| Осиф Рац | |
|---|---|
| Народзени | 1897 |
| Умар | 1976 (79) |
| Державянство | угорске, югославянске |
| Язик творох | руски, сербски |
| Школа | основна школа, Руски Керестур |
| Период твореня | 1922—1945 |
| Жанри | привреда, политика, синдикална активносц |
| Поховани | у Руским Керестуре |
Осиф Рац (*1897—†1976), привреднїк, социялдемократа, синдикални активиста, симпатизер и активни помагач НОБ.
Биоґрафия
Осиф Рац ше народзел у Руским Керестуре (Бачкерестуре) 1897. року. Мал брата Штефана. До основней школи Осиф ходзел у Руским Керестуре.
У першей шветовей войни як австро-угорски вояк бул на русийским фронту. Ту бул 1917. року зарабровани. До Руского Керестура ше врацел 1920. року. У Русиї упознал комунизем, алє му були блїзши идеї социялдемократох. Природно интелиґентни и способни привреднїк Осиф Рац ше намагал и у своїм валалє запровадзиц привредну справедлївосц. Так 1929. року уложел власни средства и орґанизовал кооперативну млєкарню. Нажаль, пре шветову економску кризу вона нє посцигла значнєйши успих. Медзитим, то нє застановело аґилного привреднїка. Вон сцел доказац же нє лєм Нємци способни орґанизивац у своїх населєньох индустрийни подприємства за преробок польопривредних продуктох. Так, маюци у валалє вельки количества конопи, вон 1934. року орґанизовал кооперативну задружну конопарню зоз коло 50 роботнїками. Орґанизовал и польопривредну задруґу Перши май и обезпечел порту за будованє задружного дому.
Осиф Рац ше оженєл зоз Юлу. У малженстве мали синох Кирила и Юлина.
У чаше медзи двома шветовима войнами Осиф Рац ше анґажовал и на културно-просвитним полю у рамикох Културно-просвитного союзу югославянских Руснацох. Предплатнїком роздзельовал у валалє новини Заря.
Синдикална и родолюбива активносц
У медзивойновим чаше бул блїзки дїялносци КПЮ и сотрудзовал зоз Йосипом Крамером, секретаром СК КПЮ. Бул активни у орґанизованю Синдикалней подружнїци УРС 1936. року. Истого року орґнизовал штрайк польопривредних роботнїкох и заступал керестурских польопривредних роботнїкох у розгваркох зоз роботодавцами.
Под час войни (1941-1945) активно сотрудзовал зоз НОР-ом. У його млїнє у Керестуре була вяза з партийним руководством Кули и Вербасу. За НОБ давал вельку помоц у муки и пенєжу. Окреме помагал фамелийом зоз хторих хлопи були одогнати до концентрацийних лаґрох.
По ошлєбодзеню бул вибрни за члена СНОО Кула и окончовал длужносц референта за социялне старанє. Медзитим, на початку 1945. року процив нього члени СК КПЮ зоз Керестура поднєсли прияву и на тот способ го виключели зоз явного живота. Так Осиф Рац, без доказаней вини, бул преглашени за народного нєприятеля а маєток му бул конфисковани.
Пре вимсценє чи пре нєлоялну борбу за власц тот визначни житель Руского Керестура, привреднїк, хтори шнїл о привредним розвою свойого валал заснованим на справедлївих одношеньох привреднїкох и роботнїкох, и пробовал таке и запровадзиц, синдикални активиста, симпатизер и активни помагач НОБ, чисти пред своїма Керестуцами, нє дожил же би го и власци регабилитовали.
Осиф Рац умар у Руским Керестуре 1976. року. Поховани є на теметове у Руским Керестуре.
Литература
- Тамаш, др Юлиян: "Осиф Рац (1897-1976)", Руски Керестур, лїтопис и история (1745-1991), Месна заєднїца Руски Керестур, 1992, бок 404.
Вонкашнї вязи
https://rdsa.tripod.com/svadzba1.htm Свадзба у Рацових, Г. Колєсар, вебсайт Руснаци у Панониї.