ⵉⵇⵇⵙ ⵢⵉⵖⵉⵔⴷⵎ, ⵉⴳⴰ ⵢⴰⵏ ⵓⴷⵍⵉⵙ ⴰⵅⴰⵜⴰⵔ, ⵉⴳ ⵓⵏⴳⴰⵍ, ⵓⵔ ⵏⵥⴹⴰⵕ ⴰⴷ ⴼⵍⵍⴰⵙ ⵏⵙⴰⵡⴰⵍ ⵙ ⵢⴰⵜ ⵜⵖⴰⵔⴰⵙⵜ, ⵉⵅⴰⵚⵚⴰ ⴽⵔⴰⵢⴳⴰⵜ ⵜⴰⵖⴰⵡⵙⴰ ⴰⴷ ⴰⵙ ⵏⴼⴽ ⴰⵜⵉⴳ ⵏⵏⵙ. ⴳ ⵜⵣⵡⵉⵔⵉ ⵔⴰⴷ ⵏⵙⴰⵡⵍ ⵅⴼ ⵓⵣⵡⵍ ⵏⵏⵙ ⴷ ⵓⵎⴰⵔⴰ ⵏⵏⵙ ⴰⴼⴰⴷ ⴰⴷ ⵏⵣⵔⵉ ⵙ ⵜⵖⴰⵡⵙⵉⵡⵉⵏ ⵢⴰⴹⵏⵉⵏ.
ⴰⵣⵡⵍ ⵏ ⵓⴷⵍⵉⵙ
ⴰⴷⵍⵉⵙ ⴰⴷ ⵉⴳⴰ ⴳ ⵜⵥⵕⵉⴳⵉⵏ ⵏ ⵜⵣⵍⵖⴰ ⵏ ⵜⵉⵔⵔⴰ, ⵉⴼⵖ ⴷ ⴰⵙⴳⴳⵯⴰⵙ ⵏ 2021, ⵢⵓⵛⴽ ⴰⴷ ⵓⵣⵡⵍ ⵏ ⵓⴷⵍⵉⵙ ⴰⴷ ⴳ ⵢⴰⵏ ⵡⴰⵡⴰⵍ ⴰⵇⴱⵓⵔ ⵍⵍⵉ ⴷ ⴼⵍⵏ ⵡⵉⵍⵍⵉ ⵣⵔⵉⵏⵉⵏ ⵍⵍⵉ ⵉⵜⵜⵉⵏⵉⵏ “ⵉⵇⵇⵙ ⵢⵉⵖⵉⵔⴷⵎ, ⵢⴰⵡⵉ ⵢⵉⴳⵍⴳⵉⵣ ⵜⵓⵎⵎⵍⴰ”, ⵖⵉⴷ ⴰ ⵖ ⴷ ⵢⵓⵛⴽⴰ ⵓⵣⵡⵍ ⴷ ⵉⵖ ⵜⵖⵔⵉⵜ ⴰⴷⵍⵉⵙ ⴰⴷ ⵔⴰⴷ ⵏⵏ ⵜⴰⴽⵯⵣⵜ ⴰⵣⴷⴰⵢ ⵏⴳⵔ ⵓⵣⵡⵍ ⴷ ⵉⵎⵔⵙⵉ ⵏ ⵓⴷⵍⵉⵙ.
ⴰⵎⴰⵔⴰ ⵏ ⵓⴷⵍⵉⵙ
ⴰⴷⵍⵉⵙ ⴰⴷ ⵢⵓⵔⴰ ⵜ ⵎⴰⵙⵙ ⵀⵉⵛⵀⴰⵎ ⴼⵓⵡⴰⴷ ⴳⴳⵓⵖⵍⵜ, ⵢⵉⵡⵉⵙ ⵏ ⵡⴰⵡⵍⵓⵥ, ⵉⴳⴰ ⵢⴰⵏ ⵓⵎⴰⵔⴰ ⴰⵅⴰⵜⴰⵔ ⴷ ⵓⵙⵍⵎⴰⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⴳⴰⴷⵉⵔ. ⵉⵙⵙⴼⵓⵖ ⴷ ⵢⴰⴷ ⵎⵏⵏⴰⵡ ⵉⴷⵍⵉⵙⵏ ⴳ ⵢⵉⴳⵔ ⵏ ⵜⵓⵍⵍⵉⵙⵜ ⴷ ⵡⵓⵏⴳⴰⵍ ⵙ ⵜⵎⴰⵣⵉⵖⵜ.
ⵉⵡⵔⵉⴽⵏ
ⴳ ⵓⴷⵍⵉⵙ ⴰⴷ, ⵍⵍⴰⵏ ⵛⵉⴳⴰⵏ ⵏ ⵉⵡⵔⵉⴽⵏ ⵎⴰⵛⵛ ⵔⴰⴷ ⵏⵙⴰⵡⵍ ⵅⴼ ⵡⵉⵍⵍⵉ ⵉⵟⵟⴰⴼⵏ ⴰⵜⵉⴳ.
