Йоаким Холошняй (*25. януар 1932—†19. марец 2017), священїк, писатель, музичар, вельорочни дюрдьовски парох, протоєрей ставрофор, бачки декан, руски културни дїятель.
| Йоаким Холошняй | |
|---|---|
 | |
| Народзени | 25. януара 1932. |
| Умар | 19. марца 2017.(85) |
| Державянство | югославянске, сербске |
| Язик творох | руски, сербски |
| Школа | Ґимназия у Вербаше |
| Универзитет | Римокатолїцки богословски
факултет у Заґребе |
| Период твореня | 1958—2016. |
| Жанри | богословия, шпиванє (тенор),
култура |
| Поховани | на теметове у Дюрдьове |
Биоґрафия
Йоаким Холошняй народзени 25. януара 1932. року у Руским Керестуре, у фамилиї Матїйових, од оца Мирона и мацери Левони. У Руским Керестуре закончел два класи основней школи по руски, у чаше Другей шветовей войни три класи по мадярски, и на концу штири класи нїзшей ґимназиї по руски. Три класи ґимназиї и Вельку матуру Йоаким Холошняй закончел у Державней реалней ґимназиї у Вербаше 1951. року.
Дзекуюци школованю у Рускей ґимназиї, окреме под уплївом трох визначних наставнїкох: Гавриїла Надя, професора др Мафтея Виная и Яши Бакова, здобул общеславянски и общеруски погляди и руску свидомосц. Тоти професоре допринєсли и його нїґда нєзагашеному вирскому и церковному опредзелєню.
Як студент бул питомец Грекокатолїцкей семинариї у Заґребе. Семинария на ньго охабела глїбоки шлїди грекокатолїцкей церковносци.
Бремя лєгкоє священїческей служби о. Йоаким Холошняй дзелєл зоз свою панїматку Амалию нар. Микловш, з котру бул повинчани 21. априла 1958. р. у Дюрдьове. Радикално почитуюци церковни “погляди” о малженстве, народзели и по християнски воспитали аж седмеро дзеци (Борис, Михаил, Николая, Татиана, Иван, Мария и Александра) од котрих двоме синове тиж прияли сон иєрейства.
Йоаким Холошняй за священїка рукоположени од кир Гавриїла Букатки у Руским Керестуре, на кирбай, 9. мая 1958. р. На пошвецаню бул присутни и Суботицки владика, кир Матия Звеканович. Сослужели 40 паноцове.
Душпастирска робота
Од єшенї 1958. року по єшень 1962. року Йоаким Холошняй службовал у Печну, Ґрабру, Прибичу, з биваньом у парохиї Печно. По 1971. р. службовал у Миклошевцох, одкаль даскельо роки служел и у Берку.
За управителя парохиї у Дюрдьове о. Йоаким Холошняй бул меновани 14. октобра 1971. року, а од 1979. року бул и бачки декан. З Дюрдьова, през 20 роки (1981–2001) управял и з парохию Ґосподїнци. Окрем пароховского служеня, о. Йоакима Холошняя, знашли и висши священїчески служеня. Владика Гавриїл Букатко го 1979. р. меновал за протопрезвитера бачкого. Од снованя Викарияту за Сербию и Чарну Гору 1999. р. та по його преставанє, кед 28. авґуста 2003. року основани Еґзархат за грекокатолїкох у СЧГ, о. Йоаким Холошняй окончовал длужносц епископского викара.
Од 12. октобра 1983. року о. Холошняй бул член Литурґийней и Будовательней ради Крижевского владичества, Конґреґация за Восточни Церкви одликовала о. Йоакима з чином протопрезвитера ставрофора 1985. року а 1986. постал конзултор, док член Священїцкей ради постал 1988. року. До Литурґийней и Будовательней ради ище раз бул меновани 1989. року.
Паноцец Йоаким Холошняй барз вельо будовал – у церковней порти у Дюрдьове збудовал пасторални центер з красну салу и другима просториями. Оправял и адаптовал парохийни дом и церкву, на хторей поробени нови верх на турнї, обновена нукашньосц церкви. На теметове у Дюрдьове збудована и стилска каплїца з криптами за хованє, вон участвовал у вибудови парохийного дому нашей церкви у Ґосподїнцох.
Културна дїялносц
О. Йоаким Холошняй и писал – приповедки, алє и популарно-науково твори. Кед вирнїки 1990-их рокох достали право явносци, на жаданє управи Руского слова, од 9. януара 1998. року по 13. октобер 2000. року у каждим чишлє новинох мал кратки напис под общим насловом Упознайме християнство. Вец, 13. октобра 2000. року му кратко поведзене же би свойо писаня вецей нє посилал. Од 13. януара 2001. року сотрудзовал у Дзвонох и писал колумни под общим заглавйом Упознай свой обряд.
