ဝၼ်းသဝ်၊ ၸုၼ်ႇ 29၊ 2024
.svg)
ၸုမ်းၸဝ်ႈၵၢၼ်ယေးငိုၼ်းထႆး လႆႈဢွၼ်ၵၼ်ထဵင်ၶိုၼ်းႁၢဝ်ႈႁၢဝ်ႈႁႅင်းႁႅင်းၼိူဝ် ၶေႃႈမွၵ်ႇလၢတ်ႈ ဢၼ်ပႃးၼႂ်း ၽိုၼ်လိၵ်ႈတၢင်ႇလၢတ်ႈ ၸုမ်းၸၢတ်ႈၸိုင်ႈလုမ်ႈၾႃႉဝႃႈ လွင်ႈဢၼ်ဝႃႈ ၼင်ႇႁိုဝ် တပ်ႉသိုၵ်းမၢၼ်ႈ တေသိုဝ်ႉလႆႈလၢၵ်ႈၼၢၵ်ႈၼၼ်ႉ လႆႈလုၵ်ႉတီႈ ယေးငိုၼ်းထႆးသေ ႁဵတ်းၵၢၼ်ဢူၼ်းငိုၼ်း ဢၼ်ဝႃႈၼၼ်ႉယဝ်ႉ။
မိူဝ်ႈၸုၼ်ႇ 28 ဝၼ်းသုၵ်းၼၼ်ႉ လႆႈႁဵတ်းၶေႃႈပိုၼ်ၽၢဝ်ႇဢွၵ်ႇလၢတ်ႈမႃးဝႃႈ ၸွမ်းၼင်ႇ လွင်ႈမၢပ်ႇလၢတ်ႈ တီႈလိၵ်ႈတၢင်ႇလၢတ်ႈ ၽူႈၸွပ်ႇၶိုၵ်ႉတွၼ်း ၸုမ်းၸၢတ်ႈၸိုင်ႈလုမ်ႈၾႃႉ ဢၼ်ၵဵဝ်ႇၵပ်းလူၺ်ႈ သုၼ်ႇလႆႈသုၼ်ႇပဵၼ်ၵူၼ်း မိူင်းမၢၼ်ႈၼၼ်ႉဝႃႈဝႆႉဝႃႈ ယေးငိုၼ်းထႆး မီးလွင်ႈႁဵတ်းသၢင်ႈပၼ် တႃႇႁႂ်ႈတပ်ႉသိုၵ်းမၢၼ်ႈ သိုဝ်ႉလႆႈ ၶိူင်ႈလၢၵ်ႈၼၢၵ်ႈဢၼ်ဝႃႈၼၼ်ႉ မၼ်းဢမ်ႇၸႂ်ႈသေဢိတ်း ဝႃႈၼႆယဝ်ႉ။ တီႈၼႂ်း ၶေႃႈပိုၼ်ၽၢဝ်ႇ ၸုမ်းၸဝ်ႈၵၢၼ်ယေးငိုၼ်းထႆးၶဝ် လၢတ်ႈဝႆႉဝႃႈ တီႈ ယေးငိုၼ်းထႆး ၼႆႉ မီးဝႆႉ ပေႃႇလသီႇ ဢၼ်ဝႃႈ တိုၼ်းတေ ဢမ်ႇလႆႈၸွႆႈထႅမ် တႃႇႁႂ်ႈ တပ်ႉသိုၵ်းမၢၼ်ႈ သိုဝ်ႉလၢၵ်ႈၼၢၵ်ႈ၊ ဢမ်ႇၼၼ် ၶိူင်ႈၸႂ်ႉလၢၵ်ႈၼၢၵ်ႈသိုၵ်း ဢၼ်ဝႃႈၼၼ်ႉလႄႈ ၶဝ်ယိူင်းဢၢၼ်းႁဵတ်းသၢင်ႈ တႃႇၵႅတ်ႇၵင်ႈ တႄႇဢဝ် လွင်ႈဢူၼ်းငိုၼ်း တီႈယေးငိုၼ်း တေႃႇပေႃးထိုင် လွင်ႈႁဵတ်းသၢင်ႈ ၸိူဝ်းဢၼ်မီးလွင်ႈပူၼ်ႉပႅၼ်ၼိူဝ် သုၼ်ႇလႆႈသုၼ်ႇပဵၼ်ၵူၼ်းၼၼ်ႉယူႇ ဝႃႈၼႆယဝ်ႉ။
