ဝၼ်းဢႃးတိတ်ႉ၊ ၸုၼ်ႇ 16၊ 2024
.jpg)
ပၢင်ၵုမ်ငမ်းယဵၼ် ဢၼ်ယိူင်းဢၢၼ်း တႃႇၵိုတ်းလႆႈ လွင်ႈရတ်ႈသျႃး ၶဝ်ႈတိုၵ်းယူႇၶရဵၼ်းၼၼ်ႉ လႆႈတႄႇ တီႈ မိူင်းသဝိတ်ႈၸႃႇလႅၼ်ႇ မိူဝ်ႈ ဝၼ်းသဝ်ၼၼ်ႉသေ ၽူႈဢွၼ်ႁူဝ် တီႈ မိူင်း 90 မိူင်းပၢႆ လႆႈၶိုၼ်ႈႁွတ်ႈသေတႃႉ ၸုမ်းတူဝ်တႅၼ် ရတ်ႈသျႃးတႄႉ ဢမ်ႇလႆႈၶဝ်ႈပႃးသေ မိူင်းၶႄႇ ၵေႃႈ ဢမ်ႇလႆႈၶိုၼ်ႈႁွတ်ႈမႃး။
တီႈပၢင်ၵုမ် ဢၼ်ႁဵတ်းတီႈ ႁူင်းႁႅမ်းလိုဝ်ႈသဝ်း Bürgenstock ဢၼ်မီးတီႈႁိမ်း ၼွင်ၸိုဝ်ႈလိုဝ်းလင် Lucerne ၼၼ်ႉ ၽူႈဢွၼ်ႁူဝ်ၼႂ်းလူၵ်ႈၶဝ် ၼႆႉ လႆႈၵမ်ႉထႅမ်ပၼ် လၢႆးၵၢၼ်လွင်ႈငမ်းယဵၼ် 10 ၶေႃႈ ဢၼ် ၸဝ်ႈၸွမ်ၸိုင်ႈယူႇၶရဵၼ်း ဝေႃႇလေႃႇတီးမႃးရ် ၸႄးလႅၼ်းသၵီး တၢင်ႇလၢတ်ႈၼၼ်ႉသေ မီးတႃႇပၼ် ႁႅင်းတဵၵ်းရတ်ႈသျႃး ႁႂ်ႈၵိုတ်း ပၢင်တိုၵ်းယူႇၶရဵၼ်းၼၼ်ႉယဝ်ႉ။
တီႈပၢင်ဢုပ်ႇဢူဝ်းၼၼ်ႉ မီးတႃႇဢုပ်ႇဢူဝ်း လွင်ႈပၼ်ႁႃၶဝ်ၼၢမ်ႉတၢင်းၵိၼ် လႄႈ လွင်ႈႁူမ်ႇလူမ်ႈ ၼိဝ်ႇၵလီးယႃး တႄႇၵႂႃႇ ၸိူဝ်းပဵၼ် လွင်ႈမႆႈၸႂ် ဢၼ်ၵဵဝ်ႇၵပ်းလူၺ်ႈ ပၢင်တိုၵ်းၼၼ်ႉသေ ႁူမ်ႈဝႃႈ လႆႈမၵ်းမၼ်ႈ ရတ်ႈသျႃးပဵၼ် “ၽူႈၶဵၼ်“ တီႈ ပၢင်တိုၵ်း ယူႇၶရဵၼ်းသေတႃႉ မုင်ႈမွင်းဝႆႉ တေလႆႈ ပိူင်ယုၵ်းယၢင်ႇ ၶေႃႈတႅပ်းတတ်းယူႇ ဝႃႈၼႆယဝ်ႉ။
ၼႂ်းၶေႃႈမွၵ်ႇလၢတ်ႈ ၸဝ်ႈၸွမ်ၸိုင်ႈ ယူႇၶရဵၼ်း ဝေႃႇလေႃႇတီးမႃးရ် ၸႄးလႅၼ်းၸၵီး တီႈ ပၢင်ၵုမ် မိူဝ်ႈဝၼ်းသဝ်ၼၼ်ႉဝႃႈ ပေႃးဝႃႈ မိူင်းၸိူဝ်းဢၼ်ၶိုၼ်ႈႁွတ်ႈမႃး ပၢင်ၵုမ်ႇၼၼ်ႉ လႆႈၽွမ်ႉၸႂ် ၶေႃႈတၢင်ႇလၢတ်ႈမၼ်းယဝ်ႉၼႆ မၼ်းတေ ဢဝ် ၶေႃႈတၢင်ႇလၢတ်ႇၼၼ်ႉ သူင်ႇပၼ် မိူင်းရတ်ႈသျႃးသေ ဝၢႆးသေၼၼ်ႉ တေႁဵတ်းပၢင်ၵုမ်လွင်ႈငမ်းယဵၼ် ပွၵ်ႈၵမ်းသွင်သေ "တေဢုပ်ႇဢူဝ်း လွင်ႈၵိုၵ်းသိုၵ်း တႄႉတႄႉ" ဝႃႈၼႆယဝ်ႉ။