Попри тим, о. Йоаким Холошняй остал запаметани як вельки познаватель церковней музичней творчосци и як позарядови интерпретатор церковного шпиваня, окреме Карпаторуского розшпиву. Особлїво ше памета його шпиванє, його красни тенор, а познате же цала його фамелия барз музикална. О. Йоаким Холошняй роками шпивал у Церковним хору Розанов. Його соло-партия у Отче наш, композитора Дубеньского, а у виводзеню хору Розанов – здобула антолоґийне значенє.
О. Холошняй бул заинтересовани за промовованє карпатского простопиянїя. Вон основал хор фамелиї Холошняй (Семействени хор Холошняй), хтори знял три авдио-касети литурґийней музики восточного обряду. Вон тиж пририхтал и обявел (зоз Марию Холошняй) музичну антолоґию карпатского простопинїя, Зборнїк вибраних писньох зоз Саночного, Служби Божей и Парастасу карпаторуского богослужебного розшпиву (1996).
Окрем священїцкей роботи, бул активни и на других подручох, так же мал значну улогу и у снованю Рускей одлоги (музейней збирки) у Дюрдьове. О. Йоаким Холошняй, вєдно зоз сином Михаїлом, поставел у дюрдьовскей парохиї стаємну виставу рускей етноґрафиї (Руска одлога) у хторей 1229 артефакти з материялней култури Руснацох а до хторей уключени и твори руско-канадского уметнїка Юлияна Колєсара. Културни скарб з їх привредного, културно-просвитного и дружтвеного живота Руснацох у тим валалє чува ше у рамикох грекокатолїцкей парохиї у Дюрдьове.
Йоаким Холошняй бул вельки прихильнїк рускей/русинскей ориєнтациї по чим го паметаю и почитую велї Руснаци у Войводини.
О. Йоаким Холошняй протоєрей ставрофор и вельорочни дюрдьовски парох, котри на тей длужносци службовал нєполни 46 роки, умар 19. марца 2017. у Дюрдьове у 86. року живота. Поховани є на дюрдьовском теметове.
Литература
- Paul Robert Magocsi. Kholoshniai Ioakim. //Encyclopedia of Rusyn History and Culture (Revised and expanded ed.). Toronto Buffalo London: University of Toronto Press, 2005. p. 234. ISBN 0-8020-3566-3.(анґл.)
- о. Йоаким Холошняй: Настава виронауки у основних и стреднїх школох на руским язику, Studia Ruthenica, Дружтво за руски язик, литературу и културу, ч. 8, 2001-2003 б. 16-18.
Вонкашнї вязи
- Руска одлога. Веб сайт Заводу за културу войводянских Руснацох, Нови Сад.
- Йоаким Холошняй, Википедия,
- 80 ROKI SVJAŠČENJIKA JOAKIMA HOLOŠNJAJA - Avtorka Helena Korpaš, YouTube, 2017.
- Умар дюрдьовски парох и бачки декан о. Йоаким Холошняй. О. Миз, Руске слово, Рутенпрес, 20. марец 2017.
- Поховани дюрдьовски парох о. Йоаким Холошняй. Сас, Руске слово, Рутенпрес, 22. марец 2017.
- LITURGIJA JOANA ZLATOUSTOHO – Špivaju Protojerej stavrofor o. Joakim M. Hološnjaj (1932-2017), panjimatka Amalija i jih dzeci Boris, Mihail, Nikolaja, Tatiana, Ivan, Marija i Aleksandra, Djurdjov, YouTube, Makovcanj, 2016.
- OTČE NAŠ - Hor ROZANOV, Djurdjov, YouTube, Makovcanj, 2016.
- OTČE NAŠ - Špivaju Protojerej stavrofor o. Joakim M. Hološnjaj (1932-2017), panjimatka Amalija i jih dzeci Boris, Mihail, Nikolaja, Tatiana, Ivan, Marija i Aleksandra, Makovčanj, YouTube, 2019.
- IŽE HERUVIMY - Hor fameliji HOLOŠNJAJ zoz Djurdjova
- VIRUJU - Hor fameliji HOLOŠNJAJ zoz Djurdjova - Špivaju Protojerej stavrofor o. Joakim M. Hološnjaj (1932-2017), panjimatka Amalija i jih dzeci Boris, Mihail, Nikolaja, Tatiana, Ivan, Marija i Aleksandra, YouTube, Makovcanj, 2019.
- Famus tenor Joakim Hološnjaj - YouTube, 2020.
- Famus tenor Priest Joakim Holosnyaj - Mihail Holosnjaj, YouTube, 2022.
- Тройнїсте Господи помилуй, соло Йоаким Холошняй, 1958 р, Mihail Holosnjaj,YouTube, 2022.