Штефан Чакан (*10. април 1922—†23. май 1987), инженєр аґрономиї, новинар, редактор, просвитни, дружтвено-политични и културни роботнїк.
| Штефан Чакан | |
|---|---|
 | |
| Народзени | 10. априла 1922. |
| Умар | 23. мая 1987. (65) |
| Державянство | Кральовина Югославия, югославянске |
| Язик творох | руски, сербски |
| Школа | Штредня школа, Кула и Зомбор |
| Универзитет | Висока польопривредна школа, Мадяровар (Мадярска) |
| Период твореня | 1945—1978. |
| Жанри | журнализем, просвита, култура, политика |
| Поховани | Нове Орахово |
| Припознаня | Невенова награда,
плакети з нагоди 20. и 40. рочнїци новинох (1965. и 1985. року) награда Шветлосци Микола Кочиш (1984) |
Биоґрафия
Штефан Чакан ше народзел 10. априла 1922. року у Руским Керестуре, як пияти по шоре спомедзи осемцох братох, спомедзи котрих штирме одросли кед 1935. року остали без мацери. Оцец Михал ше по други раз оженєл и зоз другу жену мал ище сина и дзивку, та у фамилиї одрастали шесцеро дзеци.
Штефан основну школу закончел у Руским Керестуре, а штредню у Кули и Сомборе, дзе матуровал 1941. року. Високу польопривредну школу закончел у Мадяроваре (Мадярска), а диплому верификовал на Польопривредним факултету у Земунє.
Од 1945. року Штефан Чакан робел у нашей першей ґимназиї як професор биолоґийних предметох и у исти час од конца мая 1945. року, як член Редакцийного колеґиюма участвовал у пририхтованю першого числа новинох Руске слово, чий пошвидко постал и главни и одвичательни редактор, як и редактор Руского народного календара за 1946. рок и першого числа часопису за руски дзеци Пионирска заградка. Преложел на наш язик и даскельо школски учебнїки з обласци биолоґиї и хемиї.
Штефан Чакан бул оженєти з учительку Елену (Єлену) Кишґецийову з Бачкого Петровцу, зоз хтору мал трох синох: Мирослава, Штефана (Стевана) и Ивана.
У чаше од 1955. по 1966. рок вон службовал у Беоґрадзе, перше у видавательней хижи Задружна књига, вец у Скупштини Беоґрада, потим у Заводу за планованє СР Сербиї, та як совитнїк за статкарство и поживову индустрию Републичней привредней комори СР Сербиї, же би од 1966. року почал робиц у Рускей редакциї Радио Нового Саду як редактор емисийох за валал, а од 1972. року знова у Редакциї новинох Руске слово у Новим Садзе, одкаль пре хороту 1978. року пошол до инвалидскей пензиї.
Литературна и новинарска дїялносц
Такой по Другей шветовей войни почал писац приповедки и писнї, алє найвекши успих посцигнул як баснописатель. Обявени му два кнїжки баснох у виданю НВУ Руске слово. Перша кнїжка Басни вишла 1971. року и за ню Штефан Чакан достал Невенову награду. Друга кнїжка под назву Басни 2 вишла 1986. року.
Свойо литературни роботи Штефан Чакан обявйовал у Пионирскей заградки, Литературним слове, Шветлосци и Народним календаре, а рижни статї на сербским язику у Летопису Матици сербскей, часописох Jутро и Ветеринарски гласник и публикацийох котри видавала Задружна књига.
За свою дружтвену роботу Штефан Чакан достал вецей припознаня, медзи нїма и тоти з НВУ Руске слово: два памятни плакети – з нагоди 20-рочнїци и 40-рочнїци новинох (1965. и 1985. року) и награда Шветлосци под назву Микола Кочиш 1984. року.
Як пензионер жил у Новим Орахове, а умар у суботицким шпиталю 23. мая 1987. року, а поховани є у Новим Орахове 24. мая.
Єдна улїчка у Новим Орахове ноши його мено.
Литература
- Др Юлиян Тамаш: История рускей литератури, Завод за уџбенике и наставна средства – Београд, 1997, б. 154-157 и 622-624.
- Дюра Латяк: Штефан Чакан (1922-1987), Народни календар 1988, Руске слово, Нови Сад, 1987, боки 175-176.
- Штефан Чакан: Басни: Призначка о писательови, НВУ Руске слово, Нови Сад, 1971, боки 7-8.
Вонкашнї вязи
- Ирина Папуґа Означена 100 рочнїца од народзеня Штефана Чакана, Радио Телевизия Войводина, 12. април 2022.
- Юлиян Пап, 95 роки од народзеня и 30 роки шмерци Штефана Чакана (1922–1987), Studia Ruthenica, Дружтво за руски язик, литературу и културу, ч. 22, 2017, б. 176-180.