- ⵜⴰⵡⵊⴰ ⵏ ⴱⵉⵃⵎⴰⵏ: ⵄⴰⴱⴷⵔⵃⵎⴰⵏ, ⵍⴰⵍⵍⴰ ⴽⴱⵉⵔⴰ, ⵜⵉⵍⵉⵍⴰ, ⵊⴰⵎⴰⵍ ⴷ ⴽⴰⵎⴰⵍ
- ⵜⴰⵡⵊⴰ ⵏ ⵓⵛⵉⴱⴰⵏ: ⵎⵓⵃⵎⴰⴷ ⴰⵛⵉⴱⴰⵏ ⴷ ⵉⵍⵍⵉⵙ ⵍⴰⵢⵍⴰ
- ⵉⵡⵔⵉⴽⵏ ⵢⴰⴹⵏⵉⵏ: ⵍⴽⵓⵎⵉⵙⵉⵔ ⵙⴰⵎⵉⵔ, ⵉⵏⴱⴹⵉ, ⵉⵎⴰⵙⵜⴰⵏⵏ, ⴰⴽⴰⴱⴰⵕ...
ⵉⴷⵖⴰⵔⵏ
- ⵜⴰⵙⴷⵔⵎⵜ: ⵜⴰⵎⴰⵣⵉⵔⵜ ⵏ ⵜⵡⵊⴰ ⵏ ⴱⵉⵃⵎⴰⵏ, ⵜⵍⵍⴰ ⴳⵔ ⵡⴰⵙⵉⴼ ⴷ ⵓⴷⵔⴰⵔ.
- ⵍⴽⴰⵔⵢⴰⵏ: ⵜⴰⵣⴷⵖⵜ ⵏ ⵜⵡⵊⴰ ⵏ ⴱⵉⵃⵎⴰⵏ ⵍⵍⵉⵖ ⵉⴼⵍ ⵜⴰⵙⴷⵔⵎⵜ.
- ⴰⴳⴰⴷⵉⵔ, ⵃⴰⵢⵢ ⵍⴼⴰⵔⴰⵃ: ⵜⵉⴳⵎⵎⵉ ⵏ ⴱⵉⵃⵎⴰⵏ ⵜⴰⵎⴰⵢⵏⵓⵜ.
- ⵉⴷⵖⴰⵔⵏ ⵢⴰⴹⵏⵉⵏ: ⵜⴰⵔⵓⴷⴰⵏⵜ, ⵜⴰⴷⵔⴰⵡⵜ, ⵜⴰⵙⴷⴰⵡⵉⵜ, ⴰⵙⴰⴷⵓⵙ, ⴰⵙⴳⵏⴰⴼ ⴷ ⴰⵎⵓⴱⵏⵉⵇⵇ.
ⵙⴳⵣⵍ ⵏ ⵓⴷⵍⵉⵙ
ⵉⵙⵙⵏⵜⵉ ⵓⵎⴰⵔⴰ ⴰⴷⵍⵉⵙ ⵏⵏⵙ ⵙ ⵢⴰⵏ ⵡⴰⵡⴰⵍ ⴰⵇⴱⵓⵔ “ⵉⵇⵇⵙ ⵢⵉⵖⵉⵔⴷⵎ, ⵢⴰⵡⵉ ⵢⵉⴳⵍⴳⵉⵣ ⵜⵓⵎⵍⴰ”, ⵜⵉⵣⵡⵉⵔⵉ ⵏ ⵡⴰⵡⴰⵍ ⴰⴷ ⴰⵇⴱⵓⵔ ⴰ ⵖ ⵉⵙⴽⵔ ⵓⵎⴰⵔⴰ ⴰⵣⵡⵍ ⵏ ⵓⴷⵍⵉⵙ ⵏⵏⵙ, ⵉⵙⵙⴹⴼⵕ ⴰⵙ ⴷ ⵢⴰⵜ ⵜⴰⵍⵍⴰⵙⵜ ⵍⵍⵉ ⵢⴰⴽⴽⴰⵏ ⵢⴰⵜ ⵜⵎⵔⴰⵔⵓⵜ ⵅⴼ ⵢⴰⵏ ⵓⵙⵇⵙⵉ "ⵎⴰⵅ ⵉⵎⴰⵙⵜⴰⵏⵏ ⴰⵔ ⵍⵙⵙⴰⵏ ⵜⵉⵎⵍⵙⵉⵜ ⵜⴰⵙⴳⴳⴰⵏⵜ?".