ၽူႈဢွၼ်ႁူဝ်ယူႇၶရဵၼ်း မွၵ်ႇလၢတ်ႈဝႃႈ ပၢင်ၵုမ် ဢၼ်ၸတ်းႁဵတ်း ၶၢဝ်းတၢင်းသွင်ဝၼ်းၼႆႉ လႆႈမုင်ႈမွင်းဝႃႈ တေႁဵတ်းလႆႈ "လွင်ႈငမ်းယဵၼ် ဢၼ်မီးလွင်ႈၽဵင်ႇပဵင်း" ဝႃႈၼႆယဝ်ႉ။ တီႈပၢင််ၸႅင်ႈၶၢဝ်ႇ လူၺ်ႈတင်း ၸဝ်ႈၸွမ်ၸိုင်ႈ သဝိတ်ႈၸႃႇလႅၼ်ႇ Viola Amherd ၼၼ်ႉ ၸႄးလႅၼ်းသၵီး လၢတ်ႈဝႃႈ ၽၢႆႇယူႇၶရဵၼ်းၼႆႉ တိုၼ်းဝႃႈ ဢမ်ႇၶႂ်ႈႁႂ်ႈမီး ပၢင်တိုၵ်းမႃးသေပွၵ်ႈသေ လွင်ႈၼႆႉၵေႃႈ မၼ်းပဵၼ် လွင်ႈၽၢႆႇရတ်ႈသျႃးၶဝ် ပူၼ်ႉပႅၼ်ပၵ်းပိူင်မၢႆမီး ၵၢၼ်ၽိတ်းၽိင်ႈ ၵူႈမိူင်းမိူင်းၼၼ်ႉယဝ်ႉ ဝႃႈၼႆ။ ပူႇထိၼ်ႇၼႆႉ မၼ်းပဵၼ် ၵေႃႉဢၼ်ဢဝ် လွင်ႈသုၵ်ႉယုင်ႈၼႆႉမႃး တေႃႇပေႃးပဵၼ် လွင်ႈတုၵ်ႉၶၶၢၼ်ၸႂ် ဢၼ်ပေႃးဢမ်ႇလၢမ်းလႆႈၼၼ်ႉ ၼႆယဝ်ႉ။
ငိူၼ်ႈငဝ်ႈတိုၼ်း
- Jamey Keaten and Aamer Madhani. "World leaders meet in Switzerland to discuss a Ukraine peace roadmap. Russia is notably absent" — AP News, JUNE 16, 2024
- Dave Graham and Sabine Siebold. "Ukraine summit strives for consensus, way forward uncertain" — Reuters, JUNE 16, 2024
- VOA News. "Zelenskyy presses world leaders to support 'a just peace' for Ukraine" — VOA News, JUNE 15, 2024
