Die Välgäwandärungsdsaid is a hisdorische Äbochng, di es Middlaldär mid där Andige verbinded. Nomôôlerwais sachd mär, däi Äbochng beginnd im Jôôr 375 mim Hunna-Aifall nach Euroba und ended mim Zuuch fo di Langobadn nach Idôlien im Jôôr 568. Es hôd zwôr vorhär und nôchär aa fiil wandärdne Fälger geem, und nu haid wandärn haufmwais Laid umanand, walls verdriim worn sin oddä bessere Leemsbedingunga souchng, ôbbä im engeren Sinn maand mä mid dämm Begriff di Äboche der groosn gärmanischn Välgäwandärung.
Am Oofang fo derä Äbochng wôr es römische Raich nu foll indagd. Af där Fluchd vor di Hunna sinn dann a gandsa Haufm gämanische und sarmaadische Välger ins Raich aibrochng und hômm nôch und nôch immä meer Gebiide vom Römischn Raich bsedsd. Di bekandesndn dô dafuu wôrn di Goodn, die Frangng, die Wandaaln, die Burgundä, die Anglsaggsn, di Sweebm und di Langobadn. Am Ende hômm si di schdärgsdn gämanischn Völger im Wesddaal vom Raich aignge Kenichraiche erschaffm. Im Osdn hôd si dageegn es Osdrömische Raich reladiv goud äweern kennä und is dann zum Bydsandinischn Raich worn. Aus dä Symbiose zwischä dä römischn Hochkulduur und di Gärmanen hôd si es Grisdliche Ôômdland rausbild.
In Frangng hôm am Oofang fo derär Dsaid vor allem die Burgunder und di Judunga gwoond. Ab uungfär 450 hôm si di Düringär und Alamanna um di Gebiide gschdriddn, bis dann die Frangng zwischär 500 und 530 di massdn Gebiide in Bsids gnumma hômm. Bloos gands im Osdn hômm si ab 550 slawische Grubbm oogsiidld.
Beleeche
edit- Chris Wickham: Framing the Early Middle Ages. Europe and the Mediterranean 400–800. Oxford University Press, Oxford 2005.
- Roland Steinacher: Rom und die Barbaren. Völker im Alpen- und Donauraum (300-600). Kohlhammer, Stuttgart 2017.