Piäjärvi (ven. Пяозеро, P'aozero) on Koutajoven vesistöh kuuluja järvi, kumpani šijaiččou Venäjällä Karjalan tašavallan pohjoisošašša Louhen piirissä.
Piäjärvi on niitä šyvie vesistöjä, kumpaset ollah oikein mielenkiintoiset kalaššukšen kannalta. Keškišyvyš on 15,4 m, kaikkein šyvin paikka – 49 m, korkopohja on šuuremmalta ošaltah mutani.
Rannat ollah mutkaset, kivikköiset tai čuuruset, mečittynyöt; šuvi- ta toičči itärannat ollah matalammat ta ušeičči šoistunuot. Järvellä on hyvin äijä šuarie ta lakšie.
Kalaššuš Piäjärvellä on mukahtempuava joka vuuvvenaikana. Talvella ta kevyällä koukkuh tarttuu ahven, hauki, harjuš ta šärki. Kešällä ta šykyšyllä šualehekši tulou lohi, nierieš, hauki, harjuš, šiika, ahven ta šärki.
Onnakko Piäjärvi on kuulusa ei vain hyvän kalaššukšen mahollisuolla. Ei ketänä jätä välinpitämättömäkši pohjosen villiluonnon kaunehuš, valkeijen öijen muajilma, konša päiväni laškeutuu ilmarannan tuakši vain pikkaraisekši hetkekši, ta yöllä on valkie, kuin ni päivällä.
Tyynen rajattoman järvenpinnan kaččelomini hil’l’akkaisin iltasin šuattau inehmistä rauhah, ropivon halkojen räiskymini ta lämmitetyn kylyn kaitani šavujuova, kalakeiton ta mečän tuokšuja, onko mitä šitä parempua...
Jalkamiehie šuattau kummekšimah šienien ta marjojen runšauš, luonnonmaisemien moninaisuš.
Lähtehet edit
https://web.archive.org/web/20150704123129/http://karelia-sever.ru/kr/north-karelia/pyaozero