ဝၼ်းဢင်းၵၢၼ်း၊ ၸုၼ်ႇ 4၊ 2024
ႁိူၼ်းၵႅဝ်ႈၶၢဝ် လႆႈပိုၼ်ၽၢဝ်ႇ မိူဝ်ႈဝၼ်းၸၼ်ၼၼ်ႉဝႃႈ ၵႅမ်ၸွမ်ၸိုင်ႈဢမႄႇရိၵၢၼ်ႇ Kamala Harris လႄႈ ၽူႈပၼ်တၢင်းၶႆႈၸႂ် ပၢႆးႁူမ်ႇလူမ်ႈၸိုင်ႈမိူင်း ႁိူၼ်းၵႅဝ်ႈၶၢဝ် Jake Sullivan ၶဝ် တေၶိုၼ်ႈႁွတ်ႈ ပၢင်ၵုမ်ငမ်းယဵၼ်ယူႇၶရဵၼ်း ဢၼ်တေၸတ်းႁဵတ်းတီႈ မိူင်းသဝိတ်ႉၸႃႇလႅၼ်ႇၼၼ်ႉ ဝႃႈၼႆယဝ်ႉ။
လုမ်းၵႅမ်ၸွမ်ႈၸိုင်ႈ လႆႈလၢတ်ႈဝႃႈ တွၼ်ႈတႃႇၼႄဝႃႈ မိူင်းႁူမ်ႈတုမ်ဢမႄႇရိၵၢၼ်ၼႆႉ လႆႈမီးလွင်ႈၵမ်ႉထႅမ်မၼ်ႈၵႅၼ်ႇၼိူဝ် လွင်ႈသႂ်ႇႁႅင်းယူႇၶရဵၼ်း ဢၼ်တိုၵ်ႉၶတ်းယူႇ တႃႇလႆႈလွင်ႈငမ်းယဵၼ်ဢၼ်မၼ်ႈၵႅၼ်ႇၶၢဝ်းယၢမ်း ဢၼ်ဢိင်ၼိူဝ် လၵ်းပိူင်ပိုၼ်ႉထၢၼ် ၸုမ်းၸၢတ်ႈၸိုင်ႈလုမ်ႈၾႃႉ လႄႈ တႃႇၽွင်းငမ်း လႆႈ ဢႃႇၼႃႇပၢၼ်ႇ ၶွင် ၸိုင်ႈမိူင်းၼၼ်ႉလႄႈ ၵႅမ်ၸွမ်ၸိုင်ႈ Harris ၼႆႉ တေၵႂႃႇႁွတ်ႈထိုင် မိူင်းသဝိတ်ႉၸႃႇလႅၼ်ႇ ဝႃႈၼႆယဝ်ႉ။ တီႈၼႂ်းၶေႃႈပိုၼ်ၽၢဝ်ႇၼၼ်ႉ လၢတ်ႈဝႆႉဝႃႈ ၵႅမ်ၸွမ်ၸိုင်ႈ Harris ၼႆႉ တေပၼ်ၵႂၢမ်းမၼ်ႈထႅင်ႈဝႃႈ မၼ်းလႆႈပၼ်ႁႅင်း ၵူၼ်းမိူင်းယူႇၶရဵၼ်း ဢၼ်လႆႈထူပ်းတေႃႇသူႈၵၼ်တင်း လွင်ႈရတ်ႈသျႃးၶဝ်ပူၼ်ႉပႅၼ်ၶဝ်ႈတိုၵ်းယူႇၼၼ်ႉ ဝႃႈၼႆယဝ်ႉ။
ႁူမ်ႈဝႃႈ ၽၢႆႇရတ်ႈသျႃးၶဝ် လၢတ်ႈယူႇတိၵ်းတိၵ်းဝႃႈ ၵဵဝ်ႇၵပ်းလူၺ်ႈ လွင်ႈငမ်းယဵၼ်ယူႇၶရဵၼ်းသေ ပၢင်ၵုမ်မဵဝ်းလႂ်သေဢမ်ႇဝႃႈ မိူင်းရတ်ႈသျႃးလီလႆႈၶဝ်ႈႁူမ်ႈပႃးၼႆသေတႃႉၵေႃႈ တီႈပၢင်ၵုမ်ငမ်းယဵၼ် ဢၼ်တေႁဵတ်းတေႃႈလဵဝ်ၼႆႉၵေႃႈ ဢမ်ႇလႆႈ ၽိတ်ႈမွၵ်ႇရတ်ႈသျႃးဝႆႉ။ ပၢင်ၵုမ်ငမ်းယဵၼ် ဢၼ်မိူင်းသဝိတ်ႉၸႃႇလႅၼ်ႇ တေႁဵတ်းပဵၼ်ၸဝ်ႈႁိူၼ်းၼႆႉ မိူင်းၾီလိပ်ႈပိၼ်းၵေႃႈ တေၶိုၼ်ႈႁွတ်ႈပႃးသေ ယွၼ်ႉလူၺ်ႈ လႆႈၵမ်ႉထႅမ်ပၼ်ႁႅင်းၼင်ႇၼႆၼႆႉ ပဵၼ်ဢၼ်ယိၼ်းၸူမ်းတႄႉၼႆ ၸဝ်ႈၸွမ်ၸိုင်ႈယူႇၶရဵၼ်း Volodymyr Zelenskyy လႆႈမွၵ်ႇလၢတ်ႈၵႂႃႇ မိူဝ်ႈဝၼ်းၸၼ်ၼၼ်ႉယူႇ။