ⵉⵙⵙⵏⵜⵉ ⵓⵏⴳⴰⵍ ⴰⴷ ⴰⵔ ⵉⵙⴽⴰⵔ ⴰⴳⵍⴰⵎ ⵉ ⵢⴰⵜ ⵜⵡⵊⴰ ⵎⵥⵥⵉⵏ ⵖ ⵢⴰⵜ ⵜⵎⴰⵣⵉⵔⵜ ⵎⵥⵥⵉⵏ ⵍⵍⵉⵖ ⵉⴼⴽⴰ ⵕⴱⴱⵉ ⵍⵅⵉⵔ ⴷⴷⵔⵏ ⵎⵉⴷⴷⵏ ⵏⵏⵙ ⵖ ⵜⵓⵎⵔⵜ, ⵜⴰⵎⴰⵣⵉⵔⵜ ⴰⴷ ⵍⵍⵉ ⵉⴳⴰⵏ ⵙ ⵢⵉⵙⵎ ⵜⴰⵙⴷⵔⵎⵜ ⵍⵍⵉ ⵉⵍⵍⴰⵏ ⴳⵔ ⵡⴰⵙⵉⴼ ⴷ ⵓⴷⵔⴰⵔ. ⵢⴰⵏ ⵡⴰⵙⵙ ⵔⴰⴷ ⵏⵏ ⵉⵎⵓⵏ ⵓⵎⵖⴰⵔ ⵏ ⵜⵇⴱⵉⵍⵜ ⴰⴷ ⴷ ⵢⴰⵏ ⵓⴽⴰⴱⴰⵕ ⵍⵍⵉ ⵉⵔⴰⵏ ⴰⴷ ⵙⴽⵓⵏ ⵢⴰⵏ ⵡⵓⴳⴳⵓⴳ ⵎⵇⵇⵓⵔⵏ ⵖ ⵓⴷⵖⴰⵔ ⴰⵏⵏ ⵎⴰ ⵙ ⴰⵔ ⵙⵙⵡⴰⵏ ⵉⴳⵔⴰⵏ ⵏⵏⵙⵏ, ⴽⴽⵙⵏ ⵜⵓⵎⵔⵜ ⵉ ⴰⵢⵜ ⵜⵇⴱⵉⵍⵜ, ⵅⵍⴰⵏ ⴰⵙ ⵏ ⵜⵉⴳⵯⵎⵎⴰ ⵏⵏⵙⵏ, ⵏⵖⵏ ⴰⵙⵏ ⵉⵎⵓⴷⴰⵔ ⵏⵏⵙⵏ, ⴽⴽⵙⵏ ⴰⵙⵏ ⴰⵢⴷⴰ ⵏⵏⵙⵏ ⵙ ⴱⵣⵣⵉⵣ. ⴷⴷⴰⵏ ⴰⵢⵜ ⵜⵇⴱⵉⵍⵜ ⴰⵔ ⵜⵜⵛⵓⴱⴱⵓⵏ ⴰⵣⵔⴼ ⵏⵏⵙⵏ ⵎⴰⵛⵛ ⴰⵎⵢⴰ ⵓⵔ ⵉⵍⵍⵉ, ⵙ ⵜⵉⴷⵜ ⵖⵉⴷ ⴰ ⵖ ⵔⴰⴷ ⵉⵙⵙⵏⵜⵉ ⵡⴰⵟⵟⴰⵏ ⵉ ⵜⵡⵊⴰ ⵏ ⴱⵉⵃⵎⴰⵏ. ⴱⵉⵃⵎⴰⵏ ⵔⴰⴷ ⵢⴰⵡⵉ ⵜⴰⵡⵊⴰ ⵏⵏⵙ ⵙ ⵓⴳⴰⴷⵉⵔ ⵓⵔ ⵉⵟⵟⴰⴼ ⵉⴷⵔⵉⵎⵏ ⵍⵍⵉ ⵔⴰⴷ ⵜ ⴰⵊⵊⵏ ⴰⴷ ⵉⵣⴷⵖ ⵖ ⴽⵔⴰ ⵏ ⵜⴰⴷⴷⴰⵔⵜ, ⵔⴰⴷ ⵉⵙⴽⵔ ⵍⴽⴰⵔⵢⴰⵏ, ⵔⴰⴷ ⴳⵉⵙ ⵉⵙⵖ ⵢⴰⵜ ⵜⵃⵛⵓⵛⵜ ⵉⵣⴷⵖ ⴳⵉⵣ ⵏⵜⵜⴰ ⴷ ⵜⵡⵊⴰ ⵏⵏⵙ. ⴱⵉⵃⵎⴰⵏ ⵔⴰⴷ ⵉⵎⵎⴰⵖ ⴰⴷ ⵉⵙⵙⵓⴼⵖ ⵜⴰⵡⵊⴰ ⵏⵏⵙ ⴳ ⵥⵥⵍⴹ ⵍⵍⵉⵖ ⵍⵍⴰⵏ, ⵔⴰⴷ ⵉⵙⵓⵡⵎⵡⵔⵉ ⵙ ⵓⴼⵓⵙ ⵓⵍⴰ ⴰⴹⴰⵕ, ⴳ ⵢⵉⴹ ⴷ ⵓⵣⴰⵍ, ⴰⴼⴰⴷ ⴰⴷ ⵉⴼⴼⵖ ⵍⴽⴰⵔⵢⴰⵏ, ⵔⴰⴷ ⵢⴰⵡⵉ ⵜⴰⵡⵊⴰ ⵏⵏⵙ ⵙ ⵢⴰⵜ ⵜⴰⴷⴷⴰⵔⵜ ⵍⵍⵉ ⵉⵙⵖⴰ ⴳ ⵍⴼⴰⵔⴰⵃ ⵙⵙⵏⴼⵍⵏ ⵜⵓⴷⵔⵜ ⵏ ⵥⵥⵍⴹ ⴷⴷⵔⵏ ⵣⵓⵏ ⴷ ⵏⵜⵜⵏⵉ ⵣⵓⵏ ⴷ ⵎⴷⴷⵏ. ⵜⴰⴷⵔⴰⵡⵜ ⵍⵍⵉⵖ ⴰⵔ ⵉⵙⵡⵓⵔⵉ ⴱⵉⵃⵎⴰⵏ ⵜⴳⴰ ⵜⵉⵏ ⵎⵓⵃⵎⵎⴰⴷ ⴰⵛⵉⴱⴰⵏ ⴰⵔ ⵜⵙⴽⴰⵔ ⵔⵔⵅⴰⵎ ⴷ ⵊⵊⵍⵍⵉⵊ, ⴱⵉⵃⵎⴰⵏ ⵉⴳⴰ ⵢⴰⵏ ⵓⴼⴳⴰⵏ ⵉⴳⴰⵏ ⴰⵎⵖⵏⴰⵙ, ⵔⴰⴷ ⵉⵙⴽⵔ ⵢⴰⵜ ⵜⵏⵎⴰⵍⵓⵜ ⵍⵍⵉ ⵉⵙⴰⵡⴰⵍⵏ ⵅⴼ ⵉⵣⵔⴼⴰⵏ ⵏ ⵡⵉⵍⵍⵉ ⵙⵓⵡⵔⵉⵏⵉⵏ ⴳ ⵜⴷⵔⴰⵡⵜ ⵏ ⵓⵛⵉⴱⴰⵏ.
