Wn/shn/ၶႄႇပၼ်ၽၢင်ႉ လွင်ႈထၢႆႇဝၢၼ်း တီႈ ပၢင်ၵုမ် သျင်ႇၷရီႇလႃႇ

ဝၼ်းၸၼ်၊ ၸုၼ်ႇ 3၊ 2024

ၵဵဝ်ႇၵပ်းလူၺ်ႈ ထၢႆႇဝၢၼ်း လႄႈ ပၢင်ႇလၢႆႇၶႄႇၸၢၼ်းသေ ၽွင်းလူင်ၵၢၼ်ၵႅတ်ႇၵင်ႈ မိူင်းၶႄႇ Dong Jun လႆႈပၼ်ၽၢင်ႉႁၢဝ်ႈႁၢဝ်ႈႁႅင်းႁႅင်းၵႂႃႇတီႈ ပၢင်ဢုပ်ႇဢူဝ်း Shangri-La Dialogue ဢၼ်ၵဵဝ်ႇၵပ်းပၢႆးႁူမ်ႇလူမ်ႈ ထုင်ႉဢေးသျႃးပၸိၽိၵ်ႉ ဢၼ်ၸတ်းႁဵတ်းယူႇတီႈ မိူင်းသိင်ႇၵႃႇပူဝ်ႇၼၼ်ႉယဝ်ႉ။

ၵပ်းၵၢႆႇလူၺ်ႈ လိူင်ႈၵုၼ်ထၢႆႇဝၢၼ်းသေ မၼ်းလႆႈမွၵ်ႇလၢတ်ႈၵႂႃႇတႄႉ ပႃႇတီႇမႂ်ႇသုင် တီႇမူဝ်ႇၶရႅတ်ႉတိၵ်ႉ ဢၼ်ယိပ်းဢႃႇၼႃႇဝႆႉယၢမ်းလဵဝ်ၼႆႉ ၶဝ်တိူဝ်းႁဵတ်းသၢင်ႈမႃး တႃႇဢဝ် ၵုၼ်ထၢႆႇဝၢၼ်း ၸႅၵ်ႇဢွၵ်ႇတီႈ မိူင်းၶႄႇသေ၊ ႁႅင်းၼွၵ်ႈမိူင်းၵေႃႈ လႆႈၶၢႆပၼ် ၶိူင်ႈလၢၵ်ႈၼၢၵ်ႈသေဢမ်ႇၵႃး လႆႈဝႆႉပႃး လွင်ႈၵပ်းသိုပ်ႇ ၽွင်းတၢင် ဢၼ်ဢမ်ႇပဵၼ်တၢင်းၵၢၼ်ၼႆ ၽွင်းလူင်ၵၢၼ်ၵႅတ်ႇၵင်ႈမိူင်းႇၶႄ လႆႈသႂ်ႇမွၵ်ႇလၢတ်ႈၵႂႃႇၼႂ်း ၶေႃႈမွၵ်ႇလၢတ်ႈမၼ်း ဢၼ်ႁိုင် သီႇသိပ်းမိၼိတ်ႉၼၼ်ႉယဝ်ႉ။

ၽွင်းလူင် Dong ပၼ်ၽၢင်ႉဝႃး လွင်ႈၶတ်းၸႂ် တႃႇလုၵ်ႉတီႈ ထၢႆႇဝၢၼ်းသေ ၶႂ်ႈႁႄႉႁၢမ်ႈမိူင်းၶႄႇၼႆႉ မၼ်းတေပဵၼ် လွင်ႈဢီးဢဝ် ၵုၼ်ထၢႆႇဝၢၼ်းၶဝ်ႈၸူး တီႈၼႂ်းၵႄႈၽေးၶဵၼ် ဝႃႈၼႆယဝ်ႉ။

