Wb/nia/Fa'atua-tua Duada Hia

VII. Fa'acua-cua Duada Hia

1.
Ba me mo tohare wa'ebua,
ba hiza me tohare mboto,

Duada Hia Walangi Adu,
Duada Hia Walangi Luo,

oi naha ganofula zi hönö,
oi naha ganofula zato.

Oi ni'o'amagö zi hönö,
oi ni'o'amagö zato,

zi lö cumögö lö humeu,
zi lö tebua lö tegilo.

Itema ilau nomo si siŵa selötö,
itema ilau nomo si siŵa ndroro;

itanö Mbehu si macua,
itanö Mbehu sesolo,

ba zu'asa nomonia ledaŵa,
ba zu'asa nomonia tuho,

ibe ba dalu golayama,
ibe ba dalu zalo'o.

10.
Ilabu Harefa Gowasa,
ilabu Harefa Zemo,

ibe ba zuzuma hörö zi hönö,
ibe ba zuzuma hörö zato.

nahia zangona si hönö,
nahia zangona sato.

Ilabu go'erea gowasa,
ilabu go'erea Zaho,

ifasilu hao si tölu,
ifasilu hao faedo;

ilabu ni'omanu-manu,
ilabu ni'osilatao

ba mbawa göli zi hönö,
ba mbawa göli zato.

Ilabu ni'obösi gowe,
ilabu ni'obösi dao,

ilare mbanua zambalika,
ilare mbanua zandroro,

i'ehao mbanua zi hönö,
i'iehao mbanua zato.

20.
Ba me tohare gera-era fewuwua,
me tohare mboto ba ndroro,

ilau lakhömi namania Langi Sagörö,
ilau lakhömi namania Langi Sebolo.

Me lö ba zuzuma hörönia,
me lö khönia maedo-maedo,

andrö wa ifazökhi ma'usö lölö waöhö,
andrö wa ifazökhi ma'usö adulo.

lfosikhala hulö niha,
iwöwöi hulö ndraono,

ibe ba galisi nomo ledaŵa,
ibe ba galisi nomo tuho,

Andrö nifotöi adu nuwu zatua,
andrö nifotöi adu nuwu ndroro,

zihulö khala-khala niha,
zihulö khala-khala maedo-maedo.

Me no te'anö yaŵa ba galisi,
ba galisi nomo cuho,

itema fatewu lakhömi namania,
itema fatewu ziroro.

30.
Ilau mo'ere manalagui fondrahi,
ilau mo'ere manalagui Zaho,

ilau molohe töla wamaöndrua,
ilau molohe töla fewuwua,

icumbo bulu neziwala,
icumbo bulu gejuwua,

ilau mo'ere ibali'ö niha,
i'orei nadu mo'iraono.

Imane:

Ufobawa ba dalua,
ufohörö zi dombua,

ufotöla nazuzua,
ufo'ikhu humöfua

ufofiso dobulua,
ufobewe mamecua,

ufoboha ziŵalua,
ufo'ifö zicumbua,

ufolela zagulua,
ufotölö-tölö naeruma nogua;

ufota'io manigarua,
ufoturu mafulua,

40.
ufosa'a molaezuma,
ufo'ahe ma'azua,

ufotödö ba zinua,
ufobo sanarawua,

ufoga'a-ga'a gate,
ufo'amauruta mbua,

ufofali'a zizua,
ofotawö ombuyua,

becuau anorazaö,
becuau angorudua.

Botomö ma'afefua,
ufo'uli mowarua,

ufobu si tefuyua,
u'aitöni mae haria,

ufonoso zazuyua,
ufoli hanu-hanua.

Famonosou mbawa wondrahi,
famonosou mbawa nga'ua,

yatokea tobali dödö,
yatokea atötöna.

50.
Yacumaro hulö zo'e,
yacumaro hulö la'urua

lakhömi nama sirorogö,
lakhömi namania sacua.

Hadia khöu rai ba dangi-dangi,
hadia rai ba gazuzua?

Ya'ia geu nitanö ba Ga'ai,
eu si fatoto sacua,

zi so ba dödö dangi-dangi,
zi so ba dödö dawuuua;

nitanö ba Ga'ai Idanö Langi,
ba Ga'ai Idanö Luo;

Ya'ia wösi Nama Langi Sagörö,
ya'ia wösi Nama Langi Sebolo,

si fao ba wondrada Tuada Hia Walangi Adu,
si fao ba wondrada Tuada Hia Walangi Luo,

Me mo latanö ia ba Ga'ai Idanö Nadu.
me mo latanöi ia ba Ga'ai Idanö Luo,

moŵa'a ia lehe töla zaga,
moŵa'a ia ekhe ifö zuo;

60.
me ilölö mbörö sotöra
me ilölö mbörö muko,

samba cugala khönia lali ngai,
ba sandrohu totoa lali mboto;

föfö geu siso yaŵa ba langi,
föfö geu si so yaŵa ba luo,

ya'ia wösi o'erea zi hönö,
ni'o'erea zato,

da'ö geu so'öba sikaramö,
da'ö geu tefaö mboto,

da'ö geu si fao ba we'aso ba langi,
da'ö geu si fao ba we'aso.

Nitöngöni

• Hikaya andre tou tehalö moroi ba zinura Martin Thomsen ba Grete Thomsen, Die Sage vom Stammvater Hija. Ein Gesang aus Mittelnias, Zeitschrift für Ethnologie, Bd. 104, H. 2 (1979), nga'örö 209-277.
• Lala wanura no molo'ö dialek Nias Tengah, ba lö nifawu'a ya'ia ba da'e tou
• No mufagölösi ila-ila zura/ejaan (j tobali y, ch tobali kh ba tj tobali c)
• Bakha ba teks, itaria lafasahe ba itaria göi lafabali wehede faoma tandra famabali (-). No u'atulö'ö ia fefu tobali simane fanura ba Li Indonesia faoma tandra wamabali.

Angolifa nösi

I. Böröta Niha Tou ba Danö. II. Böröta Danö. III. Fa'atumbu Duada Hia. IV. Lafailo Tou ba Danö. V. Tanömö zi Siŵa Motöi. VI. Fo'okhöta Duada Hia. VII. Fa'atua-tua Duada Hia. VIII. Irugi Inötö Wa'asatua. IX. Böröta Nadua Nuwu (Adu salahi zatua). X. Mofanö Dödö Hia. XI. Fa'atohare Lakhömi.

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö