Herschbrugg (deidsch: Hersbruck) is a Schdadd in Middlfrangng. Sie is Deil vo der Medrobolregion Nämberch un nouch Laff an der Bängerds un Alddorf däi driddgrässde Schdadd im Landgrais Nämbercher Land. Nachboaroddschafdn sin (ogfanga im Norrdn im Uhrzeichersinn): Kärrngsiddnbo, Vorra, Bommelsbrunn, Habburch, Engeldool, Hennafeld un Reingschwand. Herschbrugg hodd zirrga 12.500 Eiwohner, achd Oddsdeile un is Zendrum vo der Herschbrugger Schweiz, anner Middlgebirgslandschaft miid anner Häich vo bis zu 600 Meder.
Im Middlalder is Herschbrugg an der Goldna Strass vo Nämberch af Brach gleng, wos zu an wärdschafdlichn Afschwung gfiehrd hodd. Miidn Bau vo der Eisabohschdreggn Nämberch-Herschbrugg-Schwandorf is Herschbrugg ans weldweide Eisabohnedz ogschlossn worrn un hodd a an groußn wärdschafdlichn Afschung derlebbd. Nu heid is es Schdaddbild brächd vo malerische Gässla un Fachwerrghaisla.
In der Zeid vom Nadionolsozialismus hodd si vo 1944 bis 1945 des Außenloocher Herschbrugg vom Konzentrationsloocher Flossenbürch befundn. Im Herschbrugger KZ sin vo die zirrga 10.00 Häfdling zirrga 4.000 ums Leem kumma.
Herschbrugg woar bis 30. Juni 1972 Landgraissidz vom Landgrais Herschbrugg un beherberchd deshalb nu heid Amdsgrichd, Finanzamd, Forsdamd un Vermessungsamd.
Im Nedz
edit