Wn/shn/ရတ်ႈသျႃးၼႄးဝႃႈ ၸုမ်းၼေႇတူဝ်း ၶဝ်ႈပႃးၼႂ်းပၢင်တိုၵ်း တီႈမိူင်းယူႇၶရဵၼ်း

ဝၼ်းသုၵ်း၊ ၸူႇလၢႆႇ 12၊ 2024 

ၽူႈၼမ်းၼႂ်း ပလိၼ်ႇၵႅၼ်ႇ ႁူမ်ႈၵၼ်တင်း ၸွမ်ပွင်ၸိုင်ႈ ပၢႆႇတႅၼ်ႇ ႁူပ်ႉထူပ်း ၸွမ်ပွင်ၸိုင်ႈ မိူင်းယူႇၶရဵၼ်း

ၽူႈတၢင်လၢတ်ႈ လူင်ပွင်ၸိုင်ႈ ရတ်ႈသျႃး တီႇမီႇထရီႇ ပႅတ်ႉသၵူဝ်ႇ လၢတ်ႈတီႈ သိုဝ်ႇၶၢဝ်ႇ ဢၼ်လူင်ပွင်ၸိုင်ႈ ၵုမ်းၵမ်ၼၼ်ႉဝႃႈ ရတ်ႈသျႃး လၢတ်ႈဝႃႈ ၸုမ်းၼေႇတူဝ်း ပွတ်းတူၵ်း ၶဝ်ႈပႃးၼႂ်း ပၢင်တိုၵ်း တီႈမိူင်းယူႇၶရဵၼ်း တဵမ်ထူၼ်ႈၼႆသေ ႁၢင်ႈႁႅၼ်း တႃႇတေ တုမ်ႉတွပ်ႇ တႃႇတေ ၵုမ်းထိင်း လွင်ႈလွၵ်ႇငိူတ်ႈ လၢႆလၢႆလွင်ႈ ဢၼ်လုၵ်ႉတီႈ ၸုမ်းၼေႇတူဝ်း မႃးၼၼ်ႉယူႇၼႆယဝ်ႉ။

ၸွမ်ပွင်ၸိုင်ႈ မိူင်းယူႇၶရဵၼ်း ဝေႃႇလေႃႇတီးမႃးရ် ၸႄးလႅၼ်းသၵီး လၢတ်ႈဝႃႈ ၼင်ႇႁိုဝ် တေၶိုၼ်းၽိုၼ်ႉၶိုၼ်း လွင်ႈရတ်ႈသျႃး ၶဝ်ႈတိုၵ်းၼၼ်ႉ လၢၵ်ႈၼၢၵ်ႈဢၼ် မိူင်းဝၼ်းတူၵ်းၶဝ် ၵမ်ႉၸွႆႈၼၼ်ႉ ၸၢင်ႈၸႂ်ႉတိုဝ်းလႆႈ ၵႂၢင်ႈၵႂၢင်ႈၶႂၢင်ၶႂၢင်ယူႇ ၼႆယဝ်ႉ။ မိူဝ်ႈဝႃးၼႆႉ မိူဝ်ႈၸွမ်ၸိုင်ႈ ၸႄးလႅၼ်းသၵီး မႃးႁူပ်ႉထူပ်း ၽူႈတႅၼ်းသၽႃးမိူင်းဢမႄႇရိၵၢၼ်ႇ၊ မိူဝ်ႈႁွင်ႈၵၢၼ် ၸုမ်းဝီႇဢူဝ်ႇဢေႇ ထၢမ်ဝႃႈ ၸွင်ႇတေၸၢင်ႈလူတ်းယွမ်းလႆႈ လွင်ႈႁႄႉႁၢမ်ႈ လွင်ႈၸႂ်ႉတိုဝ်း ၵွင်ႈၵၢင်ႇၸိူဝ်းၼႆႉ တင်းမူတ်းၼႆၼၼ်ႉ မၼ်းလၢတ်ႈဝႃႈ “ႁဝ်းၶႃႈ မုင်ႈမွင်းၸိူင်ႉၼၼ်ယူႇ” ၼႆယဝ်ႉ။ ၸွမ်ပွင်ၸိုင်ႈ ၸႄးလႅၼ်းသၵီး ဢၼ်မီးတီႈမိူင်းဢမႄႇရိၵၢၼ်ႇ ၽွင်းပၢင်ၵုမ်လူင် ၸုမ်းၼေႇတူဝ်းၼၼ်ႉ တေႁူပ်ႉထူပ်း ၸွမ်ပွင်ၸိုင်ႈ ဢမေႇရိၵၢၼ်ႇ ၵျူဝ်းပၢႆႇတႅၼ်ႇ သုၼ်ႇတူဝ် မိူဝ်ႈၼႆႉ (လိူၼ်ၸူႇလၢႆႇ 11 ဝၼ်း) ၼႆယဝ်ႉ။

မိူဝ်ႈဝႃးၼႆႉ ၸွမ်ပွင်ၸိုင်ႈၸႄးလႅၼ်းသၵီး ႁူပ်ႉထူပ်း ၽူႈတႅၼ်းသၽႃး လႄႈ သၽႃးသုင် ဢိၵ်ႇပႃး ၸွမ်ပွင်ၸိုင်ႈ မၢႆႉၵျွၼ်ႇသၼ်ႇ တီႈလုမ်းတႅၼ်းၽွင်း မိူင်းဢမႄႇရိၵၢၼ်ႇသေ ယွၼ်းႁႂ်ႈၶဝ် ၸွႆႈထႅမ် လူၺ်ႈဢမ်ႇပႂ်ႉထိုင် လိူၼ်ၼူဝ်ႇဝႅမ်ႇပႃႇ ၼႆယဝ်ႉ။ လိူဝ်ၼၼ်ႉ ၸွမ်ပွင်ၸိုင်ႈ ၸႄးလႅၼ်းသၵီး လႆႈမွပ်ႈယိုၼ်ႈပၼ် သူးၼမ်ႉၵတ်ႉ ၸၼ်ႉၼိုင်ႈ တီႈၽူႈဢွၼ်ႁူဝ် ၽၢႆႇၼမ် ၼႂ်းသၽႃးသုင် ၶျၢၵ်ႉသျူႇမႃႇ လႄႈ ၽူႈဢွၼ်ႁူဝ် ၽၢႆႇဢေႇ မိတ်ႉၶျ် မႅၵ်ႉၶွၼ်ႇၼႄႇ ၼႆယဝ်ႉ။

ငိူၼ်ႈငဝ်ႈၶၢဝ်ႇ

• ဗွီအိုအေ (မြန်မာဌာန). "ယူကရိန်းစစ်ပွဲမှာ နေတိုးအဖွဲ့ ပါဝင်လာနေပြီလို့ ရုရှားစွပ်စွဲ" — VOA News, July 11, 2024