II. Böröta Danö
edit1
Hadia mböröta danö si sagörö,
hadia mböröta danö sebolo?
Ndra'i mbu ba dangi-dangi,
ndra'i mbu ba gangango
khö Ninada Nazariata Langi,
khö Ninada Nazariata Luo.
Me isukhu mbu dangi-dangi,
me isukhu mbu ba gangango,
ibe ba mbulu fali'era,
ibe ba mbulu falimo,
itulo ya samba laharö,
itulo ya samba neho.
Itema ikaoni Mazai sobawa farökha,
Mazai sebua bawa mbago-bago,
ba wamöbözi tanö si sagörö,
ba wamöbözi tanö sebolo:
andrö oi mohili-hili danö,
andrö oi mogui-gui ndraso.
10.
Humede Namada Langi Sagörö,
humede Nama Langi Sebolo:
Hadia tou dane'a danö si sagörö,
hadia dane'a danö sebolo?
Tegölu-gölu hulö nukha
ba tefurui ia hulö zufo;
Itema ono ba mbetu'a,
itema ono ba mbeto:
Nifailo tou nono sia'a we'atumbu,
nifailo nono sia'a we'aso
khö Namada Langi Sagörö,
khö Namada Langi Sebolo,
ya'ia zotöi Nazuwa Danö,
ya'ia zotöi Lamakharao,
tane'a danö si sagörö,
tane'a danö sebolo.
Ambö khönia naha ba golayama,
ambö naha ba zalo'o.
Andrö khönia naha nihonogöi,
andrö naha ba zahono,
20.
ni'angaröfi ia silö tebua-bua,
silö tebua lö tegilo,
sanaya tanö si sagörö,
sanaya tanö sebolo.
Manofu Namada Langi Sagörö,
manofu Namada Langi Sebolo:
Hadia zelötö danö si sagörö,
hadia zelötö danö sebolo?
Ya'ia Duada Sita Simatua,
Tuada Sita Sebolo.
Hadia göi go'ö danö si sagörö,
hadia göi go'ö danö sebolo?
Ya'ia Zaŵa Sogara-gara,
Tuada Saŵa Sesolo,
Me no itunö zi sambua,
me no itunö ba gego,
maoso Mazai sebua bawa warökha,
Mazai sebua bawa mbago-bago,
isukhu mbu ba dangi-dangi,
isukhu mbu ba gangango
30.
khö Ninada Nazariata Langi,
khö Ninada Nazariata Luo.
Itema ihalö ndra'i dangi-dangi,
ihalö ndra'i gangano,
ibe ba mbulu fali'era,
ibe ba mbulu falimo,
itulo ya samba laharö,
itulo ya samba neho,
ba iheta ba mbulu faliera,
ba iheta ba mbulu falimo.
Maoso Mazai sebua bawa warökha,
maoso Mazai sebua bawa mbago-bago,
Itema ibözi danö si sagörö,
ibözi danö sebolo,
manöi ya zai gari gafasi,
manöi ya zai gari muko,
ibözi ya zai mbumbu dandrina,
ibözi ya zai mbumbu wayo,
ibözi ya zai naoma zotöra,
ibözi ya zai naoma muko;
40.
lö ya manösö, lö manöi,
lö ya manöi, lö ebolo.
Iwa'ö Mazai sebua bawa warökha,
Mazai sebua bawa mbago-bago
khö Namada Yaŵa Langi Sagörö,
Amada Langi Sebolo:
Mikaoni Zimaniga Raya,
mikaoni Zimaniga Luo,
da ihofi danö si sagörö,
da ihofi danö sebolo.
Andrö so Zila'uma Zulia,
andrö so Zilamici Damo,
andrö gere fatema bawa Langi,
andrö gere fatema bawa Luo.
Sanofi ia si lö duma-duma,
sanofi si lö famaedo,
ba ilau mbalazi wa'a'ere,
ilau mbalazi wasihuo,
ihofi danö si sagörö,
ihofi danö sebolo.
50.
Lafailo Hao Sa'usö Töla,
Lafailo Hao si no oyo,
ba dete zi zai mbumbu dandrina
ba dete zi zai mbumbu wayo,
Itanö mbuasi oto-oto danö,
ya'ia mbuasi oto-oto zato,
labe moli Sa'usö Töla,
ibe moli ola ndraso;
lahofi ia sagötalakha,
lahofi ia siŵa ngaluo;
Maoso Mazai sebua bawa warökha,
maoso Mazai sebua bawa mbago-bago,
ibözi danö si sagörö,
ibözi danö sebolo;
manöi ia sazumba si'afasi,
manöi ia sazumba si'ewo.
Humede Namada Langi Sagörö,
humede Namada Langi Sebolo
khö Mazai sebua bawa warökha,
khö Mazai sebua bawa mbago-bago:
60.
Ogotönugö hili-hili,
ogotönugö zalo'o,
faosa zohili-hili landröta,
lau zohili-hili dalimbo,
asogö ndraso olayama,
asogö ndraso sebolo,
ba fahohou lala idanö,
ba fohohou lala huno,
töröŵa baeŵa Fusö hösi,
töröŵa Fusö dao,
Maoso Mazai sebua bawa warökha,
maoso Mazai sebua bawa mbago-bago,
ibözi danö si sagörö,
ibözi danö sebolo;
mo'ere göi Zimaniga Raya,
mo'ere Zimaniga Luo.
Lakaoni nangi moroi ba rege-rege,
lakaoni nangi moroi ba mbawö Luo;
itörini Hao Sa'usö,
itörini Hao Soyo,
70.
itörini buasi ototo danö,
itöri buasi ototo zato.
Andrö wa manugala döla,
andrö wa mamezua mboto,
andrö wa fagasa danö si sagörö,
andrö fagasa danö sebolo.
Ifasui tasi manöi,
ifasui tasi modegaolo,
tebolo hulö ndrulu nasi,
tebolo hulö lawuo.
Tasi obu'u hili-hili,
tasi obu'u zanendro,
tasi ahöndrö mbawa danö,
tasi ahöndrö zalo'o,
oi zara mohohou lala idanö,
ba hohou lala huno.
Lö saekhu luo barö mbanua,
lö saekhu luo barö walo,
awali danö si sagörö,
awali danö sebolo.
80.
Tebato koci-koci nangi,
tebato ciu-ciu noho,
tebato mbawa mbözi-bözi,
toröi mbawa mbago-bago.
Tebato gere Lewe-lewe,
tebato zinura Zaho.
Me aekhu luo barö mbanua,
me aekhu luo barö walo,
toröi hede-hede zi so ba dalu,
toröi hede-hede zi so ba mbeto,
ilabu manahono tödö,
ilabu manonogöi boto.
Me mo awai humede ia ba dalu,
me no iröi waego-faego,
irugi inötö zi hönö,
irugi inötö zato,
irugi ni'ötöni Nadu,
irugi nifakhoi Zaho
khö Ninada Nazariata Langi,
khö Ninada Nazariata Luo.
Nitöngöni
edit- Hikaya andre tou tehalö moroi ba zinura Martin Thomsen ba Grete Thomsen, Die Sage vom Stammvater Hija. Ein Gesang aus Mittelnias, Zeitschrift für Ethnologie, Bd. 104, H. 2 (1979), nga'örö 209-277.
- Lala wanura no molo'ö dialek Nias Tengah, ba lö nifawu'a ya'ia ba da'e tou
- No mufagölösi ila-ila zura/ejaan (j tobali y, ch tobali kh ba tj tobali c)
- Bakha ba teks, itaria lafasahe ba itaria göi lafabali wehede faoma tandra famabali (-). No u'atulö'ö ia fefu tobali simane fanura ba Li Indonesia faoma tandra wamabali.
Angolifa nösi
editI. Böröta Niha Tou ba Danö. II. Böröta Danö. III. Fa'atumbu Duada Hia. IV. Lafailo Tou ba Danö. V. Tanömö zi Siŵa Motöi. VI. Fo'okhöta Duada Hia. VII. Fa'atua-tua Duada Hia. VIII. Irugi Inötö Wa'asatua. IX. Böröta Nadua Nuwu (Adu salahi zatua). X. Mofanö Dödö Hia. XI. Fa'atohare Lakhömi.