Wn/shn/လုၵ်ႉတီႈဢီႇရၢၵ်ႈ ဢဝ်မၢၵ်ႇမိသ်ႉသၢႆး ယိုဝ်း ပၢင်သဝ်းတပ်ႉႁူမ်ႈပွင်း ၵၢၼ်ႇၶဝ် တီႈသီးရီးယႃး
ဝၼ်းဢင်းၵၢၼ်း၊ ဢေႇပရႄႇ 23၊ 2024
.svg)
တပ်ႉႁူမ်ႇလူမ်ႈဢီႇရၢၵ်ႈၶဝ် ပိုၼ်ၽၢဝ်ႇဝႃႈ မိူဝ်ႈတွၼ်ႈၶဝ်ႈ ဢေႇပရႄႇ 23 ၼၼ်ႉ လုၵ်ႉတီႈ ဢီႇရၢၵ်ႈ ပွတ်းႁွင်ႇသေ ဢဝ်မၢၵ်ႇမိသ်ႉသၢႆး ပိုတ်းယိုဝ်းၸူး တပ်ႉပၢင်သဝ်းဢၼ်ၼိုင်ႈ ဢၼ်မီးတီႈ သီးရီးယႃး ဢၼ်ပၼ်ဢွင်ႈတီႈဝႆႉတွၼ်ႈတႃႇ တပ်ႉႁူမ်ႈပွင်း ဢၼ်ဢမႄႇရိၵၢၼ်ႇ ဢွၼ်ႁူဝ်ၼၼ်ႉ ဝႃႈၼႆယဝ်ႉ။
တီႈၼႂ်း ၶေႃႈပိုၼ်ၽၢဝ်ႇ တပ်ႉႁူမ်ႇလူမ်ႈ ဢီႇရၢၵ်ႈၼၼ်ႉ လၢတ်ႈဝႆႉဝႃႈ တွၼ်ႇတႃႇ တုမ်ႉတွပ်ႇၶိုၼ်း လွင်ႈတိုၵ်းတေႃးဢၼ်ၼၼ်ႉ တပ်ႉသိုၵ်းဢီႇရၢၵ်ႈၶဝ် လႆႈႁဵတ်းလွင်ႈၵူတ်ႇႁႃ တီႈၸႄႈမိူင်းၼိၼ်ႇၼဝႃႇပွတ်းႁွင်ႇသေ လႆႈႁၼ် လူတ်ႉဢၼ်ၸႂ်ႉတႃႇ လွင်ႈတိုၵ်းတေႃးၼၼ်ႉ ဝႃႈၼႆယဝ်ႉ။ လွင်ႈတိုၵ်းတေႃးဢၼ်ၼႆႉ လႆႈပဵၼ်မႃး ဝၢႆးသေ ဢိတ်ႇသရေးၶိုၼ်းဢဝ်တရုၼ်းတေ ပိုတ်းယိုဝ်းတွပ်ႇတႅၼ်း လွင်ႈဢီႇရၢၼ်းၶဝ် တိုၵ်းတေႃး ဢိတ်ႇသရေးၼၼ်ႉယဝ်ႉ။
တီႈၼႂ်း ၶေႃႈပိုၼ်ၽၢဝ်ႇ တပ်ႉႁူမ်ႇလူမ်ႈ ဢီႇရၢၵ်ႈၼၼ်ႉ လႆႈမၢပ်ႇလၢတ်ႈဝႆႉဝႃႈ မိူဝ်ႈၽွင်း တွၼ်ႈၶမ်ႈ 9 မူင်း 50 မိၼိတ်ႉၼၼ်ႉ ၽုင်ၵူၼ်းဢၼ်ဢမ်ႇပဵၼ်တၢင်းၵၢၼ် ၸုမ်းၼိုင်ႈ လႆႈဢဝ် မၢၵ်ႇမိသ်ႉသၢႆးသေ ပိုတ်းယိုဝ်းၸူး ပၢင်သဝ်းတပ်ႉႁူမ်ႈပွင်းၵူႈမိူင်းမိူင်း ဢၼ်မီးတီႈၼႂ်း ၼႃႈလိၼ် သီးရီးယႃးၼၼ်ႉ ဝႃႈၼႆႉယဝ်ႉ။
ၸိူဝ်းပဵၼ်လူတ်ႉ ဢၼ်ၵပ်းၵၢႆႇလူၺ်ႈ လွင်ႈၵၢၼ်တိုၵ်းၼၼ်ႉ တပ်ႉႁူမ်ႇလူမ်ႈၶဝ် လႆႈဢဝ် ၽႆးၽဝ်ပႅတ်ႈယဝ်ႉ ဝႃႈၼႆ။ ၽူႈၼမ်းႁူဝ် ၸုမ်းပႂ့်တူၺ်းပၢင်တိုၵ်း ဢၼ်ပဵၼ် ၸုမ်းလူလွမ်ပႂ်ႉတူၺ်း သုၼ်ႇလႆႈသုၼ်ႇပဵၼ်ၵူၼ်း