Wp/fit/Etelä-Korea

Korean tasavalta, epäviralisesti Etelä-Korea, on itäaasialainen valtio, joka käsittää Korean niemimaan eteläosan. Korean tasavalta rajautuu pohjoisessa Korean temukraattisheen kansantasavalthaan (Pohjois-Korea), jonka kans se muoosti yhen valtion vuotheen 1945 saakka. Korean tasavallan länsipuolela, Keltaisenmeren takana sijaittee Kiinan kansantasavalta ja kaakossa Korean salmen toisela puolela Japani. Suuriin osa maan väestöstä assuu kaupunkissa ja melkein puolet pääkaupunki Soulin metropoolialueela, joka on mailman kolmaneks suuriin kaupunkialue. Korean tasavallan väkiluku on noin 50 miljoonaa ja pinta-ala vain 98 480 kvatraattikilometriä, ja se merkittee ette maa on yksi mailman tihheimin asutuista valtioista.

Perustamisesthaan lähtien vuona 1948 maa on kamppailu 35 vuotta kestänheen Japanin miehityksen jälkipyykin, Korean soan ja vuosikymmenitten sotilasdiktatyyrin kans ja käyny läpi viis suurta perustuslain muutosta. Temukratiaa vaativat temonstrasuunit1980-luvula johit vaphaishiin vaalhiin vuona 1987. Nykyhään Korean tasavalta on temukratia, jossa on monipuoluejärjestelmä.

Korean tasavallan ekonomi on kehittyny kätevästi 1950-luvulta lähtien ja on nykyhään mailman kymmeneneks suuriin. Vielä 1960-luvula maa oli komunistista krannia Pohjois-Koreaa köyhempi. Maa on kans yksi mailman teknolookisesti kehittyneimistä ja tikiitaalisesti verkottuneimista valtioista. Valtiossa on mailman toiseks enniiten laajakaistaisia Internet-yhteyksiä asukasta kohti ja se on johtava näytöitten ja mupiilitelefuunitten valmistaja.

Korean tasavallan viiheteolisuus on kasvanu räjähysmäisesti 1990-luvulta tuottaen Aasian-laajuisia menestyksiä popmusiikissa, teevee-prukrammissa ja filmissä. Fenomeeni tunnethaan nimelä Hallyu, "Korean Wave", tai "Korean aalto". Maassa on kuitekki pietty kiini monesta monta sattaa vuotta vanhoista perintheistä, niin kun omista ruokatavoista ja vainajitten palvonasta.

Aasian maat