Wp/rsk/Василь Мудри

Василь Мудри (*13. III 1930. - †22. VII 2016.), наставнїк, писатель и културни творитель

Василь Мудри
Народзени	13. марца 1930.
Умар	22. юлия 2016. (86)
Державянство	югославянске, сербске
Язик творох	руски
Школа	Учительска школа у Сримских Карловцох
Универзитет	Педаґоґийна школа - русийски язик у Шабцу
Период твореня	1950-2017
Жанри	просвита, литература, култура
Поховани	Руски теметов у Шидзе
Награди	Награда Републики Србиї "25 мај" (1970), "Златна значка" (1980), войводянска награда з обласци школства "Партизански учитель" (1990)

Биоґрафия

Василь Мудри народзени у Дюрдьове, Сербия, 13. марца 1930). Оцец Данил (1907-1974) и мац Мария, народзена Полдруги (1906-1993) мали двойо дзеци, сина Василя и дзивче Наталию (1936). Василь Мудри основну школу од I-VI класу закончел у Дюрдьове (1937-1943), два класи гражданскей школи у Новим Садзе (1943-1944), а трецу и штварту класу нїзшей ґимназий у Руским Керестуре (1945-1946). После положеней малей матури уписал ше до учительскей школи хтору закончел у Сримских Карловцох (1946-1950). Познєйше попри роботи (позарядово) закончел Висшу педаґоґийну школу - русийски язик у Шабцу (1968).

Василь Мудри бул оженєти зоз учительку Меланию нар. Планчак (Руски Керестур, 1933) зоз хтору маю двойо дзеци - дзивку Меланию (1958) и сина Бориса (1965).

Жил и робел у Шидзе, дзе и умар 22. юлия 2016. року. Поховани є на Руским теметове у Шидзе.

Педаґоґийна и новинарска робота

После законченей учительскей школи Василь Мудри почал робиц у Редакциї новинох „Руске слово" у Руским Керестуре як новинар и редактор дзецинского часопису „Пионирска заградка". Два роки познєйше преподавал руски язик у Основней школи у Дюрдьове (1953-1955). После тога ознова преходзи до „Руского слова" у Руским Керестуре (1955-1960), же би ше 1960. године (зоз фамелию) преселєл до Сриму дзе од 1960. по 1962. рок, перше робел як учитель у Дзецинским (покраїнским) шпиталю за ТБЦ на Принциповцу, а после тога як наставнїк русийского и руского язика у Основней школи „Йован Йованович Змай" у Соту (1962-1981) дзе штири роки бул и директор школи. Од 1981. по одход до пензиї 1991. року робел у Основней школи „Сримски фронт" у Шидзе як наставнїк русийского язика. Источашнє преподавал и руски язик як мацерински нашим руским школяром.

Скупштина Дружтва за руски язик, литературу и културу 1981. року. З лїва: Гавриїл Колєсар, предсидатель, Дюра Варґа, Василь Мудри, Микола Каменїцки, Мария Латяк и секретар Янко Рац

Активносци у рамикох Дружтва за руски язик, литературу и културу.

Василь Мудри бул єден з зоз сновательох Дружтве за руски язик, литературу и културу 1970. року у Новим Садзе и його перши подпредсидатель и други по шоре, такой после шмерци Миколи М. Кочиша (1928-1973) предсидатель (1973-1974) року, а тиж и длугорочни предсидатель Подружнїци, тераз Секциї Дружтва у Шидзе. Окремну усиловносц у науковей дїялносци Дружтва уложел на пририхтованю Сербско-руского словнїка. У периодзе од 1973. по 1975. рок робел на ексцерпциї рускей лексики. За руски словнїк обробел шейсц букви – Ж, З, И, Л, ЛЬ и М – вєдно 12 000 одреднїци, хтори обявени - I том 1995 и II том 1997. року.

Литературна робота

Василь Мудри свою першу писню, под назву „Нашей ґимназиї" обявел 21. децембра 1945. року у „Руским слове" (Руски Керестур). Писал писнї за дзеци, писнї за одроснутих як и литературни прикази и школски учебнїки. Писнї му обявйовани на вецей язикох: сербским, словацким, мадярским румунским, македонским и українским язику. Обявени му коло 300 писнї (стихи) за дзеци и вецей як 70 за одроснутих. Заступени є у шлїдуюцих антолоґийох: Антология поезиї, Руске слово, Руски Керестур, 1963; Антология дзецинскей поезиї, Руске слово, Руски Керестур, 1964; Ирина Гарди Ковачевич, Облак на верху тополї, антология дзецинскей поезиї, Руске слово, Нови Сад, 1990 и Светислав Ненадович, Међе певања, антологија шидских песника, Шид 1994.

Василь Мудри автор двох кнїжкох писньох за дзеци Подшнїжнїки викукую, писнї за дзеци, Руске слово, Нови Сад, 1973; и Будзенє яри, писнї за дзеци, Руске слово, Нови Сад, (2014).

Василь Мудри писал и тексти на хтори му компоновани понад 20 композициї хтори виводзени на „Червеним пупчецу" (у рамикох Фестивалу култури „Червена ружа" у Руским Керестуре), потим Фестивалу "Ружова заградка" у Новом Садзе, радийских емисийох итд. У Шидзе, на тим планє сотрудзовал зоз композитором Славком Загорянского (Бачинци, 1947).