ၵဵဝ်ႇၵပ်းလူၺ်ႈ လိူင်ႈထၢႆႇဝၢၼ်းသေ မိူင်းၶႄႇၼႆႉ ဝႆႉဝႃႈပဵၼ် လိူင်ႈၼႂ်းမိူင်းသေ ၸတ်းၵၢၼ်ၵႄႈလိတ်ႈယူႇသေ ၽၢႆႇမိူင်းၶႄႇ လႆႈတႅပ်းတတ်းဝႃႈဝႆႉ တေၸႂ်ႉလွၵ်းလၢႆးငမ်းယဵၼ်သေ ႁဵတ်းသၢင်ႈ ၼိူဝ် လွင်ႈဢၼ် ထၢႆႇဝၢၼ်း လႄႈ မိူင်းႇၶႄ တေၶိုၼ်းႁူမ်ႈႁွမ်းၵၼ်ၼၼ်ႉယူႇ ဝႃႈၼႆယဝ်ႉ။ ဝၢႆးသေ ၶႄႇၵႂႃႇႁဵတ်း လွင်ႈၽိုၵ်းၵၢၼ်သိုၵ်းလူင် တီႈႁိမ်း ၵုၼ်ထၢႆႇဝၢၼ်း တႃႇၶၢဝ်းတၢင်းသွင်ဝၼ်းယဝ်ႉ ယူႇႁိုင်ထႅင်ႈဝူင်ႈၼိုင်ႈသေ ၽွင်းလူင်ၵၢၼ်ၵႅတ်ႇၵင်ႈ မိူင်းႇၶႄ ၸင်ႇမီးၶေႃႈပၼ်ၽၢင်ႉ ဢၼ်ၵဵဝ်ႇၵပ်းလူၺ်ႈ လိူင်ႈထၢႆႇဝၢၼ်းမႃးၼင်ႇၼႆယဝ်ႉ။

ၽွင်းလူင် ၵၢၼ်ၵႅတ်ႇၵင်ႈ ဢမႄႇရိၵၢၼ်ႇ Lloyd Austin ဢၼ်ၶိုၼ်ႈႁွတ်ႈယူႇတီႈ ပၢင်ဢုပ်ႇဢူဝ်း Shangri-La Dialogue ၼၼ်ႉ လႆႈၽိူမ်ႉလၢတ်ႈၵႂႃႇဝႃႈတႄႉ တွၼ်ႈတႃႇ ၵုၼ်ထၢႆႇဝၢၼ်း တေသိုပ်ႇမီးယူႇၵႂႃႇ ၼင်ႇယၢမ်းလဵဝ်ၼၼ်ႉ ၽၢႆႇဢမႄႇရိၵၢၼ်ႇ လႆႈမၼ်ႈၸႂ်ဝႆႉ ဝႃႈၼႆယဝ်ႉ။

ၵပ်းၵၢႆႇလူၺ်ႈ ပၢင်ႇလၢႆႇၶႄႇၸၢၼ်းသေ ၽွင်းလူင် Dong လၢတ်ႈဝႃႈ တေဢဝ် ၽွၼ်းလီမိူင်းၶႄႇ ၼမ်းၼႃႈသေ ႁဵတ်းၵႂႃႇ ဝႃႈၼႆသေ မၼ်းသိုပ်ႇလၢတ်ႈ ယွၼ်ႉပိူဝ်ႈ မိူင်းၵမ်ႈၽွင်ႈ ဢဝ်တင်းၵမ်ႉထႅမ် ၼွၵ်ႈမိူင်းသေ လႆႈမီးလွင်ႈပူၼ်ႉပႅၼ် ၼိူဝ် ၶေႃႈၽွမ်ႉၸႂ် ၵၼ်တင်း မိူင်းၶႄႇၼႆ ဢမ်ႇလႆႈ သႂ်ႇၸိုဝ်ႈ ၾီလိပ်ႈပိၼ်းသေၵေႃႈ လႆႈလၢတ်ႈၵႂႃႇဝႃႈၼၼ်ယူႇ။

ၸွင်ႇမီးတၢင်းႁၼ်ထိုင်ၼိူဝ် ၶၢဝ်ႇဢၼ်ၼႆႉႁိုဝ်? ပိုၼ်ၽႄႈပၼ်တႃႉ!

ငိူၼ်ႈငဝ်ႈတိုၼ်း

William Yang. "China warns on Taiwan, South China Sea at Shangri-La forum" — VOA News, JUNE 2, 2024
The Standard (Hong Kong). "China warns of force over Taiwan, limits on sea row but calls for more US talks" — The Standard (Hong Kong), JUNE 2, 2024
Simone McCarthy, Brad Lendon and Eric Cheung. "Those who back Taiwan independence face ‘self-destruction,’ China’s new defense minister warns in combative summit speech" — CNN, JUNE 2, 2024
Yew Lun Tian. "Beijing accuses ‘external forces’ of escalating tensions, warns them to stay out of the region" — The Straits Times, JUNE 2, 2024

ပိုၼ်ၽႄ :