တီႈသီးရီးယႃး ဢၼ်ပဵၼ် ရႃႇမီႇဢပ်ႇၻႄႇလ်ရႃႇမၼ်ႇ လၢတ်ႈဝႃႈ လုၵ်ႉတီႈ ၼႂ်းၼႃႈလိၼ် ဢီႇရၢၵ်ႈသေ ဢဝ်မၢၵ်ႇမိသ်ႉသၢႆး ပိုတ်းယိုဝ်းတိုၵ်းတေႃး ပၢင်သဝ်းတပ်ႉ တီႈ ၶႃႇရတ်ႉဢႄႇလ်ၵျႃႇ ဢၼ်မီးတီႈ ၸဵင်ႇႁွင်ႇဝၼ်းဢွၵ်ႇ သီးရီးယႃးၼၼ်ႉ ဝႃႈၼႆႉယဝ်ႉ။ တီႈပၢင်သဝ်းတပ်ႉၼၼ်ႉ ဢမႄႇရိၵၢၼ်ႇၶဝ် လႆႈပၵ်းတပ်ႉဝႆႉယဝ်ႉ ဝႃႈၼႆ။
ၶဝ်မၢပ်ႇလၢတ်ႈဝႃႈတႄႉ မၼ်းပဵၼ် ၸုမ်းလုၵ်ႉၽိုၼ်ႉဢိတ်ႇသလၢမ်းမိသ်ႉ ဢၼ်မီးတီႈၼႂ်း မိူင်းဢီႇရၢၵ်ႈၼၼ်ႉ ႁဵတ်းမႃး ဝႃႈၼႆယဝ်ႉ။ ၸုမ်းၼၼ်ႉ မၼ်းပဵၼ် ၸုမ်းဢူၺ်းလီၵၼ်တင်း ၸုမ်း ဢၼ်ဢီႇရၢၼ်းၶဝ် ယူႇၽၢႆႇလင်သေ ၵမ်ႉထႅမ်ဝႆႉပၼ် ဝႃႈၼႆႉယဝ်ႉ။ ၸုမ်းၼၼ်ႉ လႆႈမွၵ်ႇလၢတ်ႈမႃးဝႃႈ မိူဝ်ႈၵၢင်လိူၼ် ဢွၵ်ႇထူဝ်ႇပႃႇ လႄႈ တွၼ်ႈၸဝ်ႉ လိူၼ်ၾႅပ်ႇဝႃႇရီႇၼၼ်ႉ လႆႈႁဵတ်းလွင်ႈတိုၵ်းတေႃး တပ်ႉဢမႄႇရိၵၢၼ်ႇမႃး ၼမ်သေပိူၼ်ႈဝႃႈၼႆယဝ်ႉ။
ငိူၼ်ႈငဝ်ႈတိုၼ်း
- Aljazeera. "Rocket attack from Iraq targets US base in Syria" — Al Jazeera English, April 22, 2024
- Reuters. "Five rockets fired from Iraq towards U.S. military base in Syria" — Reuters, April 22, 2024
- News Wires. "Rockets fired from northern Iraq target US-led coalition base in Syria" — France 24, April 22, 2024
- Guardian staff and agencies. "Iraq militant group says it is resuming attacks on US forces as base in Syria is targeted" — The Guardian, April 21, 2024
- Sherif Tarek / Bloomberg. "U.S. Military Base in Syria Struck by Rockets Fired From Iraq" — Time, April 22, 2024