Вшадзи дзе у школох робел як просвитни роботнїк Василь Мудри порушовал роботу литерарних секцийох у рамикох хторих ше зявйовали нови мена младих писательох, медзи хторима Амалия Балоґ-Ґерлах и Янко Грубеня (Дюрдьов), Нада Роман (Бикич Дол), а замеркована була и його робота зоз рецитаторама основних школох у Шидзе: Снежану Чордаш, Весну Цирба, Наду Хромиш, Сладяну Румпли итд.

Робота на учебнїкох и наукова дїялносц

Василь Мудри составел дзевец наслови читанкох, учебнїкох и школских лектирох за наставу руского язику у основним образованю. Єдна читанка у коавторстве зоз др Яковом Кишюгасом, як и други наслови од 1951. по 2005. рок дожили 21 виданє. Попри того бул рецензент 20 читанкох, учебнїкох, лектири, романох и референт 11 учебнїкох, як и лектор числених руских виданьох.

Литературни огляднуца

У вязи зоз литературну роботу Василя Мудрого др Юлиян Тамаш думаня же Василь Мудри зоз своїм интресованьом за збуваня у руским литературним живоце дал значне доприношенє розвиваню свидомосци о потреби пестованя уметнїцкого слова у рускей литератури. Др Тамаш Василя Мудрого видзи насампредз як дзецинского писателя чийо стихи разумлїви широкому кругу читательох, полни полєту и одушевия, окреме стихи обнови и вибудови у повойновим периодзе.

Владимир Костелник наглашовал же тематика писньох за дзецу Василя Мудрого блїзка и актуална каждей ґенерациї дзецох окреме такволаного другого ступня возросту, односно тим хтори прекрочели праг школских дзверох и хтори ше воспитую же би почитовали родичох, наставнїкох, школу, природу. Владимир Костелник, тиж наглашовал же ше стихи Василя Мудрог лєгко читаю бо им ритем чечни, а легки су и за рецитованє и паметанє.

Награди

Василь Мудри за свою педаґоґийну, литературну и културно-уметнїцку роботу приял вецей награди мези хторима: припознанє у обласци образованя и култури Републики Србиї "25 мај" (1970) и "Златна значка" (1980), як и войводянску награду з обласци школства "Партизански учитель" (1990).

Литература

1. др Јулијан Тамаш, Русинска књижевност, Матица српска, Нови Сад, 1984, 188-189;

2. др Юлиян Тамаш, Поет Василь Мудри, Литературне слово, "Руске слова", Нови Сад, VI 1979, 6;

3. Янко Рац, Приручнїк дзецинского живота, Шветлосц IX, Руске слово, Нови Сад, 1973, 4, 430-432;

4. Владимир Костелник, Подшнїжнїки викуку - поезия за дзеци, Нова думка, III, Вуковар, 1774, 69-71;

5. Штефан Гудак, 70 роки живота и 55 роки творчей културно-уметнїцкей роботи - Василь Мудри (1930), "Studia ruthenica" 7, Нови Сад, 1999-2000, 119-123;

6. Владимир Дїтко, Шейсц децениї творчосци Василя Мудрого - учитель и писатель цали роботни вик, Руске слово 32, Нови Сад, 12. 08. 2005,9.

7. Сенка Славчев, 75 роки народзеня и 60 роки културно-уметнїцкей роботи Василя Мудрого, "Studia ruthenica" 11, Нови Сад, 2006, 135-137.

Библиоґрафия Руснацох у Югославиї 1918-1980, Матица сербска, Нови Сад, 1990, 380;

8. Василь Мудри: О роботи на Сербско-руским словнїку, Studia ruthenica чис. 5 (18) 1996-1997,  б. 56

9. Ирина Папуґа: Василь Мудри и його соструднїцтво зоз Славком Загорянским на планє компонованя руских шпиванкох, Studia ruthenica чис. 12 (25), 2007, б.148-151.

10. Василь Мудри (1930–2016), наставнїк, писатель и културни творитель, Studia ruthenica чис. 22 (35), 2017, б. 159

Тексти за композициї

У забавним духу

1983. Нова держава

У народним духу

1984. Спреведзена

1991. Так сцела мамка твоя

1995. Привит

1995. Любов мацерина

Червене пупче

1973. Хора бабка

1976. Шицких нас чува оцовщина

1979. На початку школского рока

1983. Нашо швето - Дзецински хор "Шкорванчки"

1984. Нашо дзецинство

1986. Змаржлїва Юста

1986. Чудне путованє

1987. Мала кресцанка

1987. Родичи и школа

1991. Сова

1993. Рибарска

1995. Чудне путованє

1996. Привит ластовичком

2002. Купанє, плюсканє

2003. Мам я товариша

(?) Пионирска хусточка

(?) Розлука зоз гайом

(?) На вибдови

Ружова заградка

1991. Другому ши шерцо дала - Михайло Бодянец

1992. Розчарованє

1993. Заграйце ми

1994. Руснак

1995. Свадзебна писня

1997. Препадли надїї