Wp/isv/Калининград

Калининград (rus.: Калининград) јест град в Росији, административны центр једноназваној области, ктора находи се меджу Литвоју и Пољскоју. Највыше западны главны град крајин Росије. До 4 јулија 1946 года имал нємечску назву Конигсберг (něm.: Königsberg), и до конца Другој свєтовој војны входил в состав Нємцији. Оземје, кторе формујут Калининградску област, были прєданы Совєтскому сојузу (СССР) в часу Потсдамској конференције. Град находи се на рєкє Прегоље при јеј впаду в залив Вислы. На 2022 год в њем живе 498260 људиј.

Конигсбергска катедрала на острову Имануила Канта, Калининград.

Град Конигсберг (с нємечского "гора краља") был основан в 1255 году како замок криженосцами Тевтонского реда на памєт чешского краља Пжемысла Отакара 2. (1233–1278), кторы был најлєпшим војеным водитељем в походу против прусскых паганцев. В 14. столєтју в замку сбудовали катедралу. В 1525 году Конигсберг стал главным градом кнежства Прусије, а в 1701 году кнез Прусије Фредрик 3. провєдл в Кенигсбергу своју коронацију, а Берлин стал главным градом краљевства Прусије. Од 1773 до 1945 года Конигсберг был главным градом крајины Возходној Прусије, в составу краљевства Прусије, Нємечској империје, Вејмарској републикы и нацистичној Нємције.

В часу Другој свєтовој војны Прусија и Конигсберг долго не имали послєдств бојевых дєјаниј вслєд својего даљњего положенја, але в 1944 году британске лєтала силно бомбили јего. Послє битвы за Конигсберг нацистичне војска капитуловали град Чрвеној армији 9 априља 1945 года. Хисторично срєдишче града к тому часу было руиновано, вкључајучи катедралу, замок, вси црквы в центру града, стары и новы университет и стары округ складов.

По рєшенју Потсдамској конференције сєверна чест нємечској крајины Возходној Прусије, вкључајучи Конигсберг, была прєходно прєдана Совєтскому сојузу. Потом по Потсдамскому суглашенју она была вкључена в состав Совєтского сојуза. 7 априља 1946 года в составу Росијској СФСР была образована Конигсбергска област. 4 јулија 1946 года совєтска влада прєименовала град в Калининград послє смрти титуларного главы Совєтского сојуза Михаила Калинина, хот в Совєтском сојузу уж были грады Калинин (тутчас Твер) и Калининград в Московској области (тутчас Корољов).

Коло 25 тысечев нємцев, ктори остали се в граду, были депортовани в контролујему СССР возходну Нємцију в 1947 году. Град засєљали совєтскыми граджанами. Стары град не стали дєлати изнова, а руины замка помимо протестов обыватељев, хисториков и архитекторов разрушила совєтска влада.

Vněšnje linky

• Tutoj članok imaje prěvod iz članka "Kaliningrad" v Vikipediji na němečskom (spis avtorov; dozvoljeńje CC BY-SA 4.0).
• Tutoj članok imaje prěvod iz članka "Калининград" v Vikipediji na russkom (spis avtorov; dozvoljeńje CC BY-SA 4.0).