Wb/nia/Ruti/4

I. Isanu mbenua Gelimelekhi Boasi ba ihalö Ruti edit

1 Ba möi miyaŵa ba mbawa göli Mboasi ba mudadao ia ba da'ö. Ba me itörö sibai sananu andrö, niŵa'ö Mboasi, ba imane khönia: Ae ba da'e, sane, dadao tou!

Ba möi ia ba ngainia, mudadao ia.^[1]

2 Ba dafulu iŵa'ö satua Boasi, imane: Midadao tou, ba da'e! Ba me no dumadao ira, ba imane khö zananu andrö: 3 Benua andrö khö ga'ada Elimelekhi andrö, ba no i'amaŵa Na'emi andrö, si no mangawuli moroi ba danö Ndraono Moabi. 4 Ba no uŵa'ö tödögu, ufarongogö khöu, umane: Tema sanu ia, ba zi so andre, ba zi so satua mbanuada andre. Na nilau dödöu sananu ndra'ugö, ba sanu ia. Ba na lö omasi'ö ösanu, ba ombakha'ö khögu, ena'ö u'ila watahögö! Baeromö, ba samösa lö si tola mananu ya'ia, hatö ya'o, na aefa ndra'ugö!

Ba imane: Ya'odo zananu.

5 Ba imane Boasi: Ba na luo ö'öli mbenua andrö khö Na'emi, ba khöu göi Ndraono Moabi andrö, lakha zi no mate andrö, ba wangorifi töi zi mate andrö ba dana khönia tanö andrö.

6 Ba imane sananu no mege: Ba tebai usanu, fa böi tefara'u dana khögu ube'e. Sanu khöu nisanugu ena'ö, me tebai ya'odo zananu.

7 Ba ba Ndraono Gizeraeli me föna, amaedola nitutu tanö, na so nisanu ba ma nifalalini, ba iheta mbadagahenia ba ibe'e khö nawönia — da'ö wangaro hadia ia ba Ndraono Gizeraeli.

8 Ba imane sananu andrö [ena'ö] khö Mboasi: Sanu ia khöu! ba iheta mbadagahenia.

9 Ba imane Boasi ba zatua mbanua ba ba zato fefu: Ya'ami zi so ba mbörö ma'ökhö, wa no u'öli gokhöta Gelimelekhi andrö fefu ba okhöta ndra Maloni Khiliyoni fefu, khö Na'emi andrö. 10 Ba baero ö, ba no uhalö göi Ndraono Moabi andrö, Ruti andrö, lakha Maloni, ba wangorifi töi zi no mate andrö ba dana khönia tanö, ena'ö böi taya döi zi no mate andrö ba watalifusöta ba ba mbawa göli mbanuara — ya'ami zi so ba mbörö ma'ökhö!

11 Ba lamane sato fefu, ba da'ö ba mbawa göli, awö zalaŵa: Si so ba mbörö ndra'aga! Yamutolo ndra alawe andrö, si möi yomo khöu Yehowa, ena'ö si mane Rakhela ba Lea, awe Ndraono Gizeraeli andrö si darua! Ya salaŵa ndra'ugö ba Geferata ba ya teturia döimö ba Mbetilekhema!^[2] 12 Ba ya si mane omo Weresi andrö, ono Yuda khö Damara, nomou, ba nga'ötö andrö, nibe'e Yehowa khöu dania, ono ndra alawe andrö, si hulö nono alawe na.^[3]

II. Mo'ono Ruti, ono matua. Tua Dawido edit

13 Ba ihalö Ruti andrö Boasi, tobali fo'omonia. Ba me orudu ia khönia, ba ibe'e khönia Yehowa manabina ia, ba mo'ono, ono matua.

14 Ba lamane ira alawe khö Na'emi: Nisuno Yehowa, si no manehe khöu sananu ma'ökhö, tobali tetötöi dania döinia ba Ndraono Gizeraeli. 15 Da'ö zangokafui tödöu ba sondrorogö ya'ugö ba wa'atuamö, me no umönöu andrö, sangomasi'ö ya'ugö, zadono ya'ia — ya'ia andrö, si no abölö moguna khöu, moroi ba zi dafitu ono matua.

16 Ba ihalö nono andrö Na'emi, ihagi ba tobali sangai ono ia.

17 Ba lafatörö döi ira alawe si fahatö omo khönia, lamane: No mo'ono Na'emi; ba Obedi labe'e töinia — ya'ia nama nama Dawido andrö, Iza'i.

18 Ba da'e nga'ötö Weresi andrö: Ono Weresi, ba Eseromo,^[4] 19 ba ono Geseromo ba Aramo, ba ono Garamo, ba Aminadabi, 20 ba ono Gaminadabi, ba Nahaso, ba ono Nahaso, ba Salemo, 21 ba ono Zalemo, ba Boasi, ba ono Mboasi, ba Obedi. 22 Ba ono Gobedi, ba Iza'i, ba ono Giza'i, ba Dawido.