Wb/nia/Ruti/2

I. Mangozaragö lai gandru Ruti ba nowi Mboasi

1 Ba so nakhi Na'emi andrö, talifusö Gelimelekhi, niha so'ana'a, Boasi döinia.

2 Ba imane Ruti andrö, Iraono Moabi, khö [ninania] Na'emi: Damöido ba nowi [zonowi] ba wangozaragö lai, moroi furi zebua tödö khögu!

Ba imane khönia: Ae'e, onogu!

3 Ba möi ia, irugi ba mangozaragö lai ia ba nowi andrö, moroi furi zamasi: ba hulö zi no muŵa'ö khönia, wa no khö Mboasi andrö nowi andrö, Boasi talifusö Gelimelekhi.

II. Fa'ebua dödö Mboasi khönia

4 Ba hiza ba so moroi yomo ba Mbetilikhema Mboasi, ba i'owai zamasi, imane: Yamutolo ami Yehowa!

Ba latema linia, lamane khönia: Yamufahowu'ö ndra'ugö Yehowa!

5 Ba imane Boasi khö zawuyunia andrö, sanaro samasi: Ha ökhö nono alawe andrö?

6 Ba imane khönia sawuyu andrö, sanaro samasi: Ono Ndraono Moabi, ya'ia zi fao khö Na'emi no moroi ba danö Ndraono Moabi. 7 No isofu, imane: Hadia, tola u'ozaragö lai, he ba gotalua ngamböbö, moroi furi zamasi? ba so ia, ba lö nibatonia, i'otarai zi hulö wongi, irugi iada'e, ba ma'ifu lö solombase ia.

8 Ba imane Boasi khö Ruti: Örongo, onogu: Böi ae ba nowi bö'ö, ba wangozaragö lai, böi röi da'e; fao-fao'ö ba nono alawe khögu. 9 Töngöni nowi andre, ba zamasi ira, ba o'ö ira: noa sa ube'e li ba zawuyugu andrö, fa böi lategu'ö. Ba na owökhi dödöu, ba ae ba migö andrö, ba badu nita'u zawuyugu.

10 Ba ifalögu tou ia ba danö, imane khö Mboasi: He moroi, wa falukhado khöu wa'ebua dödö, wa öfaigi ndra'o, lö lai wa no niha baero ndra'odo?

11 Ba itema linia Boasi, imane khönia: Noa sa la'ombakha'ö khögu fefu, he wisa ndra'ugö khö ninau andrö, me no mate wo'omou, awö wa no öröi ndra amau inau ba banuami, we'amöi ba niha bö'ö, si lö örai mila mege. 12 Yamusulöni khöu Yehowa nilaumö andrö, ya lö ambö luou khö Yehowa, Lowalangi Ndraono Gizeraeli, ba zi möi'ö mangalui saŵatö, barö gafinia.

13 Ba imane khönia: He Tua, ena'ö na sebua tödö ndra'ugö khögu! Noa sa örara dödögu ba no öhaogö wehede khö genoniu ira alawe, lö lai wa tenga si mane enoni ira alawe khöu ndra'odo.

14 Ba me inötö wemanga, ba imane khönia Boasi: Ae ba da'e ba a wöfö göma, ba ungugö ba nirö aisö andrö göu kue! Ba mudadao ia ba ngai zamasi andrö, ba ibe'e önia mböra nifakoe, tobali abuso ia ba so zi tosai khönia.

15 Ba me ifuli möi, ba wangozaragö lai, ba ibe'e li ba zawuyunia Boasi, imane: Hana na ba gotalua ngamböbö göi itutuyu, böi mitegu ia. 16 Midöni na'i ma'ifu khönia ba ngamböbö, miröi tou, ena'ö i'ozaragö, ba böi mihede-hede'ö ia!

III. I'ombakha'ö da'ö khö ninania Ruti

17 Ba mangozaragö lai ia ba nowi da'ö, irege bongi, ba me iböbörö ni'ozaragönia, ba no arakha dombua yöu gandru. 18 Ba i'ohe, ba me irugi yomo, ba i'ila inania ni'ozaragönia. Ba isao'ö baero zi tosai khönia mege, me abuso ia, ibe'e khö ninania.

19 Ba imane khönia inania: Heza mangozaragö lai ndra'ugö ma'ökhö, heza mohalöŵö'ö? Ya'ahowu zanolo ya'ugö!

Ba itunö khö ninania, heza mohalöŵö ia, imane: Boasi döi niha andrö, sohalöŵö ndra'o ma'ökhö.

20 Ba imane Na'emi khö numönönia: Yamufahowu'ö ia Yehowa, me lö nibödania fa'ahakhö dödönia, he ba zauri andre ba he ba zi no mate andrö. Ba imane na khönia Na'emi: Ga'ada niha andrö, sananu ya'ita ena'ö.

21 Ba imane Ruti, Iraono Moabi andrö: Noa sa göi iŵa'ö khögu: Fao-fao ndra'ugö ba zöhalöŵö khögu, irege awai mbasitögu khöra.

22 Ba imane Na'emi khö numönönia Ruti: Lau, onogu! fao ndra'ugö khö nono alawe andrö khönia; lö'ö mötö lafasao'ö ba nowi niha bö'ö!

23 Ba fao-fao ia ba nono alawe andrö khö Mboasi, irege awai wamasi rigi ba famasi gandru: ba khö ninania sa'ae i'iagö.

Famotokhi ba gahe

Fabaliŵa lala

Olayama Ruti: 1 • 2 • 3 • 4

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö