Др Мафтей (Матей) Винай ( * 18. марца 1898. Руски Керестур - †8. децембра 1981, Суботица) поет, публицист, просвитни роботнїк, адвокат и судия.[1]
Др Мафтей ВИНАЙ | |
---|---|
Народзени | 18. марца 1898. Руски Керестур |
Умар | 8. децембра 1981, Суботица |
Державянство | Австро-Угорске кральовство, югославянске |
Язик творох | руски |
Школа | Класична ґимназия, Заґреб |
Универзитет | Правни факултет, Заґреб |
Наукови ступень | Доктор правних наукох |
Период твореня | 1925-1975 |
Жанри | поезия, публицистика |
Поховани | У Суботици |
Награди | „Искри култури“ КПЗ Войводини 1975. |
Биоґрафия edit
Мафтей Винай ше народзел 18. марца 1898. року у Руским Керестуре, оцец Митро и мац Маря народзена Дудаш (Данкова). У Руским Керестуре закончел основну школу (1909), класичну ґимназию у Заґребе (1909-1917). На Правним факултету, тиж у Заґребе, Мафтей Винай дипломовал 1924. року а докторску дисертацию одбранєл на истим факултету 1928. року.
Роботна кариєра edit
Ище як студент права, же би обезпечел средства за дальше школованє, Мафтей Винай робел як учитель на Билей (под Кулу), потим як судски службенїк у Вуковаре и Осиєку (1926-1927). После докторованя робел у Новей Ґрадишки. Як судия Мафтей Винай почал робиц у Окружним суду у Сримскей Митровици, алє поднєс одказ на службу и отворел власну адвокатску канцеларию у Вуковаре (1932-1934). Пошвидко ше врацел до Руского Керестура, а робел як срезки подначальнїк у Кули (1936-1941). Под час Другей шветовей войни мадярска окупацийна власц го премесцела на службу до Оджаку (1941-1944).
После ошлєбодзеня Мафтей Винай робел як викладач у ґимназиї у Руским Керестуре, од єй снованя 1945. та по 1952. рок. Преходзи на службу до Кули, дзе роби як судски референт, а потим до Суботици, дзе 1962. року одходзи до пензиї. Мафтей Винай там остал жиц по конєц живота (8. децембер 1981. року), а там є и поховани. [2]
Творчосц edit
Мафтей Винай почал писац ище як школяр ґимназиї. Перши писнї му обявени у Руским календаре за 1925. рок. Його писнї од самого початку на озбильним уметнїцким уровню, коректно виградзени, язично чисти и зоз стабилну поетику. Остал у историї рускей литератури першенствено як лиричар хтори ше надовязовал на поезию Гавриїла Костелника[3] и медзи двома войнами вон здобул угляд найлєпшого руского поети после Костелника.
Вєдно з Михайлом Ковачом[4] Мафтей Винай пририхтал до друку Руско-українски алманах бачванско-сримских писательох (1936), а вишла му и окремна збирка його писньох под насловом Ровнїно моя широка (1973), котру до друку пририхтал учитель и поет Василь Мудри.
Награди edit
Ношитель є награди Искри култури КПЗ Войводини (за 1975. рок), а од 2001. року Руснаци у Суботици кажди рок орґанизую литературну манифестацию под назву Яр др Мафтея Виная.
Вонкашнї вязи edit
Ирина Папуґаː 110 роки од народзеня др Мафтея Виная (1898-1981), Studia Ruthenica, Дружтво за руски язик, литературу и културу, ч.8, 2001-2003, б. 86-89
Ирина Папуґаː 110 роки од народзеня др Мафтея Виная (1898-1981), Studia Ruthenica, Дружтво за руски язик, литературу и културу, ч.8, 2001-2003, б. 86-89
Татяна Таґасович (Винай): Мой оцец ми приповедал, Здогадованє на др Мафтея Виная, Studia Ruthenica, Дружтво за руски язик, литературу и културу, ч.8, 2001-2003, б. 84-85.
Ґалерия edit
Референци edit
- ↑ Др Мафтей Винай, биоґрафия на НАР
- ↑ Руски календар за 1925. рок У моїм валалє б. 114, Злате дзецко мойо б. 118, Фара б. 120, Воденїца б. 124
- ↑ Др Гавриїл Костельник, биоґрафия на НАР
- ↑ Михайло Ковач, биоґрафия на НАР