Wp/sjd/Афанасьева, Е̄льцэ Нӣна

Е̄льцэ Нӣна Афанасьева (рӯшас Нина Елисеевна Афанасьева) (*1.2.1939) — са̄мь уһцэй я кырьйхэй Мурман ланӭсьт. Кырьеһт Ла̄зэр ка̄ллса моаййнас кырьй (2008 ыгесьт) я нымьп кырьй.

Биографья я со̄н мушт

Е̄льцэ Нӣна лӣ 1939 ыгесьт Арсъёгк сыйтэсьт шэ̄ннтма. Со̄нн лӣ шӯрр са̄мь пӣррсэсьт ке̄ссь е̄ллем сыйтэсьт шэ̄ннтма. Со̄нн лӣ кыджянт па̄рна Е̄льцэ я Па̄рэск удцьмусса нӣйта. Куссь со̄нн шэнтэ, аджя ля̄йй ё выдтлоагкь ыгке тӣввтма. Со̄н пуаррса вуэррьпэнҍ На̄ст шӣгктэнее мушшт Нӣна шэ̄ннтэм пе̄йв. Тэдта ля̄йй чоаһпесь кэ̄ллм мӯнь ма̄н пе̄ййв. На̄цьне мэ̄нэ лышэ кыджянт ыга. Куэссь а̄кь шэ̄ннтътэв парнэ, пугк па̄ррнэтҍ выгэтҍ олкэс. Тэнн гуэйкэ На̄ця мушшт чоаһпесь па̄ль. Со̄нн чуэнче кэ̄ллм сыӊцэсьт я вӯрьт парна ря̄гкмуж, оалв. На̄ця чуть пэ̄лэ э̄хтта сыӊцэсьт чуэннчмэнҍ. Тэль со̄нн куӆсэсьтэ парна ря̄гэнҍт. Ныдтҍ мунн пӯдтӭ э̄ллманнта.

Е̄льцэ Нӣна мушштсэлл ӣджесь ро̄д я ро̄дт о̄ллма

Куэссь мыннӭ ля̄йй ко̄ллм ыгке тӣввтма, мун аджя ёаме. Мунн чуть шӣгктэнне мушта тэ̄нн пе̄йв. Я̄нна ля̄йй ле̄фэсьт лыгкэсьт. Мыйй пуаррса вуэрьпнэнан На̄цян лӣйемь пэҏтэсьт, оарэм пе̄ц альн. Мӣн аджя ля̄йй шальтэсьт. Мыйй чуть поҏсувэм. На̄ця пэ̄лэ вэлас пе̄цэсьт шаллта нӣйе, штобэ воалльтэ туэль альн ле̄ййп куска. Со̄н лӯшьтэ мун пе̄цэсьт вэлас. Мунн э̄ллтнэ аджьсан, мунн эмм пэ̄ллма со̄нэсьт. Аджясан чальм лӣйенҍ а̄в, чӣльмэ альн лӣйенҍ копейка пыййма. Мунн сӣнэтҍ лыгксэһтӭ.

Ныдтҍ шэ мушта ажян рӯһкэм пе̄йв. Пугк ро̄дт о̄ллма мэ̄ннэнҍ кальм э̄л. Мыйй лӣемь пэҏтэсьт куаһтэсь е̄гк оаһкэнан. Со̄нн поашьтэ ша̄ӈкэтҍ рӯһкэм туалла. Мунн чӯннче э̄һкан лузьн я киһче че̄д э̄һкан, ко̄з мэ̄ннэнҍ пугк мӣн о̄ллма. Мунн ря̄гнэлле рӣгкэ, о̄ллвэ. Е̄гкь оаһка нагкя тмыннӭ ша̄ӈкь, покэ мунн по̄ра ша̄ӈк, ня̄я̄лльм лӣ коатмэнч. Тэдта ля̄йй лоагант пе̄йвэсьт ке̄ссь ма̄нэсьт, оаллкэнҍ мэ̄нэ коам аббрь. Мун едтҍ воаллтма мӣлльтэ кальм э̄л, тэ̄нн гуэйкэ мунн сутнэ я о̄ллвэ, та̄һтэ сӣнэгуэйм ажян рӯһкэ. Нэ, ныдтҍ мэ̄нэ тэдта пе̄ййв. Е̄намп мунн эмм мушьт.

Мун пуаррса вӣлльй: Ка̄ле - рӯшас Галактион, Мыцишьк - рӯшас Вячеслав (25.12.1925 - 28.05.1980), Возар/Вольсанндэр - рӯшас Александр, Мыдтре - рӯшас Дмитрий (07.11.1932 - 27.05.1992)

Мун пуаррсса вуэррьпэнҍ: Выкице - рӯшас Виктория (январь 1934 - май 1934), На̄ст - рӯшас Анастасия (03.10.1935)

Мун ро̄дт о̄ллма: аджя - Вуадтэр Ельцэ - рӯшас Елисей Фёдорович (1889 - 10.06. 1943), Мыгклэ Па̄рэск - рӯшас Парасковья Николаевна (28.10.1904 - 28.06.1980) Павлов тэдта лӣ сӣн фамилья; оаһка - Вуэле Ве̄дэр - рӯшас Федора Алексеевна, а̄йя - Мэһкал Вуадтэр - рӯшас Фёдор Михайлович тэдта лӣ ажян пе̄льт ро̄дт.

Я̄нан е̄ннҍ - Вуач - рӯшас Евдокия, аджь - Увван Мыгклэ - рӯшас Николай Иванолвич сыйй ле̄в мун оаһка я а̄йй. Моадтэр оаһкэ я а̄й: Пе̄дар Мэһкал - рӯшас Михаил Петрович.

О̄һпнуввмушш

Тӯй

Е̄льцэ Нӣна лыгк выгкъенҍ са̄мас са̄ррнмуж документацья я радива мӣлльтэ. Со̄нн лӣ кырьйха (нымьп кырьйхэйя сайя вай ӣджь) логкэм-, о̄һпнуввэм- я са̄ннҍкырьй.

Кырьй

1985
- Афанасьева, Н. Е.; Р. Д. Куруч; Е. М. Мечкина; А. А. Антонова; Л. Д. Яковлев; Б. А. Глухов. Са̄мь-рӯшш соагкнэһкь. Москва, 1985.
2008
- Л. Д. Яковлев; Н. Е. Афанасьева; М. Рисслер. Ла̄зэр ка̄ллса моаййнас: кырьйха лӣ Е̄льцэ Нӣна. Берлин, 2008.
2010
- Афанасьева, Н. Е.; Са̄мь-рӯшш соарнънэгк. Мурман ланнҍ, 2010.