Wikimedia Incubator

Wp/rsk/Александр Дмитриєвич Дуличенко

< Wp‎ | rsk
Wp > rsk > Александр Дмитриєвич Дуличенко

Др Александр Дмитриєвич Дуличенко (30. октобер 1941. року), фаховец з обласци общого язикознавства (обща теория язика, социолинґвистика, етнолинґвистика, интерлинґвистика и др.) и славянскей филолоґиї, и експерт у обласци славянских микроязикох

Др Александр Д. Дуличенко

Народзени 30. октобер 1941. року
Державянство Совєтски Союз, Естония, Русия
Язик творох русийски, есперанто, естонски
Школа Штредня школа у Новоалексеєвскей
Универзитет Филолоґийни факултет у Ашхабаду
Обласц науки обща теория язика, социолинґвистика, етнолинґвистика, интерлинґвистика, славянски микроязики
Наукови ступень Доктор наукох
Припознаня Орден Билей Гвизди, 4-го ряду[1]

Биоґрафия edit

Александр Дмитриєвич Дуличенко народзени 30. октобра. 1941. року у месце Новоалексеєвская у Русиї, Краснодарски край.[2] Року 1959. закончел штредню школу у Новоалексеєвскей. Од 1961. до 1966. студирал русийску филолоґию на филолоґийним факултету у Ашхабаду, главним варошу тедишнєй совєтскей републики Туркмениї (тераз нєзависна держава Туркмения).

Робел як преподавач русийского язика у месце Ґара Векил у Ашхабадскей обласци у Туркмениї (1966–1968, 1970–1976), як асистент на катедри за общу и русийску линґвистику на Самаркандским универзитету (варош Самарканд) у републики Узбекистану (тераз нєзависна держава Узбекистан) (1968–1970). Од 1976. року роби на Тартуским универзитету (варош Тарту) у Естониї: од 1976. до 1980. року доцент, од 1982. рядови професор катедри за русийски язик, од 1992. рядови професор и шеф катедри за славянску филолоґию.[3]

 
Александер Дуличенко, госц Дружтва за руски язик, литературу и културу, май 1990. року

Александр Д. Дуличенко фаховец з обласци общого язикознавства (обща теория язика, социолинґвистика, етнолинґвистика, интерлинґвистика и др.) и славянскей филолоґиї.

Школяр є академика Н. И. Толстоя. Як студент ше почал дописовац зоз Малацком зоз Савиного Села, хтори му писал же є Руснак. Други Руснак з хторим ше А. Д. Дуличенко длуго дописовал, бул писатель Василь Мудри зоз Шиду. Вон ше заинтересовал за нашу народносц и наш язик а професор акад. Н. И. Толстой му суґеровал же би почал виучовац наш язик, цо вон и зробел и уж 1968. обявел першу статю о нїм, а року 1974. на Институту за славистику и балканистику Академиї наукох СССР у Москви одбранєл кандидатску (докторска нєгабилитацийна) дисертацию Литературни руски язик Югославиї (фонетика и морфолоґия).

Наукова робота edit

Интересованє А. Д. Дуличенка ше преширело и на други мали славянски литературни язики, хтори вон наволал микроязики: кашубски у Польскей, ґрадищанскогорватски у Австриї, молизкославянски у штреднєй Италиї, резиянски у Италиї при Удине, болгарски у Банату, ляшски у Шлезиї, чакавски, кайкавски, словенски у Прейґмурю, сербсколужицки, карпатскорусински и др. Року 1981. на Институту за язикознавство Академиї наукох Билорускей ССР у Минску одбранєл габилитацийну докторску (докторска II) дисертацию Славянски литературни микроязики.

Окрем того А. Д. Дуличенко пише и о „вельких” славянских язикох: русийским, сербским/горватским/бошняцким, словенским. Потераз обявел понад 500 науково роботи на 20 европских язикох. З общого и славянского язикознавства тримал преподаваня и на универзитетох / факултетох у Новим Садзе, Сараєву, Краснодару (Русия), Душанбеу (Таджикистан), Хелсинкию и Туркуу (Финска), Лозани и Цириху (Швайцарска), Ґетинґену, Триру, Сарбрикену, Ґрейфсвалду, Келну, Гейделберґу (СР Нємецка), Ополу (Польска), Москви, Ростову и др. У школским 2002/2003. року тримал преподаваня о славянских микроязикох (медзи нїма и о руским язику) у Триру (СР Нємецка).

