, 26 Ružova zahradka, 12. marec 2016.