Теофил Сабадош (*13. септембер 1938. - †29. новембер 2012.), поета, хореограф, музичар, адвентистични паноцец
| Теофил Сабадош | |
|---|---|
 | |
| Народзени | 13. септембра 1938. |
| Умар | 29. новембра 2012. (74) |
| Державянство | югославянске |
| Язик творох | руски |
| Школа | квалификовани металски
роботнїк и вожач |
| Период твореня | 1962.- 1980. |
| Жанри | музика, литература, фолклор |
| Поховани | у Неделищу при Вараждинє
(Горватска) |
Биоґрафия edit
Теофил Сабадош ше народзел 13. септембра 1938. року у Руским Керестуре у худобней фамилиї. Оцец Янко и мац Амалия родз. Емейди. Теофил бул наймладши спомедзи пейцох братох. Вчасне дзецинство препровадзел по салашох, дзе його родичи бирешели. До валалу ше приселєли аж теди кед мал почац ходзиц до школи. Перши роки после Другей шветовей войни за шицких жительох Керестура були барз чежки, окреме за худобних, ґу котрим припадала и фамилия Теофила Сабадоша. У таких фамилийох ше дзеци од вчасней младосци сами мушели старац о себе, цо скорей зарабяц свой хлєб. Так то було и зоз Теофиловима братами. Понеже своєй жеми нє мали вельо, кажди з нїх ше опредзелєл за виучованє даякого ремесла. Иста судьба знашла и наймладшого – Теофила. Подобнє як и дзеци з других худобних фамилийох, и Теофил, гоч бул одлични школяр, нє могол предлужиц школованє. Уж после законченей седмей класи основней школи мушел ше цо скорей оспособиц за самостойни живот. Прейґ рижних курсох пошвидко здобул три дипломи полуквалификованого роботнїка металского фаху, а, кед постал полнолїтни, здобул и диплому квалификованого шофера. Нажаль, гоч мал тельо квалификациї, до стаємней роботи у валалє нє мог дойсц.
Кед ше прешвечел же у своїм валалє нє ма добру перспективу за елементарну животну еґзистенцию, Теофил Сабадош ше, як и велї други млади жителє Руского Керестура, ришел поглєдац лєпшу судьбу у иножемстве. Цудзина теди Теофилови випатрала як спасоносне ришенє шицких його еґзистенциялних нємирох. Стаємна робота и добри заробок обецовали лагоднєйши живот. Роботу нашол у Гамбурґу, у Нємецкей.
Активносц у културним живоце edit
Док ше Теофил наздавал же ше му укаже нагода достац роботу у валалє, уключел ше медзи активних членох керестурского Дому култури. Бул дзешец роки член танєчней секциї, а єден рок и як хореоґраф. Бул и єден зоз сновательох младежского оркестра при Доме култури, у котрим теди грали Владислав Надьмитьо, Михал Микита, Янко Гарди, Мирон Джуджар и Михал Чордаш. У тим составе оркестер исновал полни шейсц роки под меном „Шкорванчки“. Тот состав, алє на чолє з Якимом Сивчом, провадзел шицких шпивачох на першей „Червеней ружи“ 1962. року.
Рушаюци ше у кругу талантованих активних членох керестурского Дому култури, Теофил упивал нови знаня и подзвиговал уровень свойого образованя. Бул комуникативни и популарни медзи тедишню младу ґенерацию. Як член музичней секциї перше грал на тамбурки (прим), алє пошвидко го Яким Сивч прешвечел же би почал грац на кларинету. Треба ту спомнуц же Яким Сивч мал значни вплїв на уметнїцке формованє Теофила Сабадоша. Сивч, три роки старши, бул и блїзки сушед Теофилови, бивали на истей улїци.
Поетска творчосц Теофила Сабадоша edit
Теофил Сабадош почал писац ище як школяр. Поетски твори му обявйовани у “Пионирскей заградки”. Перши узретши роботи обявени му у “Литературним слове” 1964 року. Теофил Сабадош обявел и два збирки поезиї - „Одходи" 1971. и „Лїпа" 1975. року, у виданю НВУ "Руске слово", а зоз своїма писнями є заступени и у антолоґиї рускей поезиї "Ошлєпени соловей".
Др Юлиян Тамаш зредаґовал и порихтал другу кнїжку поезиї Теофила Сабадоша а у предисловию, медзи иншим, написал и тото: "Кнїжка писньох Лїпа интимни дньовнїк чловека на роботи у цудзини, хтори вєдно зоз собу однєс пах лїпи родзеного краю... Тримам же збирка Лїпа у власним поетичним розовою Теофила Сабадоша представя крочай напредок... (вона) принєсла рускей литератури єдного узретого поета-роботнїка хтори ше зоз дзепоєднима писнями учишлєл як вредносц хтору зме у видвойованю и типового и антолоґийного нє годни заобиходзиц у наших дальших намаганьох спознац потерашнї можлївосци руского язика."
На роботи у иножемстве Теофила Сабадоша почала, нєодлуга, обшедац носталґия за родимим крайом а носталґични бурї Теофил удатно преточовал до красних писньох. Кед ше на кратки час врацал до Керестура, при каждим стретнуцу зоз парняками и другима познанїками чувствовал лєм почитованє и угляд, окреме пре шпиванку „Мацерова мушкатла“.
Теофил нє писал тексти за музичне оформйованє. Вон бул поет словох, природно талантовани. Алє, змисти його писньох на вецей наших композиторох охабели глїбоки упечаток, та, гоч тексти нє були метрично усоглашени зоз музичнима правилами, композиторе их превжали, метрично доробели и написали одвитуюцу музику.
После пензионованя Теофил ше преселєл зоз Гамбурґу до Горватскей, дзе предлужел жиц у Вараждинских топлицох при Вараждинє. Нажаль, пошвидко ше чежко похорел и бул змесцени у доме Адвентистичней церкви. Там нєсподзивано и умар 29. новембра, а поховани є 1. децембра 2012. року у Неделищу при Вараждинє (Горватска).
Композициї на тексти писньох Теофила Сабадоша edit
| У народним духу | ||
|---|---|---|
| Рок | Композиция | Автор музики |
| 1966. | Качмар, дай нам вино | Яким Сивч |
| 1969. | Мой стари доме | Яким Сивч |
| 1972. | Мацерова мушкатла | Яким Сивч |
| 1988. | Грай, Циґану | Владислав Надьмитьо |
| У забавним духу | ||
| 1964. | Ноц | Яким Сивч |
| 1977. | Придзе час (Пре любов давну) | Яким Сивч |
| 1984. | Тулїпани | Владимир Горняк |
| 2010. | Ноц | Весна Надь |
| Ружова заградка | ||
| 1994. | Вредни руки Руснаково | Дюра Будински |
Литература edit
1. Теофил Сабадош, два писнї. Юлиян Тамаш, Ошлєпени соловей, Антолоґия рускей поезиї, НВУ Руске слово, Нови Сад, 2005, б. 143-145
2. Теофил Сабадош: Одходи, едиция Жридла, НВП Руске слово, 1971.
3. Теофил Сабадош: Лїпа, НВП Руске слово, 1975.
Вонкашнї вязи edit
Теофил Сабадош (биоґрафия и список композицийох на його тексти), Червена ружа 1962-2011, Том II, Завод за културу войводянских Руснацох, Нови Сад, 2014., б. 531.