Кир Йоаким др Сеґеди (*27. октобер 1904. - †20. марец 2004.), надвадика, парох керестурски, владически викар за Бачку, титуларни владика гисарийски, ґенерални викар Крижевского владичества, Апостолски администратор Крижевского владичества.
| Кир Йоаким др Сеґеди | |
|---|---|
| Народзени | 27. октобра 1904 |
| Умар | 20. марца 2004. (100) |
| Державянство | австроугорске, югославянске |
| Язик творох | руски |
| Школа | Ґимназия Вербас, Осиєк, Травник |
| Универзитет | Богословия Заґреб, Инсбрук, Рим |
| Наукови ступень | докторат |
| Период твореня | 1927. - 1983 |
| Жанри | богословия, духовни науки, публицистика |
| Поховани | Руски Керестур |
Биоґрафия edit
Йоаким Сеґеди ше народзел у Руским Керестуре 27. октобра 1904. року. Оцец Микола и мац Мария, родз. Пап. Основну школу закончел у своїм валалє, ґимназию у Вербаше 5 класи, у Осєку шесту, а у Травнику 7. и 8. Богословию започал студирац у у Заґребе (перши рок), вец 3 роки у Инсбруку, Австрия. Школованє предлужел на Универзитету Ґреґорияни у Риме и закончел з докторатом з Литурґики 5. юлия 1930. року[1].
Священїцка дїялносц edit
Нїзши священїцки чини Йоаким Сеґеди приял 7. юлия 1924. року у Заґребе. Иподияконство приял у Велеграду у Моравскей 22. юлия 1927. року, за диякона є преглашени 31. юлия 1927. року у України. За священїка є пошвецени нєоженєти 4. септембра 1927. року у Руским Керестуре а пошвецел го владика Дионизий Няради.
Од 1. септембра 1930. року др Йоаким Сеґеди служел як духовнїк у нашей семинариї у Заґребе. У медзичаше єден рок (1932-1933) бул капелан у Коцуре. Владиков секретар постал 1. септембра 1936. року, а од 1. октобра истого року по 5. фебруар 1938. року бул управитель парохиї у Ґрабру.
По 1941. рок вон бул економ владичества, а од 25. априла 1941. року парох у Руским Керестуре и делеґат владичества за Бачку. Од 1. авґуста истого року др Йоаким Сеґеди постал викар калочского владичества, як администратора за Бачку, бо Бачка теди була под мадярску окупаторску власцу.
По законченю Другей шветовей войни, кед апостолска администратура знова подпадла под Крижевску епархию, др Йоаким Сеґеди постал владически викар за Бачку, а 1948. року и бачки декан по 1959. рок. Теди го Папа Пий ХІІ меновал за папского прелата зоз титулу Монсиньор, а апостолски протонар постал 30. децембра 1961. року[2].
Титуларни владика гисарийски и помоцни владика крижевски постал 1963. року[3]. За владику др Йоаким Сеґеди пошвецени у Риме 28. юлия 1963. року у базилики св. Петра. Пошвецел го митрополит львовски Йосиф Слїпий и владикове Гавриїл Букатко и апостолски еґзарх Авґустин Горняк зоз Лондону. Участвовал на Другим Ватиканским соборе 1963. и 1964. року, а як владика ище три роки бул на парохиї у Руским Керестуре.
Значне ту спомнуц же ище 1954. року др Йоаким Сеґеди уведол у Руским Керестуре нови календар, котри прилапело лєм Нове Орахово а, по розпаду бувшей Югославиї, и Руснаци у Горватскей.
У Руским Керестуре др Йоаким Сеґеди бул парох полни 25 роки, од 1941. по 1966. рок.
Член и консултант Священїцкей ради постал 12.октобра 2983. року[4].
Др Йоаким Сеґеди ше пензионовал 26. октобра 1984. року у Заґребе.
Литературна и публицистична дїялносц edit
Др Йоаким Сеґеди написал значне число наукових и публицистичних статьох:
- популарни водитель през литурґию восточного обряду (“Божествена литурґия”, (1979);
- общи историйни виглєдованя о Крижевским владичестве (1978) и о каждей парохиї у Осиєцким викарияту (1980-82);
- уводни опис о живоце Руснацох у Руским Керестуре (“Було то кедишик у Керестуре”, 1973);
- обсяжни звит о рускей/русинскей дїдовщини у сиверней Мадярскей и восточней Словацкей (“У краю своїх предкох”, 1977).
Шицки тоти роботи, обявени з Владическим виснїку у рочним церковним Християнским календаре у Руским Керестуре, представяли християнску (грекокатолїцку) перспективу часу кед церква мала огранїчени приступ явним медийом у бувшей комунистичней Югославиї.
Др Йоаким Сеґеди умар 20. марца 2004. року на клинїки „Ребро“ у Заґребе у 100. року живота, 77. року священства и 41. року владичества. Поховани бул перше до олтара у керестурскей церкви 27. марца 2004. року, а вец труна пренєшена до новозбудованей крипти при церкви.
Литература edit
1. о. проф. др Роман Миз: Священїки дакедишнього Осєцкого викарията, Видавателє Парохия св. ап. Петра и Павла, Нови Сад и „Максима“, друкарня и видавательна хижа, Петроварадин, 2016, б.287-290.
Референци edit
- ↑ Режак Михайло (1997). Християнски календар 1998. Нови Сад: Грекокатолїцка парохия Св. Миколая у Руским Керестуре, б. 46
- ↑ Владислав Варґа (2002). Християнски часопис Дзвони, за 2003. рок. Нови Сад: Грекокатолїцка парохия Св. Миколая у Руским Керестуре, б. 138.
- ↑ Михайло Макаї (1977). Християнски календар 1978. Руски Керестур: Войводянски викарият крижевского владичества, б. 27.
- ↑ Владикова биоґрафия. Християнски часопис Дзвони, 15. април 2004.