ၸုမ်းၸဝ်ႈၵၢၼ်ယေးငိုၼ်းထႆး မွၵ်ႇလၢတ်ႈဝႃႈ ၸိူဝ်းပဵၼ် မိူင်းၶဝ်ႈၸုမ်းၶဝ်ၼႆႉ လႆႈႁဵတ်းသၢင်ႈၸွမ်းလူၺ်ႈ ပၵ်းပိူင်မၢႆမီႈ မိူင်းထႆး လႄႈ ၵူႈမိူင်းမိူင်းသေ တိုၼ်းဝႃႈ လူလွမ်ပႂ်ႉတူၺ်းဝႃႈ မီးဝႆႉ လွင်ႈႁဵတ်းသၢင်ႈ ၵၢၼ်ဢူၼ်းငိုၼ်း ဢၼ်မီးၽေးၶဵၼ် ဢၼ်ၶဝ်ႈၼႂ်း သဵၼ်ႈမၢႆႁႄႉႁၢမ်ႈ ၼၼ်ႉယူႇ ဝႃႈၼႆယဝ်ႉ။
တီႈၼႂ်း လိၵ်ႈတၢင်ႇလၢတ်ႈ Tom Andrews ၽူႈၸွပ်ႇၶိုၵ်ႉတွၼ်း ဢၼ်တၢင်ႇထိုင်တီႈ ၶွင်ႇသီႇႁူမ်ႇလူမ်ႈ ၸုမ်းၸၢတ်ႈၸိုင်ႈလုမ်ႈၾႃႉၼၼ်ႉ ယေးငိုၼ်းၸဝ်ႈဢၼ်ၵပ်းၵၢႆႇပႃး လွင်ႈတပ်ႉသိုၵ်းမၢၼ်ႈ သိုဝ်ႉၶိူင်ႈလၢၵ်ႈၼၢၵ်ႈၼၼ်ႉ ၶဝ်ႈပႃး ၸိူဝ်းပဵၼ် ယေးငိုၼ်း Siam Commercial Bank (SCB)၊ ယေးငိုၼ်း Bangkok၊ ယေးငိုၼ်း Kasikornbank၊ ယေးငိုၼ်း Krungthai လႄႈ ယေးငိုၼ်း TMB Thanachart ၸိူဝ်းၼႆႉ ဝႃႈၼႆယဝ်ႉ။
တီႈလိၵ်ႈၽိုၼ်ၶၢဝ်ႇ Bangkokpost လႆႈဢၢင်ႈဢိင် ၶေႃႈမွၵ်ႇလၢတ်ႈ ထၢၼ်ၽွင်းလူင်ၵၢၼ်ၼွၵ်ႈမိူင်းသေ တႅမ်ႈဝႆႉဝႃႈ ယေးငိုၼ်း ၸိူဝ်းမီးတီႈ မိူင်းထႆးၼႆႉ လႆႈႁဵတ်းသၢင်ႈ ၸွမ်းၼင်ႇ ပၵ်းပိူင်မၢႆမီႈ ၵၢၼ်ငိုၼ်းတွင်း ဢၼ်ၵိုင်ႇႁဵတ်း ၸွမ်းၼင်ႇ ၼၼ်ႉယူႇသေ လူင်ပွင်ၸိုင်ႈထႆး တေထတ်းသၢင်ႈ ၵႂႃႇ ၶေႃႈမွၵ်ႇ တီႈလိၵ်ႈတၢင်ႇလၢတ်ႈ ၽူႈၸွပ်ႇၶိုၵ်ႉတွၼ်း ၸုမ်းၸၢတ်ႈၸိုင်ႈလုမ်ႈၾႃႉၼၼ်ႉယူႇ ဝႃႈၼႆယဝ်ႉ။
ဢၼ်ပဵၼ် ၸုမ်းၸဝ်ႈၵၢၼ် ၵူၼ်းၵႃႉ လႄႈ ၵၢၼ်ၸၢၵ်ႈၵၢၼ်မိုဝ်း မိူင်းမၢၼ်ႈ (UMFCCI) ၼၼ်ႉၵေႃႈ လွင်ႈၽူႈၸွပ်ႇၶိုၵ်ႉတွၼ်း ၸုမ်းၸၢတ်ႈလုမ်ႈၾႃႉ တုၵ်းယွၼ်း တႃႇဢဝ်လိူင်ႈၼိူဝ် ယေးငိုၼ်းၼွၵ်ႈမိူင်းၼႂ်းမိူင်းၵမ်ႈၽွင်ႈၼႆႉ တေၸၢင်ႈမီး ၽွၼ်းယွၼ်ႉမႃးၼိူဝ် ၵၢၼ်ငၢၼ်းပၢႆးမၢၵ်ႈမီး တီႈမိူင်းမၢၼ်ႈယူႇ ဝႃႈၼႆယဝ်ႉ။ တီႈၼႂ်း ၶေႃႈပိုၼ်ၽၢဝ်ႇၼၼ်ႉ လႆႈတိုၵ်းသူၼ်းဝႆႉ ၸုမ်းၵူႈမိူင်းမိူင်း ၸိူဝ်းၵဵဝ်ႇၵပ်း ယႃႇႁႂ်ႈမီးလွင်ႈတိူဝ်ႉၶိူၵ်ႈၼိူဝ် ပၢႆးမၢၵ်ႈမီး လႄႈ ၸၢတ်ႈပၢၼ် ၵူၼ်းမိူင်း ဝႃႈၼႆယဝ်ႉ။