ⵍⴰⵍⵍⴰ ⴽⴱⵉⵔⴰ ⵓⵔ ⴰⵙ ⵉⵙⵅⵚⵚⴰ ⴱⵉⵃⵎⴰⵏ ⵢⴰⵜ, ⵏⵜⵜⴰⵜ ⵜⴹⵓⴼ ⵜⴰⵡⵓⵔⵉ ⵏ ⵜⴰⴷⴷⴰⵔⵜ ⴷ ⵜⴰⵔⵡⴰ ⵏⵏⵙ ⴰⵔ ⴰⵇⵇⵔⴰⵏ ⴳ ⵓⵙⵉⵏⴰⵏ.
ⵢⴰⵏ ⵡⴰⵙⵙ ⴳ ⵜⴷⵔⴰⵡⵜ ⵎⵓⵏⵏ ⴷ ⵉⵎⵙⵡⵓⵔⵉⵏ ⴰⴷ ⵙⴰⵡⵍⵏ ⴷ ⴱⴰⴱ ⵏ ⵜⴷⵔⴰⵡⵜ ⵅⴼ ⵉⵣⵔⴼⴰⵏ ⵏⵏⵙⵏ, ⵇⵇⵏⵏ ⴰⵙ ⴰⵖⴰⵔⴰⵙ ⵏⵜⵜⴰ ⵉⵔⴰ ⴰⴷ ⵉⴼⴼⵖ ⵓⵔ ⵜ ⵓⵊⵊⵉⵏ, ⵎⴰⵛⵛ ⵏⵜⵜⴰ ⵉⵔⴰ ⴰⴷ ⵉⴼⴼⴰⵖ ⵙ ⴱⵣⵣⵉⵣ, ⵉⵣⵣⵉⴳⵣ ⵢⵓⵜ ⴱⵉⵃⵎⴰⵏ ⵉⴹⵕ ⵏⵏ ⵙ ⴹⴰⵕⴰⵜ, ⵢⵓⵜ ⵓⴳⴰⵢⵢⵓ ⵏⵏⵙ ⵔⵔⵅⴰⵎ, ⵓⵔ ⴷ ⵙⵓⵍ ⵉⵏⴽⵔ, ⴰⵡⵉⵏ ⵜ ⵙ ⵓⵙⴰⴷⵓⵙ ⵏ ⵉⴱⵏ ⵙⵉⵏⴰ, ⴰⴷ ⵓⵔ ⵙⵙⵉⴳⵓⵜⵖ ⴰⵡⴰⵍ, ⴱⵉⵃⵎⴰⵏ ⵢⴰⴼⵓⴹ, ⵙ ⵜⵉⴷⵜ, ⵜⴰⵡⵊⴰ ⵏⵏⵙ ⵔⴰⴷ ⵜⴳ ⵜⵉⴳⵉⴳⵉⵍⵜ.
ⵜⴰⵡⵊⴰ ⵏⴱⵉⵀⵎⴰⵏ ⵉⵖⴰⵎⴰ ⴳⵉⵙⵏ ⴱⴰⴱⴰⵜⵙⵏ ⵔⴰⴷ ⵉⵔⵉⵏ ⴰⵣⵔⴼ ⵏⵏⵙⵏ, ⵔⴰⴷ ⵙⴽⵔⵏ ⴰⵎⴰⵙⵜⴰⵏ ⴰⴷ ⵉⵙⵡⵓⵔⵉ ⵅⴼ ⵓⵙⴷⴰⵡ ⵏ ⴱⴰⴱⴰⵜⵙⵏ, ⵎⴰⵛⵛ ⴰⵎⵢⴰ ⵓⵔ ⵉⵍⵍⵉ, ⵃⵜⵜⴰ ⵍⴽⴰⵎⵉⵔⴰⵜ ⵍⵍⵉ ⵉⴳⴰⵏ ⴰⴼⵙⵙⴰⵢ ⵏⵏⵙ ⵓⵔ ⵣⴷⵉⵏⵜ ⴷ ⵜⵔⵉⵙⵉⵏⵜⵉ. ⵎⴹⵍⵏ ⴱⴰⴱⴰⵜⵙⵏ ⵎⴹⵍⵏ ⴷⵉⵙ ⴰⵙⴷⴰⵡ ⵏⵏⵙ. ⵍⴰⵍⵍⴰ ⴽⵉⴱⵔⴰ ⵏⵜⵜⴰⵜ ⴰⴷ ⵉⵙⵓⵡⵔⵉⵏ ⵅⴼ ⵜⵓⵡⵊⴰ ⵏⵏⵙ, ⵍⴰⵍⵍⴰ ⴽⴱⵉⵔⴰ ⵜⴽⴽⴰ ⴰⴼⵓⵙ ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⴰⵙ ⵏⵖⴰⵏ ⴰⵙⵎⵓⵏ ⵏⵏⵙ ⵓⵔ ⴰⵙ ⴼⵉⵏ ⴰⵣⵔⴼ ⵏⵏⵙ.
