Янко Виславски (*16. юлия 1919—†23. авґуста 1978), финансийни службенїк, новинар-прекладач, финансийни инспектор.
| Янко Виславски | |
|---|---|
 | |
| Народзени | 16. юлия 1919. |
| Умар | 23. авґуста 1978. (59) |
| Державянство | югославянске |
| Язик творох | руски |
| Школа | ґимназия у Заґребе |
| Период твореня | 1937—1975. |
| Жанри | финансийне кнїжководительство, новинарство, аматерска ґлума |
| Поховани | у Новим Садзе |
| Припознаня | Златна плакета АРТ "Дядя" за 35 роки аматерскей театралней дїялносци |
Биоґрафия
Янко Виславски ше народзел у Руским Керестуре 16. юлия 1919. року у селянскей фамилиї. Оцец Данил и мац Ирина родз. Шимко. Янко мал двох братох, Данила и Дюру. По законченю основней школи у своїм валалє уписал ше до класичней ґимназиї у Заґребе, дзе и матуровал. После матурованя уписал ше на студиї права, алє кед почала Друга шветова война вон претаргнул студиї и врацел ше до Руского Керестура.
Зоз театралну дїялносцу Янко Виславски ше почал занїмац ище як ґимназиялєц 1937. року. Як зазначене у писаних жридлох, першу улогу (Синов пайташ) одбавел у театралним фалаце Мац Романа Сурмача, даваним 15. авґуста 1937. року на Дзень Просвити у Руским Керестуре. Вон теди бул дома на школских ферийох. У 1938. року, тиж под час школских ферийох, наступа у фалаце Ивана Франка Учитель у улоги Жида. До Руского Керестура сцигла векша ґрупа вибеженцох зоз Карпатскей України кед ю окупировали Мадяре. Медзи нїма були и члени театра зоз Хусту. Янко Виславски ше 1939. року, под час ферийох, уключел до роботи драмскей ґрупи режисера и ґлумца по професиї Юрия Авґустина Шереґия, основаней у Руским Керестуре. Достал улогу Андрия у театралним фалаце Суходольского Хмара.
По Шереґийовим одходу з Руского Керестура Виславски предлужел ґлумиц под режисерску руку учителя Михайла Ковача (1940–1941), а кед и Ковач бул примушени пре окупацию Бачкей виселїц ше до Шиду (котри ше нашол у гранїцох тедишнєй Нєзависней Держави Горватскей), Янко Виславски участвовал у представох котри у рамикох Орґанизациї грекокатолицкей младежи пририхтовали Ириней Тимко и Петро Ризнич (1942–1943).
Нєодлуга, на початку 1944. року, Янко Виславски бул реґрутовани и послати до Ерделю у Мадярскей. У другей половки 1944. року ше му удало, з двома пайташами, сцекнуц з мадярского войска и придац ше румунским партизаном. По законченю войни врацел ше до Руского Керестура. Понеже после войни нє предлужел студиї, вон почал робиц як службенїк перше у керестурским млїну, а познєйше бул унапредзени и премесцени до Кули, до Срезкей дирекциї млїнских орґанизацийох.
Янко Виславски ше винчал зоз Марию Сабадош (Лисого). У малженстве мали двох синох, Боґдана и Владимира.
У 1950. року, на вимогу тедишнього главного и одвичательного редактора Руского слова, Янко Виславски премесцени до редакциї тих новинох на длужносц новинара–прекладача. Попри роботи на пририхтованю новинох, вон преложел кнїжку М. В. Ґоґоля Тарас Бульба и ище дзепоєдни. Врацанє на роботу до Руского Керестура оможлївело му же би ше знова уключел до театралней дїялносци, цо, медзи иншим, и бул циль тих цо потримали редактора же би го глєдал од одвичательних факторох.
У 1954. року Янко Виславски преходзи на службу до Нового Саду по власним жаданю як кнїжководитель у Ремеселнїцкей столарскей задруґи, а 1959. року преходзи на службу до Нафтаґасу, дзе о єден час постал интерни финансийни инспектор. Часто бул обовязни путовац по филиялох тей велькей фирми, та то була причина же ше 1973. року престал занїмац зоз драмску дїялносцу як ґлумец-аматер, алє у самоуправних орґанох тедишнього Аматерского руского театра Дядя робел аж по 1975. рок.
На рочней схадзки АРТ Дядя 1974. Янкови Виславскийови уручена Златна плакета за 35 роки аматерскей театралней дїялносци, як першому ношительови того найвисшого припознаня у руским театру.
Янко Виславски умар у Новим Садзе 23. авґуста 1978. року, дзе є и поховани.
Ґлумел у тих театралних фалатох
| Рок | Театрални фалат | Улога | Место |
|---|---|---|---|
| 1937. | Роман Сурмач (Є. Луцик): МAЦ | Пайташ | Руски Керестур
|
| 1938. | Иван Франко: УЧИТЕЛЬ | Жид | ”
|
| 1939. | А. Л.. Суходольски: ХМАРА | Андрий | ”
|
| 1940. | М. Старицки: ОЙ, НЕ ХОДИ ГРИЦЮ | Хома | ”
|
| 1943. | К. Ванченко: ЗАВРАЧАНЕ БЛАГО | Буц | ”
|
| 1943. | А. Л. Суходольски: ХМАРА | ”
| |
| 1950. | А.Н. Островски: ЛЄС | ”
| |
| 1951. | Б. Нушич: ОБИЧНИ ЧЛОВЕК | Вичентиє | ”
|
| 1951. | А. П. Чехов: КАРЧМА НА ГЛАВНЕЙ ДРАГИ | Борцов | ”
|
| 1952. | К. Ванченко: ЗАВРАЧАНЕ БЛАГО | Буц | ”
|
| 1953. | Михайло Ковач: НА ШВИТАНЮ | Каламар | ”
|
| 1955. | Михайло Ковач: НА ШВИТАНЮ | Каламар | Нови Сад
|
| 1970. | Славомир Мрожек: ПОЛИЦАЄ | Гарештанєц | ”
|
| 1971. | Питер Юстинов: РОМАНОВ И ДЮЛИЄТА | Фамулус | ”
|
| 1973. | А. П. Чехов: СПИТОВАНЄ | Ломов | ”
|
Режирал тоти фалати
| Рок | Театрални фалат | Место |
|---|---|---|
| 1952. | К. Ванченко: ЗАВРАЧАНЕ БЛАГО | Руски Керестур |
| 1955. | А. П. Чехов: СПИТОВАНЄ | Нови Сад
|
| 1968. | Марк Камелоти: ЗЛЄТОВАНЄ У ПАРИЗУ | ”
|
Литература
- Дюра Латяк: „Янко Виславски, финансийни службенїк, новинар-прекладачˮ - 50 роки Драмского меморияла Петра Ризнича Дядї, Завод за културу войводянских Руснацох, НВУ Руске слово и Дом култури Руски Керестур, Нови Сад, 2018, бок 134-135.