Ne tamal se takwal ne mukwa nujme ne Shiktal. Muchiwa iwan tishti. Ikman ne siwatket tisit katka ne sinti mujmusta ijpak ne metat. Ashan tik ne tejtechan nemit mojmolinoj pal muchiwa tishti. Nusan weli mukua tik se tiendaj tishti waktuk tik tewti, itukay iharinaj sinti. Iwan ne tishti weli muchiwa tamal, nakatamal, pujpupusa wan sejseuk pal titakwat. Ne mas kanawak ne tamal. Kwak tikchiwat tamal, tinat ka titashkaluat. Mukwi se chiupi tishti tik ne tumey wan mupajpachua itzalan tumajmatashkal hasta ma mupachana wan ma naka yawalnaj, wan muteka tik se kumal ijpak tit; muajkawa pak ne kumal se iratoj wan muishkwepa hasta ma uksi. Miak kikwat tamal mujmusta iwan se taiwan, ken nakat, et, quesoj wan muchi tay weli.
|
Tik Honduras ne tajtamal muchiwat kenha melka chiupichin mas pajpatawak. Tik Meshijku nusan kikwat tajtamal; ka né kichiwat sea pijpitzawak, wan yejemet nusan kipiat tajtamal ipal trigoj.