ⵜⵉⵍⵉⵍⴰ ⵜⴼⴼⴰⵖ ⵜⵉⵖⵔⵉ ⵏⵏⵙ ⵜⵙⴰⵍⴰ ⵜⴰⵡⵓⵔⵉ ⵏ ⵜⴳⵎⵎⵉ, ⵊⴰⵎⴰⵍ ⴷ ⴽⴰⵎⴰⵍ ⵙⴽⵔⵏ ⵜⴰⵙⴷⴰⵡⵉⵜ ⵏ ⵓⴳⴰⴷⵉⵔ ⵎⴰⵛⵛ ⴱⴹⴰⵏ ⴽⵓ ⵢⴰⵏ ⴷ ⵎⴰⴷ ⵉⵙⴽⵔ ⴽⴰⵎⴰⵍ ⴰⵔ ⵢⴰⵇⵇⵔⴰ ⵅⴼ ⵓⵙⵍⴳⴰⵎ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⵊⴰⵎⴰⵍ ⴰⵔ ⵢⴰⵇⵇⵔⴰ ⵅⴼ ⵜⴷⵎⵙⴰ. ⵎⵓⵃⵎⵎⴰⴷ ⴰⵛⵉⴱⴰⵏ ⵓⵍⴰ ⵏⵜⵜⴰ ⵉⵍⵍⵉⵙ ⵍⴰⵢⵍⴰ ⴰⵔ ⵜⴰⵇⵇⵔⴰ ⵅⴼ ⵜⴷⵎⵙⴰ.
ⴰⵙⵙ ⴰⵎⵣⵡⴰⵔⵓ ⴳ ⵜⵙⴷⴰⵡⵉⵜ, ⵉⵎⵎⴰⴳⴰⵔ ⵊⴰⵎⴰⵍ ⴷ ⵍⴰⵢⵍⴰ, ⵏⵜⵜⴰ ⵉⵙⵙⵏ ⵎⴰⴷ ⵜⴳⴰ, ⵍⵍⵉⵖ ⵔⴰⴷ ⴼⴼⴰⵖⵏ ⴳ ⵜⴷⴰⵍⴰ ⵉⵎⵎⴰⴳⴰⵔ ⵊⴰⵎⴰⵍ ⴷ ⵍⴰⵢⵍⴰ ⴹⵕⵏ ⴰⵙ ⵏ ⵉⴷⵍⵍⵉⵙⵏ, ⵣⵓ ⴷ ⴰⵢⵍⵍⵉ ⵉⵜⵜⵊⵔⵓⵏ ⴳ ⵍⴰⴼⵍⴰⵎ ⵏ ⵜⴰⵢⵔⵉ, ⵜⴰⵢⵔⵉ ⴳ ⵓⵙⵎⵎⴰⵇⵍ ⵉⵣⵡⴰⵔⵏ. ⵣⵔⵉⵏ ⵓⵙⵙⴰⵏ ⵊⴰⵎⴰⵍ ⴷ ⵍⴰⵢⵍⴰ ⵜⵍⵍⴰ ⴳⵔⴰⵜⵙⵏ ⵢⴰⵜ ⵜⴰⵢⵔⵉ ⵉⴷⵓⵙⵏ, ⵍⴰⵢⵍⴰ ⵉⴼⵍ ⴰⵙ ⴱⴰⴱⴰⵙ ⵜⴰⴷⵔⴰⵡⵜ ⴰⴷ ⴼⵍⵍⴰⵙ ⵜⵉⵍⵉ, ⵜⴰⵡⵉ ⵏⵏ ⵊⴰⵎⴰⵍ ⴰⴷ ⴷⴰⵔⵙ ⵉⵙⵡⵓⵔⵉ. ⴳ ⵜⵙⴳⴰ ⵏ ⵡⴰⵟⵟⴰⵏ ⴷ ⵜⴳⵓⴹⵉ, ⵍⴰⵍⵍⴰ ⴽⵉⴱⵔⴰ ⵜⴻⵟⵟⴰⴹⵏ ⵓⵍ ⵏⵏⵙ, ⴰⵡⵉⵏ ⵜⵜ ⵙ ⵓⵙⴰⴷⵓⵙ, ⵉⵅⵚⵚⴰ ⴰⴷ ⵜⵙⴽⵔ ⴰⴼⵍⴰⵢ ⵉ ⵡⵓⵍ ⵏⵏⵙ.
