| Авґустин Горняк | |
|---|---|
| Народзени | 7. октобра 1919. |
| Умар | 16. новембра 2003. (84) |
| Державянство | югославянске, анґлийске |
| Язик творох | руски, анґлийски |
| Школа | ґимназия у Вербаше |
| Универзитет | богословски студиї Заґреб, Рим |
| Наукови ступень | доктор канонского права (1947) |
| Период твореня | 1945–1987 |
| Жанри | богословия, канонске право |
| Поховани | Поховани у грекокатолїцкей
церкви у Коцуре |
Авґустин Горняк (*7. октобер 1919–†16. новембер 2003), бул владика у Велькей Британиї з обовязку же би ше старал о грекокатолїкох у Анґлиї, Велсу, Шкотскей и на Британских островох.
Биоґрафия
Авґустин Горняк ше народзел у Коцуре 7. октобра 1919. року як Еуґен (Йовґен) Горняк. Оцец Петро а мац Юлияна родз. Финдрик. Основну школу закончел у Коцуре а гимназию у Вербаше и Славонскей Пожеґи. Богословски студиї Еуґен Горняк почал у Заґребе 1939. року предлужел их у Риме дзе студирал церковне право. Титулу доктора канонского права здобул 1947. року. За паноца Еуґен Горняк бул пошвецени у Риме 25. марца 1945. року.
Службованє
Священїцку дїялносц Еуґен Горняк почал у януаре 1947. року у ЗАД. Року 1956. у Мондери, у Канади, Еуґен Горняк вошол до чину святого Василия. Вон теди вжал мено Авґустин. За владику є пошвецени у Филаделфиї 26. октобра 1961. року. Теди бул меновани за помоцнїка кардиналови Ґолдфрийови у Велькей Британиї. Од 1963. року вон бул самостойни еґзарх за грекокатолїкох у Анґлиї, Велсу, Шкотскей и на Британских островох. Як владика зоз шедзиском у Лондону, Авґустин Горняк розвил вельку дїялносц у орґанизациї грекокатолцскей церкви у Велькей Британиї [1].
Активносци
Як богослов вон писал поезию. Писнї му обявйовани у часопису за младих Думка хтори виходзел у Руским Керестуре. Його обявени писнї були патриотского змисту[2].
Од 1977. року Авґустин Горняк бул член вецей церковно-теолоґийних и административно-совитодавних целох за католїкох восточного обряду. З його вецейрочним закладаньом и активносцу утемелєна Грекокатолїцка церква у Велькей Британиї зоз купованьом катедралней церкви у центру Лондона. Церква ноши мено Святей фамилиї у еґзилу. Порту за церкву у кварту Мейфер подаровл княз Вестминстера и тот будинок нєшка под защиту держави.
Авґустин Горняк ушорел владическу резиденцию и дом за священїкох у Лондону. Вон купел и ушорел церковни будинки у Бредфорду, Единбурґу, Петербороу, Лестеру и Ґлостеру, а манастири за Шестри служебнїци у Бредфорду о у других местох дзе ше находза и парохиялни храми.
Року 1965, з нагоди означованя 750-рочнїци парламентаризма у Велькей Британиї, владика Авґустин Горняк бул госц кралїци Елизабети другей у Бакинґемскей палати. Року 1973, з нагоди сходу Анґлийского католїцкого епископата, владика Авґустин Горняк арґументовано обгрунтовал правне положенє и привилеґиї Грекокатолїцкей церкви у Велькей Британиї як и о вирских и правних нормох зоз хторима реґуловане положенє розличних обрядох у Католїцкей церкви. Моцно охраньовал восточни християнски обряд у прешвеченю же то єден зоз способох чуваня националней традициї и характеристикох зоз хторима утвердзена историйна улога Грекокатолїцкей церкви[3].
Од 1977. року вон бул член Комисиї за виробок Церковного права за Восточни церкви и член Конґреґациї за Восточни церкви.
Владика Авґустин Горняк бул пензионовани 17. октобра 1987. року и предлужел жиц у Лондону.
Умар 16. новембра 2003. року. Владика Авґустин Горняк бул поховани у грекокатолїцкей церкви у Коцуре 14. януара 2004. року.
Вонкашнї вязи
Референци
- ↑ Владика Авґустин Горняк, ЧСВВ. Християнски часопис Дзвони, януар-фебруар 2004.
- ↑ Роман Миз (2016). Священїки дакедишнього осєцкого викарияту. Петроварадин: Парохия св. Петра и Павла, Нови Сад, б. 120. ISBN 978-86-88983-19-8.
- ↑ Любомир Медєши (1990). Руски календар. Нови Сад: НВРО "Руске слово", б. 210.