မိူဝ်ႈဝၼ်းတိတ်ႉၼၼ်ႉ ၸဝ်ႈၸွမ်ၸိုင်ႈ ၸႄႇလႅၼ်ႇသၵီး လႆႈမွၵ်ႇလၢတ်ႈမႃးတီႈ ပၢင်ၵုမ်ပၢႆးႁူမ်ႇလူမ်ႈ တီႈသိင်ႇၵႃႇပူဝ်ႇၼၼ်ႉဝႃႈ မိူင်းၶႄႇ ဢၼ်ၸွႆႈထႅမ် မိူင်းရတ်ႈသျႃး ဢၼ်ၶတ်းၸႂ် တႃႇၵဝ်းယုင်ႈ ပၢင်ၵုမ်ငမ်းယဵၼ် ဢၼ်တေၸတ်းႁဵတ်း ၼႂ်း ၸုၼ်ႇ 15-16 တႃႇသွင်ဝၼ်းၼၼ်ႉ ၶဝ်ႈလႆႈပၼ်ႁဵင်းတဵၵ်းၼိူဝ် မိူင်းတၢင်ႇမိူင်း ယႃႇႁႂ်ႈၶိုၼ်ႈႁွတ်ႈ ပၢင်ၵုမ်သဝိတ်ႉၸႃႇလႅၼ်ႇ ဝႃႈၼႆယဝ်ႉ။
ငိူၼ်ႈငဝ်ႈတိုၼ်း
edit- VOA News. "Vice President Kamala Harris to attend Ukraine peace summit in Switzerland this month" — VOA News, JUNE 3, 2024
- Zeke Miller. "Kamala Harris will represent the US at a Swiss ‘peace summit’ for Ukraine" — AP News, JUNE 3, 2024
- The Straits Times. "US VP Harris to attend Ukraine summit in Switzerland: White House" — The Straits Times, JUNE 4, 2024
- Cna. "VP Harris is to represent the US at Swiss 'peace summit' for Ukraine" — CNA, JUNE 4, 2024
- ZEKE MILLER AP white house correspondent. "Kamala Harris will represent the US at a Swiss 'peace summit' for Ukraine" — ABC News, JUNE 3, 2024
- South China Morning Post. "Kamala Harris to attend Ukraine summit in Switzerland after Biden opts ou" — South China Morning Post, JUNE 4, 2024