ⵔⴰⴷ ⵏⵡⵓⵔⵔⵉ ⴷⴰⵔ ⵜⴰⵢⵔⵉ ⴷ ⵜⵓⵎⵔⵜ ⴷⴰⵔ ⵊⴰⵎⴰⵍ ⴷ ⵍⴰⵢⵍⴰ, ⵎⴰⵇⵇⴰⵔⵏ ⵙⴽⵔⵏ ⵢⵉⵍ ⴰⵔ ⵣⵣⵉⴳⵣⵏ ⴳ ⵓⵎⵍⴰⵍ ⵏⵏⵙ ⵙ ⵜⴱⴰⵛⵉⵍⵉⵏ ⵏⵏⵙⵏ, ⴰⵔ ⵜⴻⵜⵜⵏⵉ ⵍⴰⵢⵍⴰ ⵙⵉⵏ ⵉⵡⴰⵍⵉⵡⵏ ⵉⵏⵏⴰ ⴷ ⵊⴰⵎⴰⵍ ⵎⵔⴰⵡ, ⵍⵍⵉⵖ ⵕⵎⵉⵏ ⵙⴽⴽⵓⵙⵏ ⴳ ⵓⵎⵍⴰⵍ, ⵍⴰⵢⵍⴰ ⵜⴹⵕⵏ ⴳⵔ ⵉⴷⵎⴰⵔⵏ ⵏ ⵊⴰⵎⴰⵍ ⵜⵏⵏⴰ ⴰⵙ ⵙⴰⵡⵍ ⵉⵢⵉ ⵅⴼ ⵜⵎⴰⵣⵉⵔⵜ ⵏⵏⴽ ⴷ ⵜⴰⵡⵊⴰ ⵏⵏⴽ.
ⴽⴰⵎⴰⵍ ⴳ ⵓⵙⴰⴷⵓⵙ ⵉⵇⵇⴰⴱⵍ ⵎⴰⵙ, ⴳ ⵢⵉⴹ ⵉⴷⴷⴰ ⵙ ⵜⴰⴷⵔⴰⵡⵜ ⵏ ⵓⵛⵉⴱⴰⵏ, ⵉⵃⴱⴰ ⵓⴷⵎ ⵏⵏⵙ ⵉⴽⵛⵎ ⵙ ⵜⴷⵔⴰⵡⵜ, ⵉⵡⴰⵜⵙ ⴰⴼⵏⵉⵇ ⵍⵍⵉⵖ ⵍⵍⴰⵏ ⵉⴷⵔⵉⵎⵏ, ⵢⴰⵙⵉ ⵜⵏ, ⵍⵍⵉⵖ ⵔⴰⴷ ⵉⴼⴼⵖ ⵉⵙⵙⴰⴳⴷ ⵓⴷⵎ ⵏⵏⵙ ⵉ ⵍⴽⴰⵎⵉⵔⴰⵜ ⵉⴼⴼⵖ. ⵍⵍⵉⵖ ⴷ ⵉⵡⵉⵏ ⵍⴰⵅⴱⴰⵔ ⵎⴰⵙ ⵜⴻⵜⵜⵢⴰⴽⴰⵔ ⵜⴷⵔⴰⵡⵜ ⴱⴷⴷⵏ ⴷ ⵍⴱⵓⵍⵉⵙ ⵎⴰⵛⵛ ⵍⴰⵍ ⵏ ⵜⴷⵔⴰⵡⵜ ⵓⵔ ⵜⵃⴰⴹⵕ, ⵜⵍⵍⴰ ⴷ ⵉⵎⵉⵔⵉ ⵏⵏⵙ ⴰⵔ ⵙⵔⵙ ⵙⵉⴳⴳⵉⵍⵏ, ⵢⵉⵍⵉⵃ ⵜⵜ, ⵖⵔⴰⵏⴰⵙ ⵖ ⵓⵜⵉⵍⵉⴼⵓⵏ ⵏⵏⵙ, ⵢⵉⵍⵉⵃ ⵜⵜ. ⵍⵍⵉⵖ ⴷ ⵜⵉⵡⵉ ⵍⴰⵅⴱⴰⵔ ⵜⴷⴷⵓ ⵙ ⵜⴷⵔⴰⵡⵜ ⵜⴰⴼ ⵏⵏ ⵍⴱⵓⵍⵉⵙ ⴷ ⴱⴰⴱⴰⵙ ⵜⵔⵡⵉ ⴷⴷⵓⵏⵉⵜ. ⵍⵍⵉⵖ ⵏⵏ ⵜⵓⴳⴳⴰ ⵍⴽⴰⵎⵉⵔⴰ ⵜⵥⵕ ⴰⴼⵉⴷⵢⵓ, ⵉⵏⵏⴰ ⵡⵓⵍ ⵏⵏⵙ ⴷⴷⴰⴼ, ⵜⵓⴼⴰⵏ ⵎⴰ ⵙ ⴷ ⵊⴰⵎⴰⵍ ⵍⵍⵉ ⴷ ⵜⴳⴰⵡⵔ ⴰⴷ ⵢⵓⴽⵔⵏ ⵜⴰⴷⵔⴰⵡⵜ. ⵊⴰⵎⴰⵍ ⵓⵎⵣ ⵏⵜ ⵍⴱⵓⵍⵉⵙ ⴰⵡⵉⵏ ⵜ ⵙ ⵓⴱⵏⵉⵇ, ⵡⴰⵅⵅⴰ ⵓⵔ ⵉⵙⴽⵔ ⵙ ⵓⴹⴰⵕ ⵓⵍⴰ ⴰⴼⵓⵙ.
