Wn/shn/ထႆးထွင်းဢီး တႃႇဢုပ်ႇၵုမ် တႃႇမႄးသဵၼ်ႈတၢင်းလူင်ဢေးသျႃး တီႈလႅၼ်လိၼ် မိူင်းထႆး-မိူင်းမၢၼ်ႈ
ဝၼ်းၽတ်း၊ သႅပ်ႇထႅမ်ႇပႃႇ 19၊ 2024
.svg)
ၽွင်းလူင်ၾၢႆႇၼွၵ်ႈမိူင်းထႆး မႃႇရိတ်ႉသၢင်ႇၵျိမ်ႇပွင်ႇသႃႇ လၢတ်ႈဝႃႈ ယွၼ်ႉပိူဝ်ႈ ၶႂ်ႈႁႂ်ႈ ၼႃႈလိၼ်လႅၼ်လိၼ် ၼိမ်သဝ်း လႄႈ သဵၼ်ႈတၢင်းၵၢၼ်ၵႃႉၶၢႆ ပိုတ်ႇၽုၺ်ႇလႄႈ မိူင်းထႆး ၶႂ်ႈႁူမ်ႈမိုဝ်းၵၼ်တင်း ၽၢႆႇဢၼ်ပဵၼ်ပၢင်တိုၵ်းၵၼ် ၼႂ်းမိူင်းမၢၼ်ႈသေ မႄးၵုမ်းလုမ်းလႃး သဵၼ်ႈတၢင်းလူင် ဢၼ်လမ်ႇလွင်ႈ ဢၼ်တတ်းၶၢမ်ႈ မိူင်းဢၼ်ပဵၼ်ပၢင်တိုၵ်းၵၼ်ၼၼ်ႉ ၼႆယဝ်ႉ။
မိူင်းထႆး မီးလွင်ႈၵမ်ႉထႅမ် ၸုမ်းဢႃႇသီႇယၼ်ႇ လႄႈ မိူင်းဢိၼ်းတီးယႃး ဢၼ်ထွင်းဢီး တႃႇတေၵေႃႇသၢင်ႈၶိုၼ်း ပွတ်းတွၼ်ႈ သဵၼ်ႈတၢင်းလူင် ဢေးသျႃး 1 (AH-1) ဢၼ်လႆႈလူႉၵွႆ ယွၼ်ႉပၢင်တိုၵ်း မိူဝ်ႈပူၼ်ႉမႃး ဢမ်ႇႁိုင်ၼႆႉ ၼႆယဝ်ႉ။
မိူင်းလၢဝ်း ဢၼ်ပဵၼ်ႁူဝ်ပဝ်ႈ ၸုမ်းၸၢဝ်းၶိူဝ်း ဢေးသျႃးၸဵင်ႇၸၢၼ်းဝၼ်းဢွၵ်ႇ 10 မိူင်း ယၢမ်းလဵဝ်ၼႆႉၵေႃႈ ယွၼ်းႁႂ်ႈမိူင်းထႆး ၸတ်းႁဵတ်းပၢင်ၵုမ် ၸႄႈမိူင်း ၵဵဝ်ႇၵပ်းလွင်ႈမိူင်းမၢၼ်ႈ ၵွၼ်ႇၼႃႈပီၼႆႉ တေသဵင်ႈၼႆသေ ဢမ်ႇလၢတ်ႈၼႄ လွင်ႈတၢင်းႁူဝ်းယွႆႈမၼ်းထႅင်ႈ ၼႆယဝ်ႉ။
မႃႇရိတ်ႉ လၢတ်ႈဝႃႈ “ၵဝ်ၶႃႈထၢင်ႇတႄႉ ပၼ်ႁႃမိူင်းမၢၼ်ႈၼႆႉ ဢဝ်ၵၢၼ်သိုၵ်းသေ ၵႄႈလိတ်ႈဢမ်ႇလႆႈ ၵူၺ်းၵႃႈ တေလႆႈဢုပ်ႇဢူဝ်းၵၼ် ႁႂ်ႈမီးၽွၼ်းလီ“ ၼႆယဝ်ႉ။
မိူင်းမၢၼ်ႈၼႆႉ လႆႈပဵၼ်လွင်ႈသုၵ်ႉယုင်ႈမႃး ၸဵမ်မိူဝ်ႈလိူၼ်ၾႅပ်ႇဝႃႇရီႇ 2021 ၼၼ်ႉသေ ၸွမ်သိုၵ်းလူင် ဢၼ်မီးဢဵၼ်ႁႅင်းယႂ်ႇ လႆႈယႃႉပႅတ်ႈ လူင်ပွင်ၸိုင်ႈၵူၼ်းမိူင်း ဢၼ်လိူၵ်ႈတင်ႈမႃးၼၼ်ႉသေ ႁဵတ်းႁႂ်ႈ မီးလွင်ႈၼႄၵၢင်ၸႂ် ဢၼ်လႅၵ်ႈလၢႆႈပဵၼ် လွင်ႈလုၵ်ႉၽိုၼ်ႉ ဢၼ်ဢဝ်ၵွင်ႈၵၢင်ႇ တေႃႇ ၸုမ်းသိုၵ်းၽွင်းငမ်းၼၼ်ႉယဝ်ႉ။
လူင်ပွင်ၸိုင်ႈသိုၵ်း ဢမ်ႇၸၢင်ႈၵုမ်းၵမ်လႆႈ ၼႃႈလိၼ် ၼႂ်းမိူင်း လႄႈ ပၢႆးမၢၵ်ႈမီးၵေႃႈ တူၵ်းသုမ်းၵႂႃႇ။
ဢႃႇသီႇယၼ်ႇ ႁၢမ်ႈတၢပ်ႈ ၸွမ်သိုၵ်းလူင်ၶဝ် ဢမ်ႇႁႂ်ႈၶဝ်ႈႁူမ်ႈပၢင်ၵုမ်လူင် တေႃႇထိုင် ၽႅၼ်ၵၢၼ်ငမ်းယဵၼ် 2021 ဢၼ်ၸုမ်းဢႃႇသီႇယၼ်ႇ ၶူင်ဢွၵ်ႇဝႆႉၼၼ်ႉ ပေႃးလႆႈၶိုၼ်ႈယႂ်ႇမႃး ဢၼ်ၸုမ်းသိုၵ်း ၽွမ်ႉၸႂ်ၸွမ်းသေတႃႉ ဢမ်ႇႁဵတ်းၸွမ်းၼၼ်ႉ။ ၶေႃႈတူၵ်းလူင်းၼၼ်ႉ ပႃးဝႆႉ လွင်ႈဢုပ်ႇဢူဝ်းၵၼ် ၵူႈၽၢႆႇၽၢႆႇ ဢၼ်ပဵၼ်ပၢင်တိုၵ်းၵၼ်ၼၼ်ႉ။
သဵၼ်ႈတၢင်းၵၢၼ်ၵႃႉၶၢႆ ဢၼ်လမ်ႇလွင်ႈ ဢၼ်ပဵၼ်သဵၼ်ႈတၢင်း AH1 ၼႆႉ လုၵ်ႉတီႈ ဝဵင်းမျႃႉဝတီႇ လႅၼ်လိၼ်ထႆး-မၢၼ်ႈ တေႃႇထိုင် ဝဵင်းတႃႈမူး လႅၼ်လိၼ် မိူင်းမၢၼ်ႈ တင်း ဢိၼ်းတီးယႃး ယၢဝ်းလိူဝ် 1,500 ၵီႇလူဝ်ႇမီႇတႃႇ (932 လၵ်း) ၼႆယဝ်ႉ။
ပိုၼ်ႉတီႈႁိမ်းႁွမ်း မျႃႉဝတီႇ ဢၼ်မိူဝ်ႈဢွၼ်တၢင်း ပဵၼ်သဵၼ်ႈတၢင်း တႃႇၵႃႉၶၢႆ လႅၼ်လိၼ် ၼိုင်ႈပီလႂ် တေႃႇလႃႇ 1 ပီႇလီႇယၼ်ႇလိူဝ်ၼၼ်ႉ မိူဝ်ႈၸဝ်ႉပီၼႆႉ ယွၼ်ႉၸုမ်းလုၵ်ႉၽိုၼ်ႉၶဝ် တဵၵ်းတဵင် ၸုမ်းသိုၵ်းမၢၼ်ႈ ဢွၵ်ႇဝဵင်းလႅၼ်လိၼ်လႄႈ လႆႈပဵၼ်ပၢင်တိုၵ်းႁၢဝ်ႈႁႅင်းမႃး။
ငိူၼ်ႈငဝ်ႈၶၢဝ်ႇ
- Reuters. "Thailand pushing for talks to repair key Myanmar highway" — VOA News, September 19, 2024
