Rihkumohtu (Latini: Tillandsia usneoides; Ingrasa: Spanish moss; Pilanchi: barbe espagnol)
Rihkumohtu rihkuyahoni hayihta sowirakuku. Rihku ushtahtanahku poku. Rihkumohtu ɔshka haluhta ohtin’ɛhɛshkan, ɔshka hayishi ɔshtarɔwa hiyuhuninahkusha. Ɔshka hayishi schumacha, ehpu, yuru panu. Uhktɛrashki yuru, wuli. Uhktɛnakɔla tohku. Ɔshta kapashkɔlanahku ahak’ihch ɔshtakayi hiyuhuninahkusha uhkkosu. Uhktosu rihkuyahoni nisash nahchuman narahurawishtuku.
Tayoroniku rihkumohtuhta mohtoli mahkuku. Rihkumohtu ya uhktahkishihta ahak’ihch tirahta pohkuku. Tahumaku rihkumohtu sihuhkuta. Hinyatihch, rihkumohtuhta yunka mashuwan chɔrahkuta. Hinyatihch, yunkahta ukitapohku mashuku. Oni uhkwanatihch, Tahumaku rihkumohtuhta wishiyimohku mashuku. Rihkumohtu wɛra uhkyahoni hayihta rakuku chukuman, wishiyimohku mashu uhkyuwaku.