Михаил Лїкар, учитель и дзияк
Михаил ЛЇКАР edit | |
|---|---|
 | |
| Народзени | 1870 |
| Умар | 1940 (70) |
| Державянство | австроугорске, югославянске |
| Язик творох | руски |
| Школа | Пивцоучительска школа
у Ужгородзе |
| Период твореня | 1889-1933 |
| Обласци твореня | учитель, дзияк у церкви |
| Поховани | Руски грекокатолїцки теметов
у Новим Садзе |
Биоґрафия edit
Михаил Лїкар ше народзел 1870. року у Руским Керестуре як найстарше дзецко Михайла Лїкара (1839-1919) и Катарини родзеней Шовш. У фамелиї познєйше народзени ище дзивка Мария и син Янко.
Михаил Лїкар закончел основне образованє у Руским Керестуре, а вец пошол на школованє до Ужгороду дзе здобул два дипломи: учителя и дзияка.
Робел як учитель двацец роки у керестурскей школи, од 1889. по 1909. рок, после чого преходзи до Дюрдьова. Року 1909. (30. новембра) меновани є за управителя школи, а потим бул и учитель и дзияк.
Михаил бул оженєти з Вилму Лїкар (дзивоцке презвиско Бучко), хтора закончела гражданску школу. Мали осмеро дзеци, зоз хторих ше шесцеро народзели у Керестуре: Корнел (1898), Йоланда (Беба) (1901), Мария (Манда) (1902), Йовґен (1904), Елемир (1905) и Марґита (1909), а двойо у Дюрдьове: Иринка (1913) и Аранка (1915).
Михаил Лїкар умар 1940. року. Поховани є на Руским грекокатолїцким теметове у Новим Садзе.
Дружтвене анґажованє edit
Як учитель и дзияк, у Дюрдьове водзел вельку бриґу о школи. Виєднана Гаргайова хижа нє одвитовала школским потребом, та почали пририхтованя за правенє новей, державней школи. Правенє претаргнуте пре войну, а предлужене є по Першей шветовей войни и закончене 1924. року. Теди Михаил Лїкар уж бул у пензиї и окончовал лєм роботу дзияка. У Дюрдьове у тим периодзе службовал о. Дюра Биндас, хтори бул на чолє велїх пременкох яки вимагал нови час. Михаил Лїкар щедро потримовал и помагал кажду акцию на будзеню националней свидомосци и културного препороду Руснацох. Року 1919. були створени условия за снованє РНПД-а, алє Михаил Лїкар на схадзку 1. юлия 1919. року до Нового Саду нє могол пойсц. Написал два писма о. Биндасови, зоз хторих єдно подписал як управитель школи, а єдно як дзияк, зоз хторих видно же потримовал културно-просвитни рух. Михаил Лїкар барз вельо зробел за розвой руского школства, а стари будинок рускей школи у Дюрдьове красна памятка на ньго.
Литература edit
1. Дюра Варґа, Михаил Лїкар – учитель и дзияк, «Studia Ruthenica“ число 3, 1992-1993, б. 325-329.