Der Nämbercher Chriskindlasmargd ghörd zu die äldsdn und beriehmdesdn Weihnachtsmärgde in Daidschland. 2012 hodd er mehr wäi zwa Milliona Douridsn as der ganzn Welld ozuung. Er find afn Habdmargd in Nämberch schdadd un sei Gschichd lässd si bis in däi Middn vom 16. Joarhunnerd zrüggverfolng. Der erschde schrifdliche Nachweis schdammd asm Joar 1628. Seid 1969 wärd alle zwa Joar a Nämbercher Madla im Alder zwischa 16 un 19 Joar zum Chriskindla gwähld, des wou am Freidooch vuurm erschdn Advend af der Emborn vo der Frauenkärrng miidn feierlichen Brolooch ´n Chriskindlasmargd eröffna doud.
Am Chriskindlasmargd verkaffn mehr wäi 200 Händler ihr Woar. Des Angebod gäid vo Nämbercher Lebbkoung, Früchdebrot, Bagg- un Säißwaren, Weihnachdsadigl wäi Rauschgoldengala, Chrisbammschmugg, Kerrzn, Spillzeich bis hi zu kunstgwerbliche Adigl. Dybbische Miidbringsel sin zun Beischbill „Nämbercher Zwedschgamännla“. Gschdärgd wärrd si beim Margdbummel vur allem miid däi beriehmdn Nämbercher Rosdbrodwörschdla un Glühwein. Däi Hulzbuden miid ihre roud-waaße Schdoffdächla gem a bsonders schdimmungsvolls Bild o, deshalb hodd der Chriskindlasmargd a ´n Beinoma „Städtla aus Hulz un Duch“ gräichd.
Galerie
edit-
Nämbercher Lebbkoung -
Zwedschgamännla
Im Nedz
edit