| Културно-просвитни союз югославянских Русинох Заря | |
|---|---|
| Скрацена назва | КПСЮР |
| Снователь | |
| Локация | Кральовина Югославия |
| Шедзиско | Коцур |
| Предсидатеь | др Милутин Ґубаш |
| Датум гашеня | у априлу 1941. року |
Условия у хторих настал КПСЮР
Културно-просвитни союз югославянских Русинох Заря бул гражданска културна орґанизация русийскей/общерускей националней ориєнтациї медзи Руснацами/войводянскима Русинами.
Културна политика Руского народного просвитного дружтва (РНПД), хторому на чолє стало углавним священство, нє була по дзеки єдней часци руских интелектуалцох. Бо, РНПД бул, по змисту його програмских задаткох, блїзки народняцкому руху у Галициї, з почасово виразно право ориєнтованима и клерикалнима виступами, поготов у чаше приблїжованя другей шветовей войни[1]. До нєскладаня приходзело особлїво у вязи зоз питаньом националного идентитета югославянских Руснацох. Єдна часц интелектуалцох, медзи хторима були и дзепоєдни тедишнї дописователє и сотруднїки Руских новинох, нєздадовольних з роботу и програму РНПД пробовала винайсц нову форму културного орґанизованя.
Требали прейсц 13 роки од снованя РНПД же би дозрели условия за снованє нового подполно самостойного шветовного културно-просвитного союзу югославянских Русинох зоз програму хтора була базована на демократичнєйших и проґресивнєйших цильох младших ґенерацийох штредньошколскей и студентскей младежи и нєзависних а углядних интелектуалцох хтори нє були под уплївом униятского священства. На чолє руху за снованє Културно-просвитного союзу югославянских Русинох були Владислав Поляк, др Милутин Ґубаш, правнїк, др Александар Сакач, лїкар, др Йован Шарик, лїкар, Михайло Стрибер, учитель, Янко Хромиш. писатель, Дюра Гарди, Мойсей Мудри, општински чиновнїк, Йовґен Кочиш, чиновнїк и писатель, Петар Поповицки, Кирил Шовш, Микола Д. Олеяр, правнїк и други.
Снованє и дїялносц КПСЮР
Так 3. септембра 1933. року у Старим Вербаше основани Културно-просвитни союз югославянских Русинох зоз шедзиском у Коцуре, за предсидателя бул вибрани др Милутин Ґубаш. Вибрани и Централни одбор орґанизациї. Културно-просвитни союз югославянских Русинох 22. априла 1934. року порушал свойо новини перше под назву Заря (по чим члени КПСЮР були у народзе познати як "заряше" або "батогше" - по даскельо числох новинох хтори вишли под назву Русски батог)[2].
КПСЮР Заря промововала и православни рух а окреме успишна була у Коцуре дзе ше єй удало формовац православну парохию. Попри тим же єй вирска и национална идеолоґия була виложена у тижньових новинох, вона була виложена и у рочним алманаху Русский народни календар Заря (1935-1941), и у уплївней историї шицких “Русох” (уключуюци Билорусох, Українцох и Русинох) Николая Д. Олеярова, История русского народа (1934).
Нєт сумнїву же заряшски рух, судзаци по писаних текстох, бул на позицийох идейного руху селянства без прецизней социялистичней и националней ориєнтациї. Идейно вон бул блїзши социялним пременком до яких придзе после другей шветовей войни у Югославиї, алє основни начала културней реформи и дальши цек историї у югославянским дружтве и по питаню формованя українскей нациї и по питаню места Руснацох у тим комплексу на Закарпатю и у Югославиї були и остали у визиї Заряшох у розкроку зоз фактичним статусом яки тот комплекс питаньох ма нєшка. И попри того же просвиташки дух бул идейно реґресивнєйши, вон бул зоз своїма премисами блїзши ґу нєшкайшому нєсумнївому културному препороду Руснацох у Югославиї. Нєшкайши стан и статус Руснацох у Югославиї, у сущносци, то превозиходзенє и просвиташкого и заряшского руху хтори оставаю факти з прешлосци.
Заряшски рух бул ориєнтовани всеславянски, а русийски и сербски узше, и православно, зоз виразну миру вирскей толеранциї, а цали час ше вон нє одрекал анї вязох зоз Карпаторусинами. Факт же заряшки рух бул програмски дифузни, у вельо векшей мири як просвиташки рух. Идейно вон нє бул ясно социялистично ориєнтовани. У 1935. року КПСЮР пременєл мено нa Културно-нaционaлни союз Югослaвянских Русинох, aлє у своєй дїялносци ше сущно нє менял, бул и нaдaлєй у опозициї РНПД, идейно бул унaпямени ґу роботнїцкей клaси и у своїх глaшнїкох укaзовaл нa опaсносц котрa грожи од фaшизмa, нaпaдaл проукрaїнски ориєнтовaне священсто, котре препaсц шветa видзело у большевизму и комунизму, a сaми з вецей симпaтиями прикрито информовaли о "роботнїцкей клaси, социялизму и комунизму". Факт же ше на бокох заряшких гласнїкох зявели написи хтори були у значней мири согласни зоз становисками югославянских комунистох медзи двома войнами[3].
Идейней предносци заряшкого руху над просвиташким нє була, у истей мири, адекватна и литературна предносц бо ше указало же писательом зоз шорох РНПД Просвита припада векша часц заслугох за конституованє литератури югославянских Руснацох цо бул єден зоз досц значних резултатох препородних цекох у їх култури.
После 8 рокох дїялносци Културно-просвитни союз югославянских Русинох Заря престал з роботу у априлу 1941. року зоз реанектованьом Войводини ґу Мадярскей.
Вонкашнї вязи
- Културно-просвитни союз югославянских Русинох Заря, вебсайт Руснаци у Панониї
- Саша Сабадош Руска преса у Югославиї медзи двома шветовима войнами, ВИДАНЯ КПСЮР/КНСЮР (1934-1940), б. 41
Референци
- ↑ Јулијан Тамаш: Русинска књижевност, Матица српска, Нови Сад, 1984, б. 82.
- ↑ Евґений М. Кочиш: Як постал и прецо Културно-просвитни союз югославянских Руснацох, Шветлосц, ч. 1/1984, б. 96.
- ↑ Владимир Биљња, Прилог проучавању историје Русина узмеђу два рата, Зборник за истрорију Матице српске, Нови Сад, 1977м бр. 15, 171.187