Naurun tasavalta eli Nauru on saarivaltio Tyynessä valtameressä lähelä ekvaattoria. Se on sekä väestölthään ette maapinta-alalthaan mailman pieniin ittenäinen tasavalta. Kaikista ittenäisistä valtioista se on sekä pinta-alalthaan ette väkiluvulthaan mailman kolmanneksi pieniin. Naurun parlamentti on jäsenmäärälthään kans yks mailman pienempiä, jäseniä on 18. Nauru on mailman ainua valtio, jolla ei ole viralisesti pääkaupunkia, eikä kaupunkia. Maan hallinto sijaittee Yarenissa, joka on kans valtion suuriin asutuskeskus. Naurun klimaatti on trooppinen ja maasta löyethiin vuona 1900 fosfaattia, jonka varassa maan ekonomi on ollu. Fosfaattivaroitten lähes loputtua 1990-luvun aikana maa on joutunu hakemhaan vaihtoehtosia tulonlähteitä. Samasta syystä maa on puliittisesti epätasanen; vuona 2003 maan presidentin virka vaihtui kuuesti. Ekonoomisitten prupleemitten takia Naurun ittenäisyys on vaakalauala; se on jo nyt riippuvainen Austraaliasta ja ulkopulitiikassa ette ekonoomisesti.
Naurussa ellää noin 14 000 ihmistä, joista 58 prusenttia on naurulaisia ja 26 prusenttia kotosin muilta Tyynenmeren saarilta. Kiinalaisia ja euruuppalaisia on molempia kaheksan prusenttia väestöstä. Naurun väestö on mailman lihavinta, sillä WHO:n vuona 2007 julkaisemitten tietoitten mukhaan 94,5 prusenttia maan väestöstä (yli 15 vuotta) on ylipainoisia. Suuriimat uskonot on Naurun konkrekasuunikirkko ja roomalaiskatoolilaisuus.
Amerikan Samoa | Austraalia | Cookinsaaret | Fidji | Franskan Polynesia | Guam | Kiribati | Marshallinsaaret | Mikronesia | Nauru | Niue | Norfolkinsaari | Palau | Papua-Uusi-Guinea | Pitcairn | Pohjois-Mariaanit | Pääsiäissaari |Salomonsaaret | Samoa | Tokelau | Tonga | Tuvalu | Uusi-Kaledonia | Uusi-Seelanti | Wallis ja Futuna | Vanuatu |