Членство у фахових и наукових орґанизацийох edit

Предсидатель є Националного комитета Славистох Естониї, член Рускей матки, Дружтва за руски язик, литературу и културу, Кашубского института у Ґданьску (Польска), член Accademia Internazionale delle Scienze (Сан Марино), New York Academy of Sciences, Universala Esperanto Asocio и др.

Редактор є и видаватель двох серийних публикацийох Тартуского универзитета — Interlinguistica Tartuensis (од 1982) и Slavica Tartuensia (од 1985).

Авторски кїжки edit

На руским язику потераз му обявени два кнїжки: зборнїк статьох о руским язику Jugoslavo-Ruthenicа (Нови Сад, „Руске слово”, 1995) и Кнїжка о руским язику (Нови Сад, „Руске слово”, 2002). Окрем того, сам пририхтал и обявел архивни рукопис Г. Костельника Жалосцинки — серенчи и милей (Нови Сад, „Руске слово”, 1994).

Окрем спомнутих двох кнїжкох на руским язику А. Д. Дуличенко написал и тоти кнїжки:

  1. Славянские литературные микроязыки. Вопросы формирования и развития (Таллин, 1981. — 323 б.);
  2. Международные вспомогательные языки (Таллинн, 1990. — 448 б.);
  3. Русский язык конца XX столетия (Slavistische Beiträge. Bd. 317, München, 1994. — XII, 347 б.);
  4. Этносоциолингвистика ‘перестройки’ в СССР (Slavistische Beiträge. Bd. 378, München, 1994. — VII, 583 б.).

Литература edit

  1. Дюра Папгаргаї: Кнїжка паметаня о руским мену и язику (др Александер Д. Дуличенко: Кнїжка о руским язику), Studia Ruthenica, чис. 8, 2001-2003, б. 75
  2. Др Юлиян Рамач: Универзитетски проф. др Александер Д. Дуличенко, Studia Ruthenica, чис. 8, 2001-2003, б. 79
  3. Др Юлиян Рамач и мр Гелена Медєши: Нова кнїжка др Александра Д. Дуличенка о руским язику, Studia Ruthenica, чис. 14, 2009, б. 49-51.
  4. Др Михайло Фейса: Jugoslavo-Ruthenica II: Роботи з рускей филолоґиї и историї др Александра Д. Дуличенка, Studia Ruthenica, чис. 14, 2009, б. 52-53.
  5. Блаженка Хома Цветкович, Язични нїтки двох линґвистох, др Александер Д. Дуличенко о роботох Миколи М. Кочиша, Studia Ruthenica, чис. 16, 2011, б. 75-82.
  6. Дюра Латяк, Мойо контакти зоз др Александром Д. Дуличенком, Studia Ruthenica, чис. 16,2011,б. 83-91.
  7. Kunnap, Ago; Kuznetsov, S. N.; Lehfeldt, Werner (2006), Mikroiazyki, Iazyki, Interiazyki : Sbornik V Chest Ordinarnogo Professora Aleksandra Dmitrievicha Dulichenko, Tartu: Tartu Ulikool, Slaavi Filoloogia Oppetool, ISBN 9949-11-444-6.

Вонкашнї вязи edit

  • Aleksandr Dulichenko, John Z, 16. фебруар 2009, Википедия на анґлийским язику

Референци edit

  1. ↑ Особи хтори прияли Орден Билей Гвизди, 4-го ряду
  2. ↑ Биоґрафия А. Д. Дуличенка (на русийским язику)
  3. ↑ Academic staff of the University of Tartu
Retrieved from "https://incubator.wikimedia.org/w/index.php?title=Wp/rsk/Александр_Дмитриєвич_Дуличенко&oldid=6269098"