ⵍⵍⵉⵖ ⵜ ⵉⵡⵉⵏ ⴷⴰⵔ ⵢⵉⵏⴱⴹⵉ ⴰⴼⴰⴷ ⴰⴷ ⵉⵥⵕ ⴰⵙⴷⴰⵡ ⵏⵏⵙ. ⵢⵓⵛⴽⴰ ⵏⵏ ⴳⵯⵎⴰⵙ ⴽⴰⵎⴰⵍ ⴰⴼⴰⴷ ⴰⴷ ⵉⴳ ⴰⵎⴰⵙⵜⴰⵏ ⵏⵏⵙ ⵉⵏⴱⴹⵉ ⵊⵍⴰⵏⵜ ⴰⵙ, ⵓⵔ ⴰⴷ ⵜⴰⴽⵯⵣⵜ ⵏⴳⵔ ⵊⴰⵎⴰⵍ ⴷ ⴽⴰⵎⴰⵍ ⴰⵎⵔ ⵙ ⵜⵎⵍⵙⴰ, ⵢⴰⵏ ⵉⵍⵙⴰ ⵜⵉⵏ ⵓⴱⵏⵉⵇ, ⵢⴰⵏ ⵜⵉⵏ ⵓⵎⴰⵙⵜⴰⵏ. ⴽⴰⵎⴰⵍ ⴰⴷ ⵢⵓⴽⵔⵏ ⵜⴰⴷⵔⴰⵡⵜ ⵎⴰⵛⵛ ⵎⴰⵅ? ⵜⴰⵎⵣⵡⴰⵔⵓⵜ ⵎⴰⵙ ⵜⵔⴰ ⵉⴷⵔⵉⵎⵏ ⴰⴼⴰⴷ ⴰⴷ ⵜⴰⵙⴽⵔ ⴰⴼⵍⴰⵢ ⵏ ⵡⵓⵍ ⴷ ⵜⵉⵙⵙ ⵙⵏⴰⵜ ⴰⴷ ⵉⵙⵙⵏ ⵉⵙ ⵅⴷⵎⵏⵜ ⵍⴽⴰⵎⵉⵔⴰⵜ ⵏ ⵜⴷⵔⴰⵡⵜ, ⵊⴰⵎⴰⵍ ⵉⵙⵙⵏ ⵎⴰⵢⴰⴷ, ⵏⵜⵜⴰⵏ ⴰⴷ ⵉⴽⴼⴰⵏ ⵜⴰⵙⴰⵔⵓⵜ ⵏ ⵜⴷⵔⴰⵡⵜ ⵉ ⴳⵯⵎⴰⵙ, ⵎⴰⵛⵛ ⵓⵔ ⴷⵉⵙ ⵉⵙⴽⵔ ⴰⴷ ⵉⵙⵙⴰⴳ ⵓⴷⵎ ⵏⵏⵙ. ⴽⴰⵎⴰⵍ ⵉⵍⴷⵉⴷ ⵢⴰⵏ ⵛⴷ ⵉⵎⵍⵉⵜ ⵉ ⵉⵏⴱⴹⵉ, ⵛⴷ ⴰⴷ ⵉⴳⴰ ⵡⵉⵏ ⵜⴷⵔⴰⵡⵜ ⵍⵍⵉⵖ ⴳⵉⵙ ⵉⵙⵡⵓⵔⵉ ⴱⵉⵃⵎⴰⵏ, ⵍⵍⵉⵖ ⵜ ⵉⵏⵖⴰ ⴱⴰⴱ ⵏ ⵜⴷⵔⴰⵡⵜ ⵎⴰⵛⵛ ⴰⵛⵉⴱⴰⵏ ⵍⵍⴰⵏ ⵉⴷⵔⵉⵎⵏ ⵓⵔ ⵉⴽⵚⵓⴹ ⵢⴰⵜ. ⵍⴰⵢⵍⴰ ⵜⴼⵔⴽ ⵉⵙ ⴷ ⵉⵎⵉⵙⵙ ⴽⴰ ⴰⴷ ⴰⴷⵍⵍⵉ ⵜⴳⴰ ⴰⴼⴰⴷ ⴰⴷ ⴷ ⵉⵔⴰⵔ ⵊⴰⵎⴰⵍ ⴰⵣⵔⴼ ⵏ ⴱⴰⴱⴰⵙ, ⵊⴰⵎⴰⵍ ⵉⵍⵍⴰ ⴳ ⵓⴱⵏⵉⵇ ⵏ ⴰⵢⵜ ⵎⵍⵍⵓⵍ ⵔⴰⴷ ⴳⵉⵣ ⵉⵣⵣⵔⵉ ⵙⵉⵏ ⵉⵙⴳⴳⵯⴰⵙⵏ. ⵊⴰⵎⴰⵍ ⵢⵉⵡⵉ ⵜⵓⵎⵍⴰ ⵏ ⴰⵢⵍⵍⵉ ⵓⵔ ⵉⵙⴽⵉⵔ, ⵊⴰⵎⴰⵍ ⴰⴷ ⵖⵉ ⴷ ⵉⴳⴰⵏ ⵉⴳⵍⴳⵉⵣ ⵢⵉⵡⵉ ⵜⵓⵎⵍⴰ ⵏ ⵢⵉⵖⵉⵔⴷⵎ. ⴰⴷⵍⵉⵙ ⴰⴷ ⵜⴼⵓⵍⴽⵉⵜ ⵜⴳⵓⵔⵉ ⵏ ⵓⵎⴰⵔⴰ ⵏⵏⵙ, ⵉⵙⵙⵎⵔⵙ ⴳⵉⵣ ⵜⵉⴳⵓⵔⵉⵡⵉⵏ ⵛⵇⵇⴰⵏⵜ ⵙⵍⴰⵡⴰⵏ ⴰⴽⴽⵯ ⵜⵉⴳⵓⵔⵉⵡⵉⵏ ⵍⵍⵉ ⵉⵣⴷⵉⵏ ⴷ ⵓⵙⴰⴹⵓⴼ, ⵉⵖ ⴰⵢⵎⵎⴰⵍⴰ ⵎⴰⵢⴰⴷ ⴽⵔⴰ, ⴰⵔ ⵉⵎⵎⴰⵍⴰ ⵜⵉⵣⵉ ⵍⵍⵉ ⵉⴼⴽⴰ ⵓⵎⴰⵔⴰ ⵉ ⵓⴷⵍⵍⵉⵙ ⵏⵏⵙ ⴷ ⵜⵓⴳⴳⴰⵙ ⵏⵏⵙ ⴰⴼⴰⴷ ⴰⴷ ⴰⵖ ⵢⴰⵔⴰ ⵢⴰⵏ ⵓⴷⵍⵍⵉⵙ ⵍⵍⵉ ⵔⴰⴷ ⵢⴰⵍⵍ ⴳ ⵓⵙⵡⵉⵔ ⵏ ⵡⴰⵍⵍⵉ ⵜ ⵢⴰⵇⵇⵔⴰⵏ.
ⵉⴷⵍⵉⵙⵏ ⵢⴰⴹⵏⵉⵏ ⵏ ⵓⵎⴰⵔⴰ
ⴳ ⵜⴰⵎⴰ ⵏ ⵓⴷⵍⵉⵙ ⵉⵇⵇⵙ ⵢⵉⵖⵉⵔⴷⵎ, ⵉⵙⵙⴼⵓⵖ ⴷ ⵓⵎⴰⵔⴰ ⵀⵉⵛⴰⵎ ⴼⵓⵡⴰⴷ ⴳⴳⵓⵖⵍⵜ ⵉⴷⵍⵉⵙⵏ ⵢⴰⴹⵏⵉⵏ:
- ⵜⵓⵍⵍⵉⵙⵉⵏ
- ⴰⵊⴷⴷⴰⵔ ⵢⴰⴹⴼⵓⵜⵏ, ⵜⵉⵥⵕⵉⴳⵉⵏ ⵏ ⵜⵉⵔⵔⴰ, ⵜⴰⵣⵍⵖⴰ ⵏ ⵉⵎⴰⵔⴰⵜⵏ ⵙ ⵜⵎⴰⵣⵉⵖⵜ, 2015.
- ⴰⴼⵔⴰⵏ ⴳ ⵜⵉⵍⵍⴰⵙ, ⵜⵉⵥⵕⵉⴳⵉⵏ ⵏ ⵜⵉⵔⵔⴰ, ⵜⴰⵣⵍⵖⴰ ⵏ ⵉⵎⴰⵔⴰⵜⵏ ⵙ ⵜⵎⴰⵣⵉⵖⵜ, 2018.
- ⵏⵏⴰⵏ ⵡⵉⵍⵍⵉ ⴷ ⵓⵛⴽⴰⵏⵉⵏ, ⵜⵉⵥⵕⵉⴳⵉⵏ ⵏ ⵜⵉⵔⵔⴰ, ⵜⴰⵣⵍⵖⴰ ⵏ ⵉⵎⴰⵔⴰⵜⵏ ⵙ ⵜⵎⴰⵣⵉⵖⵜ, 2019. (ⵜⵓⵍⵍⵉⵙⵜ ⵜⴰⵏⴰⵍⵍⴰⵡⵜ)
- ⵓⵏⴳⴰⵍⵏ
- ⵜⴰⵎⴷⴰⵢⵜ ⴷ ⵓⵙⵏⵚⵉ, ⵜⵉⵥⵕⵉⴳⵉⵏ ⵏ ⵜⵉⵔⵔⴰ, ⵜⴰⵣⵍⵖⴰ ⵏ ⵉⵎⴰⵔⴰⵜⵏ ⵙ ⵜⵎⴰⵣⵉⵖⵜ, 2020.