မိူဝ်ႈၸုၼ်ႇ 28 ၼၼ်ႉ ထၢၼ်ၽွင်းလူင် ၵၢၼ်ၼွၵ်ႈမိူင်း သိင်ႇၵႃႇပူဝ်ႇ လႆႈတွပ်ႇၶိုၼ်းဝႃႈ ၶေႃႈမွၵ်ႇလၢတ်ႈ တီႈၼႂ်း လိၵ်ႈတၢင်ႇလၢတ်ႈ ဢၼ်ဝႃႈ ၸုမ်းမီးပုၼ်ႈၽွၼ်းၽၢႆႇၵၢၼ်ငိုၼ်းတွင်း သိင်ႇၵႃႇပူဝ်ႇ MAS ၵေႃႈ မီးလွင်ႈၵွင်ႉၵၢႆႇၵၼ်တင်း လွင်ႈသိုဝ်ႉၶၢႆ လၢၵ်ႈၼၢၵ်ႈ မိူင်းမၢၼ်ႈ ဢၼ်ဝႃႈၼၼ်ႉ မၼ်းဢမ်ႇမၢၼ်ႇမႅၼ်ႈ ဝႃႈၼႆယဝ်ႉ။
ငိူၼ်ႈငဝ်ႈၶၢဝ်ႇ
- The Nation (Thailand). "Banking association denies Thai banks supporting Myanmar military" — The Nation (Thailand), June 28, 2024
- Bangkokpost. "Banks deny they helped Myanmar junta buy weapons" — Bangkokpost, June 28, 2024
- Zsombor Peter. "UN: Thailand firms, banks lead in securing weapons for Myanmar" — VOA News, June 27, 2024
- AsiaNews. "Myanmar’s military junta buying weapons through Thai banks" — AsiaNews, June 28, 2024
- Helen Regan, Kocha Olarn and Michael Mitsanas. "Thailand is now the Myanmar junta’s favored banking destination as military attacks ramp up, UN expert says" — CNN, June 27, 2024
- Grant Peck. "Thai banks are the top suppliers of financial services to Myanmar’s military, UN expert says" — AP News, June 26, 2024
