Wn/shn/ဢီႇရၢၼ်းတုၵ်းယွၼ်း တႃႇဢုပ်ႇတီႈ UNSC ၵဵဝ်ႇၵပ်း လွင်ႈလုမ်းၽွင်းတၢင်ႇဢွၼ်ႇ ထုၵ်ႇတိုၵ်း

ဝၼ်းဢင်းၵၢၼ်း၊ ဢေႇပရႄႇ 2၊ 2024 

လုမ်းၽွင်းတၢင်ဢွၼ်ႇ ဢီႇရၢၼ်း ဢၼ်ၺႃးတိုၵ်း တီႈ ဝဵင်းလူင်တႃမၢသ်ႉၵၢသ်ႉ၊ မိူင်းသီးရီးယႃး

ဢီႇရၢၼ်း တုၵ်းယွၼ်း တႃႇႁွင်ႉပၼ် ပၢင်ၵုမ် ၶိုၵ်ႉၶၵ်ႉ တီႈ ၶွင်ႇသီႇပၢႆးႁူမ်ႇလူမ်ႈ တႃႇဢုပ်ႇဢူဝ်း လွင်ႈလုမ်းၽွင်းတၢင်ဢွၼ်ႇ ဢီႇရၢၼ်း ဢၼ်မီးတီႈ ဝဵင်းလူင်သီးရီးယႃး လႆႈလုလႅဝ်ၵႂႃႇ ယွၼ်ႉ ဢိတ်ႇသရေးၶဝ် ဢဝ်ႁိူဝ်းမိၼ် ပွႆႇမၢၵ်ႇသႂ်ႇၼၼ်ႉယဝ်ႉ။ ယွၼ်ႉလွင်ႈပွႆႇမၢၵ်ႇ မိူဝ်ႈဝၼ်းၸၼ် လိူၼ်ဢႄႇပရႄႇ 1 ဝၼ်းၼၼ်ႉလႄႈ ၽူႈပၼ်တၢင်းၶႆႈၸႂ် ၵၢၼ်သိုၵ်း ၸၼ်ႉသုင် ၵေႃႉၼိုင်ႈလႄႈ ဢိၵ်ႇတင်း ၵူၼ်း 7 ၵေႃႉ လႆႈတၢႆၵႂႃႇၼႆ တပ်ႉလုၵ်ႉၽိုၼ်ႉပႂ်ႉမိူင်း ဢီႇရၢၼ်း လႆႈပိုၼ်ၽၢဝ်ႇဝႆႉဝႃႈၼၼ်။

ၽွင်းတၢင်လူင်ဢီႇရၢၼ်း Zahra Ershad လႆႈတႅမ်ႈလိၵ်ႈ ပွင်ႇထိုင် ၶွင်ႇသီႇပၢႆးႁူမ်ႇလူမ်ႈ မိူဝ်ႈဝၼ်းၸၼ်ၼၼ်ႉဝႃႈ မိူဝ်းၼႃႈမႃး တႃႇယႃႇႁႂ်ႈမီး လွင်ႈႁၢႆႉၸႃႉမိူၼ်ၼႆထႅင်ႈလႄႈ တွၼ်ႈတႃႇ ယႃႇႁႂ်ႈမီး လွင်ႈတိူဝ်ႉၶိူၵ်ႈၼိူဝ် ၵၢၼ်ငၢၼ်း ၵဵဝ်ႇၵပ်း ၽွင်းတၢင်လႄႈ ႁႂ်းႁွင်ႉပၼ် ပၢင်ၵုမ်ၶိုၵ်ႉၶၵ်ႉ ဝႃႈၼႆယဝ်ႉ။ ၽၢႆႇဢိတ်ႇသရေးတႄႉ ၵဵဝ်ႇၵပ်းလူၺ်ႈ လွင်ႈတိုၵ်းတေႃးဢၼ်ၼႆႉသေ လႆႈထဵင်ဝႆႉ တႃႇမွၵ်ႇလၢတ်ႈ သေၸိူဝ်ႉသေလွင်ႈယူႇ။

ဢိတ်ႇသရေးၼႆႉ ၸဵမ်မိူဝ်ႈ ပီပူၼ်ႉမႃးၼၼ်ႉ ၶဝ်လႆႈတိုၵ်း ယိူင်းမၢႆႁူဝ်ပၢၵ်ႇမၼ်း ၸိူဝ်းမီးတီႈၼႂ်း ၼႃႈလိၼ် ဢၼ်လူင်ပွင်ၸိုင်ႈၵုမ်းၵမ်ဝႆႉ တီႈၼႂ်း မိူင်းသီးရီးယႃးၼၼ်ႉယူႇ။ ၵူၺ်းၵႃႈဝႃႈ ဝၢႆးသေ ပၢင်တိုၵ်း ဢိတ်ႇသရေး-ႁႃးမၢတ်ႉသ် လႆႈတႄႇ မိူဝ်ႈပူၼ်ႉမႃး ႁူၵ်းလိူၼ်ၼၼ်ႉယဝ်ႉသေ ၽၢႆႇဢိတ်ႇသရေးၶဝ် လႆႈတိူဝ်းႁဵတ်း လွင်တိုၵ်းတေႃးမႃးသေ တီႈလႅၼ်လိၼ် လႄႇပႃႇၼွၼ်ႇ လႄႈ ဢိတ်ႇသရေးၼၼ်ႉၵေႃႈ တင်း ၸုမ်းၵေႃႇၵၢၼ်ႁၢႆႉ ႁႅသ်ႉပူဝ်ႇလႃႇ လႄႈ တပ်ႉသိုၵ်းဢိတ်ႇသရေးၶဝ် ၶဵင်ႇတိုၵ်းၵၼ်ဝႆႉယူႇ။

ၶၢဝ်ႇ ဢၼ်ၵဵဝ်ႇၵပ်း

• "Wn/shn/ဢိတ်ႇသရေး ဢဝ်ႁိူဝ်းမိၼ် ယိုဝ်း လုမ်းၽွင်းတၢင်ဢွၼ်ႇဢီႇရၢၼ်း တီႈ သီးရီးယႃး" — ဝီႇၶီႇၶၢဝ်ႇ၊ April 2, 2024

ငိူၼ်ႈငဝ်ႈတိုၼ်း

• VOA News. "Iran calls for UN Security Council meeting after Israeli airstrike destroys Iranian consulate in Syria" — VOA News, April 2, 2024
• VOA News. "ကောင်စစ်ရုံး တိုက်ခိုက်ခံရမှု လုံခြုံရေးကောင်စီမှာ ဆွေးနွေးဖို့ အီရန်တောင်းဆို" — VOA News, April 2, 2024