Драґутин – Драґен Колєсар (*10. новембер 1929. - †20. януар 1995.), єден спомедзи найпознатших ґлумцох зоз шорох рускей заєднїци У Войводини хтори охабел глїбоки шлїд на театралним и филмско-телевизийним полю.
|
Драґутин – Драґен Колєсар | |
|---|---|
 | |
| Народзени | 11. октобра 1929. |
| Умар | 20. януара 1995. (66. р) |
| Державянство | югославянске |
| Язик творох | руски, сербски |
| Школа | ґимназия, Театрална школа |
| Период твореня | 1950 - 1993 |
| Жанри | ґлумец, шпивач, ТВ режисер |
| Поховани | на теметове у Петроварадину
(Транджамент) |
Биоґрафия edit
Драґутин (Драґен) Колєсар – Коле ше народзел 11. октобра 1929. року у Бачинцох дзе закончел штири класи основней школи а 1940. року уписал ше до класичней ґимназиї у Заґребе, алє пре воєни обставини нє матутровал. Школованє предлужує 1949./1950. року у Новим Садзе у Державней театралней школи, наставнїки му були Миряна Коджич, Йован Путник и Йован Коньович, котру закончує 1953. року и пошвидко достава анґажман у новосадским Сербским народним театру. Як професионални ґлумец Драґен Колєсар ступел на сцену СНТ 1. IX 1953. и остал у анґажману по 1. IV 1975.
Уж 1950. року, як школяр Державней театралней школи, успишно прешол на авдициї за радио-шпивача у Радио Новим Садзе. Велї роки вон, як вокални солист, у програми радия зоз тамбуровим оркестром Славка Суботина и Александра Аранїцкого „на живо” шпивал руски народни шпиванки. Познєйше, кед уж набавени маґнетофони, знял на маґнетофонску пантлїку вельке число руских шпиванкох, а вишпивал их коло 200 (вєдно з гевтима „на живо”). Тоти цо зняти на манетофонских пантлїкох и нєшка з часу на час мож чуц на габох Радио Нового Саду.
На початку 1949. року Драґен Колєсар у Бачинцох самостойно поставел на сцену Нушичового Аналфабету, дзе бул и ношитель главней улоги.
Мария Горнякова-Пушкашова, з нагоди 15-рочнїци його професийней ґлумецкей роботи, констатовала же у особи Драґена Колєсара здружени три таланти: ґлумецки, режисерски и шпивацки и вон шицки три розвива под’єднак так цесно повязани же нє мож розознац дзе єдeн престава, а други почина.
Ґлумецка и режисерска кариєра edit
През 26 роки професийного анґажману у Сербским народним театру у Новим Садзе Драґен Колєсар одбавел коло 130 улоги. Як виразни ґлумец характерней комики вон бул надарени за сценске шпиванє и за гранє на струнових инструментох цо часто хасновал у своїх улогох на сцени СНТ. Драґен Колєсар витворел и значне число улогох у телевизийних серийох и на филме. За архиву Радио Нового Саду режировал пар дзешатки радио драми на руским язику.
Од 1975. року до пензионованя 1982. року бул режисер у Редакциї Програми на руским язику Телевизиї Нови Сад, наш перши телевизийни режисер. Источасно вон режировал театрални фалати у АРТ Дядя и преношел власни режиї до телевизийского медию. Окрем театралних фалатох Драґен Колєсар на ТВ Нови Сад режировал и гумористично-музични емисиї як и документарни филми.
Вон активно участвовал у роботи новосадского руского КУД Максим Горки, а у Аматерски руским театре Дядя вон бул присутни 15 роки, дзе поставел 11 театрални фалати. През блїзко 40 роки своєй театралней дїялносци Драґен Колєсар поставел на сцену понад 30 рижни театрални фалати, найвецей з рускима аматерами. Була замеркована його режия театралного фалата Опера за три гроши Бертолда Брехта хтора представяла войводянски театрални живот на Югославянским фестивалу драмских аматерох у Требиню.
Умар у Петроварадину 20. януара 1995. року, а поховани є на петроварадинским теметове на Транджаменту.
Културно уметнїцке дружтво у Бачинцох ноши мено „Драґутин Драґен Колєсар“.
УЛОГИ: Йоаким Сапун (Винчуєм), Андрия (Дїдо), Ноґич (Гайдук Станко), Цене Садар (Цифрована лабда), Ружичич (Покондирена тиква), Пера учитель (Поп Чира и поп Спира), Сима, И-ли-а, Чио-Чи (Драга коло швета), Мита (Спреведзкош и параспреведзкош), Левентал (Виктория), Танасиє Буль (Дожица Николетини Бурсача), Радица (Спреведзкош у Бечею), Босорка (Троме уґурсузове), Поротїк (Дванац гнїваци людзе), Леонида (Кавияр и лєнча), Фадинар (Флорентински калап), Радимир (Наґраждениє и наказаниє), Фесте (Богоявлєнска ноц), Телєгин (Бачи Ваньа), xxx (Лаждипажди), xxx (Лєс хтори ходзи), xxx (Село Сакуле, а у Банату), Худи (Весели жени з Виндзору), Шимурина (Представа „Гамлета“ у валалє Мрдуша Долня општини Блатуша).
Филмоґрафия edit
Лїсце широке 1981 Широко је лишће
Дзиви роки (ТВ серия) 1974 Дивље године
Филип на коньови (ТВ мини серия) 1973 Филип на коњу
Красна парада 1970 Лепа парада
Терха шлєбоди (ТВ филм) 1966 Терет слободе
ТВ театер (ТВ серия) 1963-1966 ТВ театар
Битка на Косове (ТВ филм) 1964 Бој на Косову
Виберна 1961 Избирачица
Спектакл поетского гумору Войводини (ТВ филм) 1959 Спектакл поетског хумора Војводине
Мирон Канюх "Ратунок" (ТВ филм), режисер Зоран Шарич, Телевизия Нови Сад, 1980-тих
Руски шпиванки edit
Ой, то там на гори дубина шпиваю Драґен и Татяна
Українски шпиванки edit
Литература edit
1. Дюра Латяк „Рускe слово” ч. 18. од 1. мая 1953. року на 3. боку
2. Мария Горняк Пушкаш, „Шветлосц” ч. 3/1968, боки 235-236
3. Дюра Латяк, „Шветлосц“ ч. 4/2009, боки 602-611
Вонкашнї вязи edit
Енциклопедия Сербского народного театра Биографије
Драґутин – Драґен КОЛЄСАР Биоґрафия на НАР
Виберна, СНТ, зоз филма, шпица и инсерт дзе ше явя Драґен Колєсар
Ґалерия edit
-
Драґен Колєсар у театралним фалаце "Виберна" 1961. року -
Драґен Колєсар у улоги Ружичича у фалаце "Покондирена тиква" -
Дюра Латяк и Драґен Колєсар як водителє програми на манифестациї "Одгуки ровнїни" -
Драген Колєсар зоз дзивку Татяну (1975) -
Драґен Колєсар и екипа ґлумцох на знїманюТВ филма "Ратунок" -
Драґен Колєсар и Мария Моснак у студию РНС на знїманю емисиц за валал -
Драґен Колєсар з профилу -
Драґен Колєсар як пензионер
